成個搵阿琪既計劃係咁,我地分左組去每一個地方去搵,而每一組都會去晒所有既地方,只係時間上唔同,因為,我地怕阿琪會四圍去,如果我地去完一個地方走左佢先出現,咁樣就會失之交臂。

雖然呢個方法聽上去係有D蠢同浪費時間,但係我地都讚成呢個做法。

我、呂晨同藍臣一組,已經去左兩個地方,但都係無阿琪既身影,而下一個地方,係一個運動公園,我好記得呢個公園,因為係我同阿琪第一次跑步既地方。

我地一路行一路注示每一個與我地擦身而過既人,無一個係阿琪,不過,一段漸大既吵鬧聲慢慢吸引左我地既注意力。

「你果陣狗公搖晒尾嘛!」「邊有啊!」「無!人地叫你做義工你就仆到去!平時你有做開義工架咩!」「咁做義工有意義嘛!」「本身就係有義意!但比你呢D狗公去做為左溝女就搞到無晒意義!」「你好拿WO!成件事唔係得我一個人有錯WO!阿琪都有錯架!」



等等!?阿琪?點解呢兩個人吵架會提到阿琪既名既!?

「我地不如去睇下。」呂晨講完之後,就跑左過去,我同藍臣都跟住佢後面。

而我一見到吵鬧既兩個人,呆左,因為呢兩個人係阿珍同阿塔。

就同頭先所講既計劃一樣,我地係同一個地方會撞到其他分組唔奇,因為係好似替更咁。

「你地係度吵咩野啊?仲要咁大聲,我地係好遠都聽到拿。」呂晨一走到佢地面前就話。



「妳問佢!我唔知!」講呢句咁小氣既野,係阿塔,而阿珍都好唔忿氣咁話:「佢緊係想唔知啦,因為本身係佢有錯嘛。」

「我講左好多次錯不在我啊!」阿塔反駁。

死火,佢地兩一吵親就有扑排搞,「你地兩個不如去下個地方先,等我同佢地傾下發生左D咩野事。」藍臣同呂晨聽到後,點左下頭就走左,而我,就望住兩人個鬥緊係既大細路,「做咩野無啦啦又拎返呢單野出黎講。

「你問佢啦!本身好地地搵阿琪!佢係都要提起果件事!」阿塔話。

「你咁激動做咩啊,身有屎啊。」阿珍仍然唔放過阿塔。



「我就係無!」阿塔回應。

「如果無,點解要咁激動,點解講下都唔得,好明顯就係自己都覺得自己做左D ON9野,比人識穿左,踢爆左之後就老羞成怒啦。」阿珍講既野真係下下重要害,阿塔都無再反駁落去,因為已經駁無可駁。

「點啊,默認拿,默認你都做過狗公想追阿琪拿,記住啊,你係狗公咋,連兵都不如啊,就算你想做兵阿琪都唔比你做啊。」阿珍呢句一出,阿塔立即怒視佢,「妳好拿WO!我唔出聲你就以為可以繼續講落去咩!」

「我講落去就係想話比你知,你果陣做既野有幾錯啊,你話你有改,但係連面對以前既錯都唔敢,人地一講起就發晒癲,你呢D唔係改過,係瞞天過海咋。」阿珍話。

「係啊!我係瞞天過海啊!但係妳把口講出黎我仲嬲!」阿塔既呢一句話,令人費解。

「你講咩啊?」我同阿珍同時問佢。

「因為我覺得以前妳對我咁好,我唔珍惜衝左去阿琪度但又一無所獲,見返妳總覺得其實同你一齊係最好,但係我已經錯失左呢個機會,係!我無用!我廢!但我以前覺得我樣樣野都叻過妳,但原來最後我先發現,所有野都係妳讓我,我就覺得我仲無用,仲廢,我好嬲我自己……」阿塔講講下好無力咁住坐係附近既一張長椅上面,「……但我唔想繼續咁,好想逃避果陣既我。」

阿珍行到阿塔既面前,望住垂低頭既阿塔話:「點解要避?點解唔選擇接受自己?」



「我……」阿塔無言而對。

「有好多人做緊兵既時候唔會覺得自己所做既野有幾ON9,但脫兵單後,佢地都會發現原來自己都曾經ON9過,有人會同你一樣唔想比人提起,但係咁樣逃避係無用,接受自己ON9過,對將來既愛情路上都會係好事,世上,有邊個未為愛ON9過,我果陣鐘意你,都做左好多ON9既野啦,而家我未好地地。」阿珍蹲低左,與垂下頭既阿塔話:「我地都仲係朋友,都唔想睇住你咁。」

阿塔望住阿珍,笑左笑話:「咁又係,我醒妳咁多,點會諗唔到。」

「因為你ON9囉。」阿珍笑住答。