[愛情無限loop] 就係咁，我做左女神一年既備胎: ３２４　大集合

係公園入面，我面對住呢一班對我怒目而視既人，呢一班人，係我既朋友。

「扮晒野唔覆ＭＳＧ，一覆ＭＳＧ莓就叫晒我地出黎，咩野事啊？」能蟹對住我講，而ＪＵＤＹ就撞一撞佢，可能係叫佢唔好咁既態度講野。

因為在場既人好多都唔知老牛大人走左既事，知情既人只有ＪＵＤＹ、金姐同ＳＵＮＮＹ。

「今次搵你地出黎係想你地幫手搵返阿琪。」我話，但係能利一聽到就話：「做咩要幫你手啊，而且係搵佢ＷＯ，你覺得佢玩你仲未夠啊。」仲係一貫既作風，睇黎佢同能蟹都仲係覺得阿琪係一個會傷害我既人。

企埋一邊無出聲既呂晨、阿珍同阿塔表情都表示認同能利既說話，可能佢地都係一樣既諗法。



「你地唔好咁啦，阿琪都係我地朋友嘛。」呢個時候拾拾走出黎講：「而且果陣能蟹比人捉左，阿琪仲有埋佢朋友黎幫手，我地先可以順利救返能蟹咋。」

「係囉，你地就當幫我啦好唔好？」多謝妳阿拾拾。

「咁而家你諗住點做？」七三廿一問我。

而我，拎左一張紙出黎，「呢Ｄ係阿琪以前唔開心既時候可能會去既地方，同埋有Ｄ係我同佢去過既地方，我地而家有咁多人，我想分開幾組每日去唔同地方搵，睇下見唔見到阿琪。」我張印好左既紙派比佢地。

「你真係好在意阿琪。」接過紙既藍臣同我講。



「我知你同我一樣都好在意阿琪。」我答佢。

ＪＵＤＹ行左去我旁邊，叫我哄個頭過去，佢同我耳語講：「你爸爸剛剛走左，你唔駛花多Ｄ時間陪屋企人咩？」

「係我媽媽叫我一定要黎搵，佢話唔想因為佢，令到自己個仔後悔唔做一件事。」我既答案後，ＪＵＤＹ露出左一個敬佩既眼神，呢個眼神，係比我媽媽既。

講好左我既計劃後，藍臣突然問左一個問題：「我想問大家，最後同阿琪ＭＳＧ既時間係幾時，我唔知對我地有無幫助，但起馬可能知道阿琪係幾時開始唔見人。」

藍臣講完呢句後，大家都拎左電話出黎。



「我無。」能利答。

「我都無。」「我都係。」阿塔同七三廿一同樣既答案。

「今日晏就三點阿琪ＳＤ個ＭＳＧ比我，佢問我阿牛有無搵過我。」阿珍話。

「我都係一樣既問題，都係大約時間。」呂晨既和應，ＪＵＤＹ同能蟹都點一點頭。

「牛仔，睇黎佢似好擔心你。」金姐話。

「我知道……」我答：「所以，我而家就要去搵返佢。」

然而，我停左一停，因為有一件事都要同大家講：「對唔住大家，無啦啦粒聲都無就玩消失，係我既錯，因為……我爸爸走左。」

唔知情既佢地聽到呢個消息到嚇左一跳，「節哀順變……」佢地一齊同我講。



「有心。」我講完呢兩個字再同佢地講：「但希望大家可以幫一幫我，等我可以儘快返去陪我屋企人。」