[愛情無限loop] 就係咁，我做左女神一年既備胎: ５７　第一次既ＴＲＵＴＨ　ＯＲ　ＤＡＲＥ

點解？點解我會聽到Ｄ笑聲既……

但係……好細聲，好細聲……

好似……係兩個人既聲，而且係我識既人……

我慢慢咁張開眼，眼前既視線話比我知，我係訓緊係一個人既大脾上面，點解係大脾，因為我ＦＥＥＬ到好柔軟。

「醒拿。」阿琪把聲係我耳邊傳黎，我郁一郁個身望上上方，見到既係阿琪，視角係由下而上咁望住佢。



原來，我訓左係阿琪既大脾上面。

咩話！！！原來我訓左係阿琪既大脾上面！！！

我知道既時候即刻成個身都彈起左，坐直在成個人，而阿琪就笑左笑話：「都叫你唔死頂架啦。」

「未係，唔聽阿琪話。」ＪＵＤＹ係我地兩個前面食住花生睇緊戲話：「點啊牛兄，係未硬晒啊。」

「咩野硬晒！？」比ＪＵＤＹ咁樣一問，我下意識望左望自己既下面。



「無，我係話你咁樣訓應該會訓到條頸硬晒姐。」ＪＵＤＹ露出左個勝利既微笑。

「無啊。」我無咁好氣同佢講，而阿琪就遞左杯熱茶比我，「特登叫比你飲架。」

「唔該。」我拎起左杯野飲左啖，阿琪特登叫比我，呢杯茶真係特別甜。

「好唔好飲啊杯野。」ＪＵＤＹ問我，而我點左點頭繼續飲。

「緊係好飲啦，杯野阿琪飲過，幫你試過會唔會苦得滯，杯野有阿琪既口水係未特別甜呢？」我聽到ＪＵＤＹ咁講之後，呆左一陣就向住佢噴左口中果啖水出黎。



「作死你啊死仔！」ＪＵＤＹ面對住我突然間既噴沫攻擊，成個人彈左起身，而阿琪見到之後先係嚇左一跳，然後就大笑起黎。

ＪＵＤＹ好狼狽地擦走我噴佢Ｄ水，怒睥左我一眼後，就同我講：「我地等你起身玩……」

「咩話？」我聽唔清楚。

「我話玩……」佢又再講多次。

「咩話？聽唔到啊？大聲Ｄ。」我都係聽唔到。

「仆街你係未聾撚左啊！我話玩……」佢就算講多次我都係聽唔到。

「唔好意思，我唔記得左我飲醉左之後聽力係會差左好多。」係架，我係果種飲左醉聽覺會差左好多既果種人。

「死仔！」佢好惱氣咁拎起左部電話，然後ＳＤ左個ＭＳＧ比我，我望一望佢ＳＤ出黎既ＭＳＧ，然後話：「哦，玩ＴＲＵＴＨ　ＯＲ　ＤＡＲＥ。」