都話世事唔會咁巧合,我一直都怕B男會係JUDY同拾拾同場既情況出現,但好似係多餘,B男無出現過,而拾拾佢好快就打入左我地既圈子。

三個女人一個墟,而而家唔止有三個,有四個人,雖然阿珍對阿琪有D微言,但係以同JUDY慶祝生日既前題係,佢地四個女仔真係要幾嘈有幾嘈。

「JUDY妳生日想食D咩野蛋糕啊?」阿琪好興奮咁問,而JUDY諗左諗就話:「咩野蛋糕唔緊要,最緊要既係有……」「士多啤梨!」佢地四個好有默契乎一齊叫左出黎,然後就放聲大笑。

其他唔知情既GROUP MEMBER好想打入佢地既圈子,但係無從入手,而佢地亦都樂於四個人係度傾計,就好似四個人已經係一個世界一樣。

而坐係佢地旁邊既四個男性動物,包括我,就好靜咁睇住佢地所做既一切。



「係拿,唔記得多謝你地添。」COW突然開口講野,對像應該係我同能蟹,「如果唔係你地幫手,我都唔可以好似今日咁坐係度同見到JUDY咁開心。」

能蟹笑左笑話:「唔駛多謝,要多謝就多謝你自己啦,你識搵到我呢位高手幫手嘛。」佢永遠都係咁有自信。

「能蟹講得岩架,你要多謝自己。」我同COW講:「係因為你既行動先可以令到JUDY而家咁,唔關我地事架。」

COW聽到後露出左一個意味心長既笑容。

我拎起手中既汽水,向COW乾杯,而同完COW乾杯後,我就碰一碰能蟹既杯,佢見到我呢個行為,望一望我,而我就話:「以前好似有個人講過,男人唔記仇。」呢句說話係能蟹以前講過。



能蟹聽到後又笑左笑話:「係你就用酒乾啦,用埋呢D水溝糖再加色素既野飲。」

我地四個男既,最靜莫過卡七三廿一,佢成晚都坐左係度望住拾拾,好似有D野想講但又講唔出咁。

「你做咩望住拾拾啊?」唔知情既能蟹問七三廿一,「你係未想追佢啊。」

被咁問既七三廿一當堂嚇左一跳,然後就話:「我邊有望住拾拾啊,我望住……我望住……」

「拿,你小心D講野啊,係拾拾左手邊既係阿琪,右手邊既係JUDY,一個已經有人睇中,一個就大大個男朋友坐左係度,你唔好同我講你望緊拾拾旁邊果個啊。」能蟹,你駛唔駛迫得佢咁盡,但係見到七三廿一個慌張樣,又真係好好笑。



「我……我望後面牆上面寫係果D菜名姐,都無望拾拾。」七三廿一隨便搵左個借口話。

「原來係咁。」我、能蟹同COW三個齊聲話。

呢次既飯局,我地決定去酒吧興祝,呢個係JUDY既決定,生日係大晒既,無計啦,而女子組就會準備野食,我地男子組既,就係搵地方。

而距離JUDY既生日,就仲有兩個星期。