[愛情無限loop] 就係咁，我做左女神一年既備胎: ２５５　阿銀的激動

金姐既呢一巴，就好似為接落黎既大戰打響警號一樣，因為能利見到自己條仔比人打，點會唔幫拖啊。

「妳癲架！做咩無啦啦打我條仔啊！」能利衝左過去推開左金姐，不過金姐好似上晒身咁不停撲向能蟹，咁又係既，當一個人見到自己認為係仇人既人係自己面前果陣，有邊個唔想即刻衝上去將佢碎屍萬斷呢。

我諗金姐而家就係咁諗。

佢不停對能蟹郁手郁腳，只可惜係能利係兩人既中間將所有既攻擊擋住晒，而且ＳＵＮＮＹ都上次阻止金姐，如果唔係能蟹真係會比金姐怒打。

就咁過左一分鐘左右，好快就有人黎阻止，「呢度醫院黎架！你地如果要嘈就出去！」有個護士好有霸氣咁話。



打鬧緊既人靜晒望住佢，然後佢就話：「邊個係阿銀既親人？」

「我係啊。」金姐行到護士前面，「我係佢阿媽啊。」

「個病人話自己無阿媽架ｗｏ。」呢個護士都幾直接下ｗｏ，金姐聽到護士既說話後，呆左一呆，然後ＳＵＮＮＹ就話：「我地係佢既朋友，係未可以入去睇睇佢。」

「可以係可以，不過你地唔好再嘈，唔係我就叫當值既警察做野架拿。」護士話。

我地一行人就咁跟左個護士入去，講真，我唔明點解個護士又肯比我地一次過入咁多人，通常都有限住人數架。



唔理咁多，好快就入到去見到阿銀訓左係床上面，目無表情，金姐見到佢咁即刻行過去，但係阿銀好似察覺到佢既舉動，係金姐未行到床邊就已經話：「妳唔好過黎，我唔想見到妳。」

「阿女啊，妳唔好咁啦。」金姐央求話：「發生左咩事妳要入院啊？」

「我既事唔關妳事。」阿銀一句就結束左兩人之間既對話。

然後，就到能蟹問：「係未上次果個男人？」我唔知能蟹所問既男人係邊個，只係知道阿銀一聽到能蟹把聲，就即刻望過黎話：「你條撚樣又做咩黎左啊，而家又肯理我拿，我以前為你做左咁多野都未見過你好似而家咁架ｗｏ，你唔好話你轉性啊，你呢ｄ咁既仆街係唔會變架，就算變，都只會愈變愈衰。」

「妳唔好咁啦……」「你未再嘈我個女啊！我個女變成咁都係因為你啊！」金姐又好似想發癲，但當個護士咳左幾聲後，金姐個人即刻冷靜晒。



而阿銀，就突然大笑左上黎，佢呢一笑，嚇親在場既所有人。

「阿女，妳無事嘛，妳唔好嚇阿媽啊。」金姐話，然後阿銀就拎起左個枕頭一野掟向金姐。

「妳唔好再理我好唔好啊！我而家話你地知！我變成咁唔係因為一個人既錯！而係你地都有錯啊！！！」阿銀突然好激動，「你地走啊！你地走啊！你地走啊！」

護士見到阿銀咁，都即刻叫左醫生黎幫阿銀打左支針，然後就叫我地離開。

離開既路上，我地分開左三批，第一批係金姐同ＳＵＮＮＹ，第二批係能蟹同能利，第三批就係我同阿琪。

「估唔到會發生成咁……」阿琪嘆氣話。

「係囉，都唔知點收科好。」我答佢。