那一天，我再遇上了妳: 變節

到左聽朝六點幾我就起左生，都係唔見Kristy覆我電話

電話我就打左超過十次比佢

Whatsapp 仲多，我發左二十幾個Whatsapp 比佢

不過全部都係未Deliver...唔同佢Block 左我？

應該唔會ge...可能係佢琴晚早訓刪左電話



所以Deliver 唔到姐

而家都係唔好理呢D野先

沖個涼，我就準備翻工

到左七點幾，我就好似琴日咁叫左架Uber翻工

翻到公司差唔多八點



係窩又唔記得左其實我係同其他一樣翻八點半

係琴日第一日翻工，所以先早左

自己又唔記得，所以而家成層一個人都無

只係得我一個

我入到我個辦公室，擺低我個公司包



拉開個窗簾，由我個辦公室望出去

望住太陽由東方昇起ge景象

旭日初昇，我希望我下半年翻工又好翻學又好都可以好似呢個太陽咁

前景光明，前面的康莊大道

寬闊平坦的大路希望我可以有能力一一咁探索

當然我都希望我同阿永可以快D好翻

唉...雖然度度日出都係有太陽係由東方昇起

不過香港ge日出對我黎講係特別靚特別掛住



雖然我唔係離開左香港好耐

見到呢個日出，真係百感交集

就係咁，係呢個情境下，不知不覺

出面ge員工一個一個咁開始翻到公司

最後到左差唔多八點半，Crystal 都翻到

不過我真係有個問題想問下大家

究竟非執行董事要做D咩？



係唔係好似我老豆話咁，其實唔係日日都要翻工

如果係咁，李生做咩請我呢？

係窩，諗下諗下佢又真係無話過比幾多人工我窩

唔通我而家做緊義工？

正當我係到諗緊佢有無同我提過人工呢件事ge時候

我就見到檯面有張Notice

叫我十二點去六十樓同李生會面

呢張Notice應該係佢秘書比我



無啦啦李生做咩搵我呢？唔通我做錯野？不過我似黎到呢見公司咩都無做過

睇黎佢真係好得閒，可以同我傾計窩

你有找幸福的自由 我未夠他得天獨厚 我也想對我這塊鏡擲石頭...

我：「喂？」

Kristy：「王！亦！軒！你琴日去！左！邊！」

我：「......」

Kristy：「我地兩個唔係無秘密ge咩....」



我：「其實我琴日...係屋企訓著左」

Kristy：「真係咁樣？」

我：「係啊...」

Kristy：「你點解要講大話？你知唔知琴日我搵極你都搵唔到...我上左你屋企...你阿媽話你翻左工仲未翻..點解你連翻工都唔同我講？」

今次大禍，穿左煲添

仆街，啊媽翻到黎又無同我講過有個女仔上過黎搵我

不過我有唔係出去溝女，又唔係落老蘭

應該無事ge

我：「咁...我都係琴日都係翻第一日工...我想穩定D先同你講...」

Kristy：「你點解要講大話？」

痴媽肺啊，個頭先講完話穩定D先同你講

​你仲係問我點解要講大話

唔係個個都似你咁可以唔洗翻工

屋企可以供養到你死為止

不過我又點可以咁同佢講啦

算...呢個時候都係要扮死狗嘎啦

我：「我無啊」

Kristy：「你仲要唔記得左同我食飯...點解一翻黎香港你就要咁...」

痴撚線嘎，點解我一做錯小小野佢就會咁

可能而家先係真係見到Kristy 真面目

我個個女神，呢一刻已經唔見左

 我：「對唔住啊..我今晚同你食飯啊Kristy 好唔好？」

Kristy：「唔好」

 我：「唔好咁啦...Kristy 啊我都係第一次咁姐」

Kristy：「點解你要講大話？...」

呢下真係火都黎，點解講極佢仲都係咁要話我講大話

 我：「咁好啦，你覺得我講大話就講大話，我要翻工啦，係咁先」

之後我就開始慢慢咁聽到佢個邊聽到有喊聲  

不過我無理佢就收左線

好大力咁啪左張檯一下，之後Crystal 就敲門

Crystal ：「王生，我可唔可以入黎？」

 我：「做咩啊？」

Crystal ：「李生話十二點佢有D野做，叫你過十鐘上去」

 我：「好...我知道」

一單未完一單又起

Crystal ：「王生唔好怪我多事，頭先你同你女朋友鬧交？」

 我：「...你點知」

Crystal ：「頭先王生講得有D大聲，所以我係出面都聽到幾句...如果你想搵人傾，我介意你同李生傾完之後講比我聽...」

咩料啊，無啦啦做咩又對我咁好

明明琴日先整到你唔開心

不過我而家都無咁ge心情理佢

我入左廁所洗塊面

調節下自己ge心情，一定唔可以比李生見到我咁唔成熟ge一面

之後我就用我張員工卡搭升降機上六十樓