同JUDY食完飯,陪左JUDY行左陣,陪佢買左份禮物比一個人,而我多口問:「買比邊個架?」

「我鐘意果個。」佢笑得好甜,但係眼神間就睇得出佢好空虛,佢望住份禮物,然後問我:「牛兄,你會唔會覺得我係一個壞女人?」

「點解咁問?」我問佢。

「如果一個人,好人好姐點會周旋係兩個人之間WO。」JUDY好感觸咁講呢一句:「你估,真係貪好玩咩。」

「但係……咁……妳……」我無諗過一個我覺得咁識諗既JUDY會係我面前露出呢一面,而我又唔知講咩野可以幫到佢。



「你唔駛口窒窒咁WO,我都知我而家呢個處境,無人可以比到答案我既。」佢好樂天之命咁講:「不過,我明白,呢個男人對我黎講,係毒品黎。」佢搖一搖手中果份禮物。

「咁,希望妳可以早日脫毒。」我同佢講。

「你呢個脫毒係未用錯位呢?」佢笑得好開心咁話。

「又係WO。」我又傻笑咁講。

之後送左佢返屋企後,我不斷回憶JUDY所講既野,佢話自己愛果個男人,係佢既毒品黎,咁樣,阿琪對我黎講,算唔算……係一種……包左糖衣既毒藥呢?



一諗起阿琪,阿琪就SD左MSG比我。

阿琪:你想飲咩涼茶啊?
我:唔知啊
我:阿富想呢?
阿琪:唔理佢啦
阿琪:我睇下你想知咩就煲咩
我:一時問起我唔知添
我:妳煲咩我就鐘意飲
阿琪:口花花



但係……如果……阿琪對我黎講係一粒包左糖衣既毒藥的話,我點都會願意,去試一次。



阿琪好快就煲左涼茶出黎,然後就約左我同阿富出黎交收,而阿琪既往績黎睇,佢一定會盪失路,所以變左我同阿富等緊阿琪。

同阿富一齊,真係有D尷尬……

「係拿……」阿富佢同我講野:「最近你同阿琪點啊?」

下?你呢條問題都幾搞笑架WO,我同阿琪點有關你事,「無咩野啊,點解咁問?」

「無野。」佢答完我之後無野講。



「咁你同阿琪又點啊?」到我問返佢。

「無啊,未又係好似普通朋友咁囉。」佢答我。

「咁未幾好。」我話。

「係咩……」估唔到佢好失落咁回應我:「但我唔係太想咁。」

我望一望佢,然後問:「你咁講係咩野意思?」

佢聽到我咁問之後,好認真咁望住我講:「阿牛,其實你係未想追阿琪?」

佢都咁認真問我,咁我都認真答佢啦:「係。」

「咁……你加油。」加咩撚野油啊,你問我係未想追阿琪就想同我講呢一句加油咩?



「阿富,你係未有D野想講呢?不如你直接D啦,話晒我地兩個男人,有咩野要收收埋埋先。」我同佢講。

阿富吸左啖氣,然後話:「我都唔知啊。」

頂,點解你可以咁憂柔寡斷架。

「聽阿琪講,你呢排好似同女朋友吵架WO,無事嘛?」我問佢,而佢聽到我問佢呢個問題,佢既答案竟然唔係圍繞住佢女朋友,而係阿琪,「你就好啦,阿琪咩都會同你講。」

點撚樣啊又,本來我都覺得阿富係一個好男人,如果同佢爭阿琪,輸比佢我都無問題,但係佢憂柔寡斷到咁,整到我而家呢一刻唔係咁想將阿琪交比呢個人。

就係我同佢咁九唔搭八既交談,阿琪鐘意黎到。

「唔好意思啊,又唔識路。」阿琪講完然後望一望我話:「你做咩唔應我機。」



「咦?有咩?」我睇一睇我部電話,係WO,原來頭先係我同阿富傾緊計果陣,阿琪就SD左幾個MSG過黎,「係WO,可能頭先傾緊計無留意到。」

佢埋怨左我一下之後,就拎左兩支涼茶出黎,「一人一支,返到去慢慢飲。」

「好。」我答。

「嗯。」阿富點一點頭。

「咁我走拿。」阿琪話。

「好啦,拜拜……」「咁快就走!?」我句拜拜剛剛先講完,阿富就即刻接住問阿琪,仲拉左佢一拉,而阿琪好反感咁甩開左佢隻手,然後話:「我今日好忙好多野做啊。」

「但……我想你陪我。」阿富要求阿琪,無錯,睇得出呢個係一個要求。

「無可能啦,走拿我。」阿琪無再理阿富,轉左身就走左。



而剩得既我都同阿富話:「我都走先拿,拜拜。」

一臉唔開心既阿富只係點一點頭。

而家究竟係咩野情況啊,頭先我所見到既野,應該只會係一個交往緊既男女先會有既對答黎架WO,點解阿富會咁既,點解阿琪又要咁對阿富呢?佢先前同我講都覺得阿富係好好先生架?點解呢排好似情況咁差既……

就係呢個時候,阿琪SD左個MSG比我。

阿琪:陪我行超級市場
我:下?
我:頭先妳唔係話好忙好多野做咩
阿琪:我唔想阿富跟住晒嘛
我:咁……會唔會唔係幾好
阿琪:唔會啦,佢有次跟到我樓下附近,我叫佢快D走我阿爸就到,佢死都話唔走,要見我阿爸
我:下?咁都得
阿琪:未係囉,都唔知佢想點,果次未整到我發火囉
阿琪:之後佢成日都係咁,所以都唔多想理佢
阿琪:咁你陪唔陪我去行超級市場啊
我:我可以話唔得咩(喊笑)
阿琪:你未試下囉(喊笑)
我:咁我又唔捨得(喊笑)

會合左阿琪之後,佢都同我講阿富先前對佢做既行為,我聽完之後,就話:「點解……我覺得阿富做既野係想追妳既?」

「你都覺?」阿琪話。

「係啊。」我答,然後阿琪拎起左兩個杯面對住我,我就話:「右邊果個好食D。」佢將右邊果個杯面方入車仔後,就繼續講:「我一開始都唔覺,我只係覺得呢個男既點架可以好到咁,經過我樓下就會問我有無食野,落雨問我有無帶遮,天氣凍左問我有無著多件……但係,會唔會好得太過緊要呢?」

「咁……又唔係既。」我嘗試用另一個角度諗,「如果對方係女朋友的話。」

「就係囉,如果我係佢女朋友就話姐。」我驚嚇既表情望住佢,而佢就同我講:「放心啦,我仲單身既,你唔駛咁驚。」

好彩姐……

「但係,我都唔係佢女朋友,對我咁好做咩,而佢對其他女MEMBER又唔會咁架WO……」佢又講。

「佢想追妳。」我講左呢四個字之後,佢就望住我,點一點頭。

「唔係掛,佢已經有女朋友架WO。」我話。

「呢樣先係最煩。」阿琪既回答,令我問左之後呢一個問題:「咁如果阿富同佢女朋友分左手後追妳,而佢又咁好仔,妳會唔會同佢一齊?」呢一個問題,其實問得好酸。

佢望一望我,然後好認真咁講:「緊係唔會啦,你諗下,而家佢為左我而想同佢拍緊拖既女朋友分手,咁其實以後佢都可以為左另一個女仔而同我分手架WO,呢D咁既男仔,要不得架。」

聽到阿琪咁講後,唔知點解我成個人都放心晒。