我望住買左既野,心中不停有個問題,一開始我地唔係話要打邊爐既咩,但點解而家要買炭同燒烤叉既?

我望一望阿琪,佢用眼神問我咩事,然後我話:「我地係打邊爐定燒烤?」

阿琪望一望堆野,都回一回神,「係WO,我地好似係要打邊爐架WO。」

然後我望一望在場一行人,其他人都你眼望我眼咁,而阿富就係呢個時候話:「頭先呂晨話想燒烤多過打邊爐,係GROUP問左金姐佢地,佢地話無問題,之後……」阿富講到呢到都唔知講咩好。

而呂晨嗲功又出現,「耶~咁人地想燒燒多過打邊邊嘛~你地唔鐘意咩~」



「鐘意!緊係鐘意啦!」東尼傷住話。

「WELL~燒野食,正啊!」艾倫你仲流緊血就唔好咁多野講啦。

而JUDY就白一白眼話:「燒野食無所謂啊,但妳唔好講咁多野就得。」嘩,JUDY妳駛唔駛咁直接啊。

呂晨突然間睥住JUDY話:「妳講咩撚野?」

等等,頭先係我聽錯定點?呂晨原來識講粗口架?



「我叫妳未撚咁多野講,扮聲好撚聲苦架,比把聲休息下啦,小心聲音拗柴啊妳。」JUDY無直視呂晨講左呢句。

JUDY姐……可唔可以唔好勾起D無謂既戰爭……

只見呂晨佢嬲到紅都面晒,仲成身震埋,唔通,呂晨要發火!?

但係我諗錯左,佢無發火,而係發姣……「耶~好衰架~牛牛啊~佢蝦我啊~仲唔快D幫人地~人地喊喊拿~」佢竟然走左埋我度,伏左係我膀頭……

其實咁無所謂,只不過佢係推開左阿琪然後行去我旁邊。



面對咁既情況,我可以做既就係向JUDY求救。

「又係我!?」JUDY佢講左出聲。

「你駛唔駛講出口啊?」我無奈咁望住佢。

「咦,我心聲黎架WO,咩我講左出口咩?」JUDY大笑咁話,而我點左點頭回應。
JUDY笑完後,就拍一拍呂晨話:「耶~好衰架~人地邊有蝦妳WO~人地只係用最真誠既一面同妳講野姐~我先無妳咁假要扮野喔~」

大家唔好懷疑,頭先講野果個人係千真萬確既JUDY,我好明白你地會懷疑係正常,因為當我見到佢咁樣既時候,都唔係好相信自己既眼睛。

阿琪見到JUDY咁,竟然係度大笑,而其餘既人就呆左望住佢,當然呂晨都有望住佢,只不過,呂晨係用一個充滿敵意既眼神。

JUDY繼續發輝可愛教主MODE講以下既說話:「仆~街~啦~妳~」



姐係咁,我第一次見到人地扮可愛講粗口,果種感覺,和諧得黎其實都幾欠打。阿琪聽到後已經開始爆笑,而呂晨見到後,推開左我,行左去JUDY度係佢耳邊講左句後,就行左埋一邊。

JUDY露出左一個勝利既笑容,然後話:「走拿,係未要拎D野去……呂~晨~度~啊~」

「……好啊,走拿,出發。」見JUDY咁講我緊係快手打完場啦,大家聽到我咁講後都拎野走,向呂晨屋企出發,如果唔出發既話,可能會繼續尷尬落去。

而當行緊果陣,我行左去問JUDY,「頭先佢同妳講咩野?」

JUDY笑左笑話:「呢D係女人既戰爭,你唔知好過知,不過,你要小心D。」

下!?我要小心D?小心D咩野?