【愛情小品】【已完結】 《Chapter C》番外篇．最終回: 「不愛和愛，這麼簡單的道理，我們明的，卻不想明。」

「不愛和愛，這麼簡單的道理，我們明的，卻不想明。」
                                    
二零一四，夏。
 
聽完最後一個故事，我替毒孤証不忿，說：
 
「其實你大可以追佢啦，你可以唔使去理會世人嘅眼光。」
 
阿証回答說：「或者我真係曾經鍾意過佢，但當我發現原來佢性格好似變咗第二個人，我鍾意佢嘅感覺都消失咗，一開始或者係冇勇氣，但到後來係感覺都消埋。」
 


李子淳說：「估唔到因為我你真係冇同巫忘零拍到拖，你都顧及到我嘅感受呀。」
 
阿証接著，「係呀我寧願冇咗條女，都唔想冇咗個friend。」
 
阿淳感動地說：「抵我當你係一世兄弟，不過你同佢之後有冇聯絡呀？」
 
「其實有嘅，佢同我有講返對唔住，話冇諗過原來佢阿淳你報仇，對我這個局外人嘅有咁大影響，不過都冇用啦！感覺消失咗，就唔會再返嚟 。仲有其實佢之後，又再約多我一次出去玩，不過我好攰啦，我唔想再要面對佢！」
 
我問道：「咁你點樣面對佢，如果有新男朋友？」
 


「我唔知呀，或者我可以做嘅就係祝福佢。」
 
錢成功說了一番說話，「你哋三個都好傻。先講陶永諾，一睇就知人哋唔鍾意你啦，你點樣去追一個你唔鍾意嘅人，都係冇用㗎，因為無論你追佢幾耐，佢最後咪都會選擇拒絕答應你嘅追求。
 
第二個李子淳仲傻，就係因為你之前唔夠專一，唔夠包容，成日以為自己睇透愛情，最後咪反被愛情玩。呢個故事教訓你，溝女就學精啲，請人摸清地佢底仲好。
 
最後一個毒孤証更加白痴，係人都睇得出個女仔最後對你心動呀！咁好嘅女仔都要放棄，喺度不停咁計算跟人家距離，當愛情成個戀愛攻略遊戲咁，你咪錯囉，雖然戀愛係複雜，但不停咁作出計算，到最後你就會因為計唔出答案，而放棄㗎。」
 
我、李子淳、毒孤証一同大叫：「使唔使咁mean呀？」
 


我說：「話時話，錢成功你有冇啲女朋友經歷分享下啫，講啲嚟聽下，我哋三個都講曬出嚟啦。」
 
「冇…冇…呀…冇…呀….冇呀，講返轉頭你哋三個都冇溝到女，啊唔係，李子淳都算有，嘅咁阿証同埋陶永諾都要接受天打雷劈嘅懲罰！」
 
李子淳恥笑地說：「你講笑咋嘛？你點樣控制天氣呀？」
 
「唔知呢？我就係有咁嘅能力，你地兩個出街睇路啦！」
 
我說：「係喎，唔好轉移話題你究竟有咩戀愛經歷，講出嚟啦，講出嚟啦…」
 
毒孤証：「講完就開始玩三國殺喇！我等緊你哋畀我殺㗎！」
 
錢成功：「好呀，好呀玩三國殺。」
 
我說：「唔好玩住，唔好畀錢成功有機會轉移話題。」


 
「我乜都聽唔到，聽唔到。我做主公，等我殺死你地班反賊」
 
李子淳亂入：「哈哈，我抽到諸葛亮，仲唔玩殘你哋班廢柴」
 
在一片殺殺殺的氛圍下，回憶終於畫上句號，
 
一切遺憾或許只不過是，為未來鋪了更好的路。
 
時間不等人，那就任有時間逝去，因為時間本來就是捉不到 ，
 
反正都沒有女朋友那就珍惜附近的好朋友吧！
 
我還未化解到 球月缺給我的最後一句說話，在相即影即有相片上的那個謎。
 


可能當我解開謎題的那一刻，她便會回來，
 
好像都是虛無飄渺，不過那一線生機觸得到，又或者觸碰不到，都不緊要。
 
時間像秋葉般落下，那人生最好的那一刻就是櫻花燦爛的時候，
 
所以何必單戀著秋葉，不如等到那一天，那一刻，一起看櫻花更好吧。
 
也許未來的我能夠忘記她吧。                                 
 
《Chapter C》正文，全文完。