【小喬初嫁了】初戀女友結婚前的一場鴻門宴: 第三十八章

「咁你要問咩呀？」




冷清蕭瑟的街道，只有幾個行人，站在對面街的，大概是一對情侶，女的背著男的，神情嚴肅，應該在吵架。






「唔好嬲啦。唔好嬲啦。」男的在背後不斷哄著女的。




「走開呀，我唔聽！」






「下次唔會，我保證好無？」




「唔好，我唔聽呀！」女的還是掩著雙耳。






「我唔係有心架。」




「你繼續同其他女仔行街，跟住拋低我自已一個啦。」女的哭著說。




目睹這一幕，百感交集。






「我想問......如果當初決定唔同，今日嘅結果會唔會都唔同？」我幽幽道。




我等待著她的回答。




但她沒有回答。






只有冷風的聲音。




「對唔住呀，原諒我一次呀，我下次唔會架啦。」傳來對面街男生的聲音。




「唔好點我呀，我唔聽呀。」






張彩悠脫下外套，遞回給我。




「都已經過咗去啦，邊有如果。」




「妳仍然都係嬲？」






「唔係，我都話我已經無嬲。」




「咁係......？」


「有啲野，過咗就過咗，過咗就返唔到轉頭。」她望著那對情侶說。




「破裂咗，又點會咁容易修補到。」




「對唔住。」我說，這是真心的說話。




「我已經無野啦啵。」她笑說。




「我都仍然想講。」




「過咗去啦，記得到時嚟飲就得。」




「唔知架。」




「搞錯呀。」




「張彩悠。」




「嗯？」




「對唔住。」




「你做乜係咁同我講對唔住。」




「因為我知道，咁樣傷害你好深。」




她呆愣半秒，然後眼框逐漸冒起淚珠。




「我咪話咗......無事囉......」




「對唔住。」




「我唔明白，點解你要拋低我一個。」她打了我一拳，兩拳，三拳。




拳拳都往心裡擊打。




「我唔明白......」她慢慢地退後，我上前時，她立即說：「你唔好跟過嚟！」




就這樣，她逐漸消失在街道中。











「我無事。」是天下女人最大的謊話。