<< 那年初夏，我們在微信釣的狗公 >> 再釣一次?: Part 10 第一章 - 歡迎來到 <<化妝舞會>>

Part 10 第一章 - 歡迎來到 <<化妝舞會>>


早係我下載完WeChat果陣，為左知己知彼百戰百勝，所以用左唔少時間研究過依個應用程式。對話系統除左一般文字訊息互傳功能，仲設有最新式既即時語音傳輸功能，配搭各種不表情符號及客製化圖像表情功能，令對話雙方可以利用不同手段展開爾虞我詐既心理戰。



好友系統方面更不設上限，只有你成功釣到一隻狗公，你就能把它永久保存係「通訊錄」之中，設有A ~ Z 字頭排序分類更令我方能快捷搜索己收服之狗公。




而當中的Group Chat (團體聊天)系統就是建立我們聯盟既關鍵，它確保我方透過單一平台就能同時廣泛傳送，接收各盟友戰況同狀態，而遇上等夠較高的狗公時亦能夠瞬速尋求各種戰術支援。



而我冇記錯既話，GC (Group Chat)系統上限為40人，從Mandy口中提到「三號房」黎推斷，意思就係…已經有超過80人以上參軍。



振奮–從沒感到如此熱血沸騰，就算要我抄寫100次家姐潮文亦難以壓抑心中澎湃既心情。





現在的我猶如坐擁千軍萬馬，割據一方既群雄，彈指之間，定能肅清所有狗公，拯救所有香港女性於水深火熱之中。



叮叮咚 ———！





「岩岩太多人搵我，sorry啊，我依加即刻加你入Group 3！^^” 」

Mandy既訊息將我從深邃既冥想中拉回到現實。



「咁我地係Group 3 再見啦，See you ！\(^^)/」

正當我為眼前依個性別不明既「高登會員」竟然能操一手5P MK妹愛用既表情符號感到訝異既時侯，突然一陣強光由我部手機傳出黎一一一



嗚哇！！！ 好燦眼啊！！！





暗戀Auntie，從來未覺得sony 反白黃mon係可以白到當電筒用咁！



嗚哇！！！



「叮叮～咚～！」又一陣清脆既WeChat訊息提示聲傳來。




「咦…依個係…?」