「配料……切好……」我望住眼前一大堆既食材,逐樣逐樣點數。

「調味料……都齊……」翻一翻個袋,再三確認多次。

「仲有隻雞……有……」預先一日準備好既雞,D香料既味已經入晒隻雞到。

然後,我將所有食材逐一咁放入個車仔籃度……「仲有支白酒!」尋日同阿琪行街買果支酒,拎左出黎先唔係一陣唔記我帶。

無錯,我咁小心點齊野,因為一陣間就要同阿琪慶祝生日,有少少緊張,又有少少興奮,話晒我係第一次咁大陣象煮野食比女人食,我前女友都只係食過我整既公仔面。



「好,出門。」我拎住架車仔出門,一陣間仲要去拎生日蛋糕,我特登訂左個鬆弛熊生日蛋糕,因為佢好鐘意鬆弛熊,我仲叫個整餅師父係個蛋糕上面寫左一個我幫佢起既花名。

點解要寫花名,唔係寫D好親匿既名?好簡單,因為我仲人係佢男朋友,呢D野,等做左佢男朋友先搞啦。

所有野都準備好晒,真係要出門之際,老牛大人出現了……

「嘩!阿仔,你準備咁多野去邊啊,上山同女打野戰啊?」老牛大人思想其實比我仲前衛,我望住佢,只係笑左笑同佢講:「無,我報左烹飪班而家去學煮野食姐。」

「煮野食都好學既,學下點樣傳宗接代仲好啦……唔通烹飪班有條女好靚,所以你先去上堂?」我真係服左老牛大人。



我拎住架車去左地鐵站,坐車去觀塘,因為果間出租廚房係觀塘。(大家有興趣知就留言問啦)

坐緊車果陣,收到一個電話,原來係送佈置汽球黎既人。

「喂……係啊,一陣準時見啦,我就到果邊,係果邊等你,你架車到左就話我知啦。」收左線後,我收到阿琪既MSG。

阿琪:好開心啊
我:傻豬
我:咩事咁開心
阿琪:一陣你同我慶祝生日囉


我:(喊笑)
阿琪:一陣食完野女以去飲野啊
我:都可以啊
阿琪:不如叫埋能蟹同JUDY?
我:可以啊
我:等我地兩個慶祝完之後就搵佢地
阿琪:好(開心)
阿琪:開心(開心)

見到阿琪咁期待,我唔單止無緊張,相反竟然更有動力去做呢件事,可能當你真真正正愛一個人既話,就會咁做。

去到現場,租廚房比我既人一早準備晒交場比我,仲問我:「點啊?睇你有成車食材,準備得幾好WO,希望你今次成功抱我美人歸啦。」因為我呢段時間都有問佢煮野食方面同現場環境既野,所以有時都會傾開我想要個場地做D咩。

「知道,我會加油。」我人佢講。



「巨蟹座既女仔要慢慢黎唔可以急架。」因為阿琪生日既月份係巨蟹座,所以老闆娘應該估到。

「妳又知巨蟹座既女仔要慢慢黎?」我問佢。

「因為我都係巨蟹座囉,而且都就快生日。」老闆娘答。

「生日快樂。」我同老闆娘講,老闆娘好開心咁笑住話:「記住慢慢黎唔好咁快,最多錫下好拿,唔好咁心急啊。」

聽它老闆娘咁講後,我有少少尷尬答佢:「點會錫呢,未有咁快啦。」

「可能過埋今日就會有呢。」希望可以同老闆娘所講咁啦。

放好晒D食材,放左支酒同蛋糕入雪櫃,然後睇下現場D設施,都好齊全,接落黎電話又響起,係送汽球黎既人,落左去拎左兩大袋汽球上黎,就即刻開始佈置。爭分奪秒,好快手已經SET好個場。

而呢個時候,就收到阿琪既MSG。



阿琪:駛唔駛比多D時間你啊(喊笑)
我:緊係唔駛
我:就準備好添啊
阿琪:咁勁
阿琪:我出門拿
我:知道
阿琪:地址呢
阿琪:你仲未比個地址我啊

我SD左個地址比阿琪後,就同佢講。

我:妳到附近話我知
我:我帶妳上去
阿琪:好(喊笑)



佈置完畢後,就返到去準備焗雞,因為只要放入去個焗爐就得,而且我係佈置果陣已經預先整熱個爐,所以放左隻雞入去後就可以整其他野。

我先整個沙律杯,將預先已經切好既牛油果粒,再切左D西芹,蘋果,士多啤梨仲有大蝦粒加沙律醬整勻,放入老闆娘預先幫我準備既鐵杯入面,再係上面放上原隻大蝦,頭盤牛油果大蝦沙律杯完成。

然後就到薯仔濃湯,先將烚好左既薯仔拎出黎切粒後放入攪拌機,然後煲熱雞湯再倒入攪拌機入面,打勻,其間不時放入忌廉奶,打勻後倒入打碗,放胡椒粉調味,然後係上面落少少香草扮下野,又完成。

隻雞而家應該差唔多,「叮!」呢一叮打破左呢度既寧靜,我打開焗爐拎隻雞出黎,好香,不過只係完成左一半,因為仲要落蜜糖再焗,拎左出黎將蜜糖搽勻隻雞既全身,好,可以再焗。

就係係呢個時候,阿琪打電話黎,「我到拿。」

「妳等等,我而家落殷接妳。」時間剛剛好,雖然仲有魚未煎,但係我想阿琪見到我為佢煮野既樣,所以一早都預左佢黎到我先煎魚佢食。

係而家呢一刻,我先感覺到緊張,唔知一陣見到阿琪要講D咩呢?唔知阿琪今日係咩打扮呢?唔知阿琪一陣見到我為佢準備既野會唔會好感動呢?



係呢一程升降機既時間,呢D問題不停係我腦入面出現,真到,升降機門開啟,阿琪慢慢出現係我眼前……