面對住藍臣呢一個問題,我無野好講,雖然呢個問題係我成日都會諗既問題,但係都而家呢一刻,我都無一個好確實既答案。

藍臣見到我係度靜思,笑左笑話:「我呢個其實唔係一個問題,而係一個提醒,提醒你,如果要追到阿琪,就一定要有漫長既耐性,我可以話比你聽,我同你只係其中一個等緊阿琪既人,仲有好多個人等緊佢,係你唔知,甚至果d人等阿琪既時間仲耐過我。」

聽到藍臣既說話後,老實講我係有d驚訝,以前成日聽阿琪話有好多男人都等緊佢,其實我都係信少少,不過今日有一個等緊佢既男人係我面前講同一番說話,可信性已經高到無可再高。

「其實點解有咁多男人等阿琪,阿琪佢都選擇唔到一個合適佢既人?」我問,雖然我唔知藍臣答唔答到我,不過我都係問左。

而藍臣佢就微笑咁搖一搖頭話:「因為阿琪永遠最愛果個人,係佢初戀情人。」



佢既初戀情人?我聽過阿琪同我講過佢第一次拍拖既時候,分手果陣迫住要做衰人令到佢初戀情人放棄佢,「係未阿琪話就算幾愛果個人佢果陣都做左好多傷害佢既事,令到果個人放棄佢果個男仔?」

藍臣聽到我咁問,竟然用左個奇怪既目光望住我:「估唔到阿琪會話呢件事你聽,係,就係果個男人,我總覺得,阿琪到而家都未搵到個男人,一黎係因為屋企既事,二黎就係因為佢第一個男朋友。」

「但係,都已經隔左好耐。」我話。

「係,不過阿琪係一個好重感情既人,時隔左咁耐,可以話放淡左,但始終果個男人已經係佢心入面留低左好多野,可能就係因為呢個男人,所以阿琪每次都會用呢個男人去同佢每一個遇到既男人作出比較。」藍臣話。

「比較d咩?」我又問。



藍臣嘆一嘆氣話:「就係我同你都努力緊令阿琪有既果樣野,愛情既感覺。」

如果,真係要令到阿琪有愛情既感覺,唔通真係要搵返佢第一個男朋友出黎問?無可能掛……

同呢個藍臣食完飯,我可以講佢對我既感覺係友善,不過咁樣我仲大壓力,因為我明白而家同我一齊追緊阿琪既當中,有個好強大既對手,藍臣,佢唔會耍手段,甚至可以同你做朋友,係一個君子。

「我諗如果唔係因為阿琪既話,我地一定會成為好朋友。」我話,而藍臣笑左笑答我:「就算係咁,我地都可以做好朋友。」佢伸出隻手,我明白佢既意思,同佢握起手黎,而當握手果一刻,佢就話:「但我係唔會放棄追阿琪。」

我聽到佢咁講後,都笑一笑話:「我都係。」