我想進行既計劃,得唔到金姐既支持,但係,佢都無反對,加上SUNNY既說話,其實,我只感受到自己係孤軍作戰。

其實我想金姐佢支持,只係想多一個人認同我咁做,等我實行呢個計劃更有信心,但係而家連我覺得會支持我既人都唔支持既話……

我……仲可以搵邊個。

唔知係未每個人係最無助既時候,都會放空呢?

放空既時候,好多既回憶都湧現,就好似係我同阿琪既回憶跑馬燈咁樣。



我記起,我地第一次既見面,我對佢一見鍾情果一刻。

我記起,我同阿琪第一次跑步,我仲撞親整到阿琪好擔心我。

我記起,同佢第一次食飯,我地好開心咁食左好多野。

第一次聽佢講心事、第一次拎起電話聽到佢喊、第一次佢靠住我既膀頭、第一次拖住佢隻手……

飲酒既事,果兩次TRUTH OR DARE、果次飲左酒後好大膽錫左佢一啖。



送泳衣果一刻、游水果一刻、同佢面對面好接近既果一刻。

慶祝生日果晚我第一次煮野比佢食,果個寫左師奶仔既鬆馳熊蛋糕、果隻燒雞、果兩條煎得唔知熟唔熟既魚、仲有沙津杯同佢整既蛋餅。

仲有佢每一次既笑容、每一次同佢係超級市場行街買野、我每一次掐佢既鼻、佢每一次既為食豬樣。

原來,一年入面我同阿琪已經有咁多既回憶,但係點解,愈想起呢d回憶,我既心卻愈空虛?諗起呢d回憶,甜蜜但帶d苦,盼望但又有失望。

多謝妳,阿琪。



可能,係因為我知道一個事實,但係我永遠都唔肯去面對,不過就算係咁,我好想去實行我果個計劃。