《再來一次，然後成為英雄》: 4.捉不透的繁星
「幾十歲人就唔好對十幾歲嘅妹妹咁多幻想啦。」不知道在那裡跳出來星儀冷冷的一句將我的幻想都打破了
「我肉體上都係十幾歲啫，好正常喎。」
「明明係中坑，扮咩呀。」星儀嘅語氣好似有啲嬲
唔通……「定係你呷醋呀? 劉星儀，你唔好鐘意我啦。」
「邊個得閒鐘意你呀。死中坑」
「點呀，你識超能力喎，會唔會你其實仲老係度扮嘢呀。」
「你……你講……講咩呀。」
唔通講中左?
「哈哈，唔怪得自稱姐姐啦，我係中坑呀，咁你咪……劉婆婆?」
結果證明，同女人鬥嘴係唔會有好下場，因為佢絕對會惱羞。
「講咩呀，死人頭!」
只見星儀氣聚丹田，左右勾拳再加一個華麗嘅旋風腿，一套將我K.O
如果你話比女仔打其實好幸福，我想講前提個女仔要唔識功夫囉，唔係身上有能量防護，我諗我肋骨都比佢踢斷。而家有神功護體都痛到我訓左係度呀。
「好，講返正題，你諗住點處理佢地三個，種子其實好少見架，而且光度都好接近能力者，仲要係你嘅好朋友，你諗住點?如果你想，我可以教你點收眷屬。」
「呢個問題，其實我有諗過，但可以嘅話就唔好拖佢地落水啦，隱約我都知能力者嘅世界唔係啲咩和平主義可以行得通。」
「咁……我都明嘅，算啦，今晚九點係學校門口等啦，我要帶你見一個人。」星儀說罷就揮袖而去，不帶走一片雲彩。
月夜濛朧，巳時之際，獨站校門，未幾，星儀已至。
係囉，半個鐘啫，冇幾耐啫。
「等左好耐？」星儀問
「冇，半個鐘，正常啦」
「咁行啦」
然後，我跟著星儀的腳步，到了魔鬼山的山腳。
「夜媽媽，孤男寡女行山？ 會唔會太刺激呀儀姐姐。」
「妖，你諗左去邊呀，咁最近嘅入口係呢度呀嘛，行啦」
「入口？ 到底要去邊呀？」
星儀沒有回應，只是一味的走著，故我亦不好追問，但總感覺愈走下去，心緒就愈不寧而且今夜月色濛濛，正常而言根本是伸手不見五指，還可看得見路大概是拜超人體質所賜……
「我地到啦」星儀停下了腳步
「呢度？除左樹都係樹喎」
「係呀，因為時晨未到呀嘛，係度坐陣等到子時就有路架啦。而家十點半，我地可以坐半個鐘先」
「到底我地要去邊呀？」
「有冇聽過西貢結界？我地而家就係要穿過結界，去見一個人，其實大多數能力者組織嘅據點都會用唔同嘅結界令一般人察覺唔到，當一般人誤闖就會迷失方向，不停係原地打轉甚至會出現幻覺，西貢嘅結界係屬於中華術式，用奇門遁界建構，其實世界上仲有好多唔同結界用嚟隔開普通人同能力者，好似係富士山樹海同百慕達三角都係好出名嘅結界，所謂結界其實係通向世界內側嘅門。明唔明？」
「明明地咁啦，其實你到底係咩人？ 」
「嘻嘻，想知？」
「想呀。」
「我其實係天使，下凡嚟拯救你呢個迷途小羔羊架」
「真架？咁你對翼呢？」
「假架，你真係信？好蠢呀你，邊度有咁多天使呀，仲有天使邊有我咁靚女呀。
同你講啦，所謂天使其實係上帝整嘅術式，真身係成條蠕蟲咁樣，但好叻用幻術變靚自己嚟幫上帝賺信仰咋，因為信仰其實係一種契約，當你信左，就用定期分左一啲能量比你地口中嘅神。
令神可以永生同有更大權能，用呢種權能再行神蹟去保佑返你地，然後不斷loop落去，所以去到新約已經唔需要天使。
而且新約佢仲要多左一個叫耶穌嘅超強眷屬，而耶穌令佢嘅信徒量大到已經唔洗再做野都keep住有好多信徒。所以依家嘅上帝只係個遊手好閒嘅死老嘢。」
「真定假呀？」
「呃你做咩？」
不過可以得閒到話自己禁錯制做低左我又比三個願望我嘅話，咁星儀呢返說話都有咁上下可信性。
「咁我陣間要見嘅人係何方神聖？」
「都係一個死老嘢，但係一個值得尊重嘅死老嘢，中華術法嘅佼佼者。一陣你就知架啦，唔好心急啦」
霎時間，四周泛起綠光，能量化成了一個漩窩浮於空中。
「時晨到啦，呢個就係入口啦，順帶一提，綠光係代表賢者。好啦，我地行啦。」
只見星儀輕輕一躍跳進了漩窩就消失了，於是我亦只好跟隨。
跳進漩窩後，又是另一個樹林，可是空中浮著一條綠光所描繪的道路......
「跟住綠光行就到架啦。但唔可以踏進綠光呀，唔係就會跌入八門迷宮，我都唔識行返出去架。」
星儀說得輕鬆，可是要走這條綠光絕非易事，因為本來直路的道路每幾秒就會轉一次方向，而且踏過嘅地方會慢慢消失，難怪誤入結界的普通人全都會失蹤了。
而亦因爲路會消失，所以我跟星儀現在肩並肩的走著。
「其實你係另一個時空係點？」星儀突然問道
「不如你講先呀，交換秘密是常識吧。」
「見你苦苦哀求，好啦我講啦，其實我的確係一位婆婆，即使呢個身體得十幾歲，但我係由二百年後穿越返嚟。原因為左引發我心愛嘅老公唔好死嘅蝴蝶效應，所以我先係呢度。
但呢個時空嘅佢，好似唔識得我，而且佢根本唔係能力者，明明我搞到自己差啲命都冇先偷到兩粒時空膠囊，一粒返過去，一粒去未來。
但竟然唔知因為咩原因去左一個我同佢一生都唔會見面嘅時空，而且呢個時空嘅佢只係普通人，根本冇兩百年命，所以我死心打算返去。
但當我打開最後一粒膠囊果陣，有一個死人頭搞到時空扭曲令到我返唔到去。搞到我想死係佢身邊都唔可以……」星儀的精緻的臉龐劃過了兩串淚痕。
「對唔住......但我諗你先生都會想你好好生活落去⋯⋯要珍惜生命呀。」我給了她一張紙巾。
「冇左佢，我生存有意義咩？我同佢一齊經歷左超過兩個世紀啦..….」
我沉默了，一段超過兩百年的愛情要付出多少愛? 只是這一個問題，已經令我說不出半句話
「嘻嘻，你覺得呢個故事作得好唔好?」星儀突然冒出了這樣的一句。
我無言了……
「其實我都真係唔明點解，你講嘅嘢我會下意識就信左，明明已經比你玩左咁多次。不如你放過我啦」
又或者呢個只係你嘅下台階啦，我真係睇唔透你呀，劉星儀。
「哈哈，我地到啦。」星儀笑著說