[愛情無限loop] 就係咁，我做左女神一年既備胎: ６５　女神的照顧

阿富既傷，換來既係好多人既照顧，其中當然包括阿琪，阿富傷左真係要人照顧，而阿琪去照顧都係理所當然，但係，心中果種酸既感覺，就不停咁放大。

阿琪對佢既照顧期間，雖然同佢眼神零交流，但係阿富就用好愛慕既眼神望住佢。

「苦肉計。」企係我旁邊既ＪＵＤＹ話。

「妳未咁啦，阿富跌親都好痛架。」我話。

「牛兄你未咁善良啦，可能佢特登咁做架。」ＪＵＤＹ又講。



「唔會啦，阿富唔係Ｄ咁既人。」真係？點解我講呢一句既時候，心中更酸。

跑步就係無聲無色下落幕，而阿富就由幾個男ＭＥＭＢＥＲ扶住返去。

阿琪係佢身後面跟住，當然，仲有阿富Ｄ女ＦＡＮＳ。

而我同ＪＵＤＹ，仲有金姐就係最後方。

「牛仔，你都幾大方架ＷＯ。」金姐話。



我苦笑左一下話：「我而家既身份，可以做Ｄ咩？」

「咁又係。」金姐話，而ＪＵＤＹ就好唔忿氣咁講：「牛兄，你都用苦肉計。」

「下？」我望住ＪＵＤＹ，而佢已經好似準備好推跌我咁，但我即刻阻止佢話：「如果我咁做，咁我同其他狗公有咩分別？」

ＪＵＤＹ聽到後嘆左嘆氣，「牛兄，我欣賞你既清高，但係當你遇到Ｄ兵不厭詐既人時，你都要識得反擊掛。」

我聽完ＪＵＤＹ既說話後，望一望遠方跟係阿富身後面既阿琪，咁岩阿琪都回望再過黎，而我就同ＪＵＤＹ講：「阿琪唔會鐘意Ｄ攻心計既人。」



ＪＵＤＹ同金姐呢一刻都同時望向望住我既阿琪，只見阿琪對住我微笑左一下，然後佢地就同我講：「牛兄，希望你了解既阿琪係真真正正既佢啦。」

返到呂晨屋企，我地即刻再同阿富處理好傷口，識急救既阿琪當然係其中一個幫手既人，而無諗過幫手既金姐就係呢個時候話：「不如我去煮Ｄ野比大家食，牛仔，你過黎幫我手。」

「哦。」都好既，我坐係到只會個心繼續酸落去。

係煮野食既期間。

「牛仔，拎Ｄ糖比我。」金姐話。

「哦……」我隨手拎左支糖比佢。

「喂，牛仔，我係要食用糖，唔係要蜜糖啊。」金姐又話。

「啊……唔好意思……呢度。」我又拎左支糖比佢。



「喂，呢支鹽黎架。」金姐無奈咁話。

「唔……唔好意思。」我心不在焉咁話。

「牛仔，唔好諗咁多拿，阿琪個心點諗唔到你管，而且你自己都話啦，而家你既身份，你做唔到Ｄ咩，係未？」金姐語重心長咁話。

「係……」我嘆左嘆氣話：「但我唔鍾意呢一種感覺，唔係因為阿琪去照顧阿富，而係原來我都會為阿琪去照顧其他人而妒忌。」

「咁妳鍾意阿琪，有呢Ｄ心情好應該架ＷＯ。」金姐話。

「但係我而家既身份，係唔應該有妒忌既心態。」我答佢，心中不是味兒。

而金姐聽到我咁講後，望住我話：「傻仔，你太好人拿，阿琪有你鍾意佢，真係好，不過，都唔知你鍾意阿琪係未一件好事？」



「點解咁講？」我問金姐。

「遲Ｄ你就明架拿，唔好諗咁多，煮好Ｄ野比佢地食先啦。」金姐講完之後，就繼續煮野食。

而係呢個時候，阿琪企左係廚房門度，「阿牛。」佢咁樣一叫，我即刻望向佢，唧出一Ｄ笑容後問佢：「咩事啊？」

「無啊……」佢慢慢行左過黎，「頭先見你好似有Ｄ唔舒服咁，你無野嘛？」

我聽到佢咁問，微笑左下答佢：「無啊，阿富呢，佢無咩事嘛？」

「佢無事啊……」阿琪答左我之後話：「我黎幫你地手煮野。」

「唔好拿。」我好快咁答佢：「阿富整親要人睇住，妳去睇住佢啦。」

阿琪聽到我咁講後，吱唔左一下答：「好啦……」



我見佢表情唔多好咁，所以加左句，「有妳照顧佢好Ｄ，都唔知果班友仔識唔識既，妳學過急救，我安心好多。」我好勉強自己笑出黎。

而阿琪聽到我咁講後，好似好滿足咁話：「咁好啦，我就恭敬不如從命。」

阿琪走左後，金姐問我：「你咁做好咩？」

「嗯。」我點左點頭。

「咁大方做咩？」金姐又問。

我諗左諗答佢：「公平Ｄ嘛，阿琪單身，每個人都資格鍾意佢，每個人都有資格追佢。」

金姐聽到我咁答之後，笑左笑搖一搖頭，然後繼續整野食。