《廿一歲個年，我成為左隱世富豪》－大結局: 第九章：旅行
聖誕節已經臨近，但係公司越黎越忙，想去次旅行都無時間，何況我一次旅行都未去過，冬天既季節最適合同女朋友去旅行，可惜邊到有女朋友...
「Venus，起身啦。」我敲敲Venus道門，然後慢慢推門入去。
「咦？咁早既，仲諗住煮早餐比你食添，點知你仲早過我。」
「唔緊要啦，你都可以煮架嘛。」
「咁好啦，等你試下我手勢。」Venus蹦蹦跳跳咁落左去，睇黎琴晚訓得唔錯。
食完早餐，我地就返公司，每一日既生活都係咁，好似已經有啲悶，所以返到辦公室，我決定左要好好利用今個聖誕。
「去邊好呢？當我有七日...」
「做咩係到喃喃自語？」唔記得，Venus都係到。
「無啊，睇下今個聖誕去邊啫。」
「乜你仲得閒去旅行？十二月三十一號就係新款耳機發布既日子喎。」
「我知，我計劃緊係個日之前返到香港。」
「等我睇下。」
地圖上圈住左幾個地點，分別係英國，西班牙，法國同埋德國。
「點解，上面呢幾個地方都好似有啲共同點咁既？」
「唔...」
「乜你鍾意睇波架咩？」咦，係喎，其實我點解會揀呢幾個地方既呢？乜真係因為足球？
「我啊...少少啦。」
「見你想去個啲全部都係足球聖地，不過話你知啊，其實我都好鍾意睇波架。」
「真既？」點解Venus鍾意睇波我會咁興奮？唔通我以前真係一個鍾意足球既中學生。
我不斷思考，不斷思考，我諗起，係我十六歲個年，係我第一次睇波，個場係歐聯決賽，見到兩隊傳統球會巴塞隆拿對住皇家馬德里，結果係巴塞係九十分鐘絕殺皇馬，個陣時我咩都唔識，但係我卻為此歡呼，睇黎我同巴塞緣分未斷。
「我諗好啦，去西班牙啦。」
「咁快諗好？」
「係，聽日出發，十日後返。」十日後就係12月25號，我好重視呢個日子，所以我選擇係香港過。
「係呢，不如你同我一齊去啊。」
「下，我同你去？」
「係啊，既然係我秘書，我去到邊你就應該去到邊架啦。」
「我比你考慮下啦，今晚答我。」
我繼續係枱上圈圈畫畫，再上網睇下西班牙邊到好去，不過成個旅程最重要都係個場波。
一直望住個鹹蛋黃，隔住塊巨型玻璃睇日落係唔同啲，好似能夠同個鹹蛋黃平排，睇住佢慢慢落下，再加上一杯紅酒，根本就係完美，難得一日係公司係咁舒適，可能係因為聖誕既氣氛已經瀰漫到我身上。
「誠翔，我已經考慮好啦。」
「好，非常好，咁你既決定係咩？」
「我可以同你去，不過有一個條件。」
「你講。」
「就係要分房訓。」
「成交！」
我興奮到衝左埋去攬住Venus，雖然嚇親佢，但係佢亦無推開我，可能佢感受到同一份既喜樂。
「咁你快啲返去汁野啦。」
「咁早？未到放工時間喎。」
「唔緊要啦，我批准你。」
「但係...」
「你都未走。」
「係喎，我要車你翻屋企架喎，你隻腳仲未好返。」
「咁...一齊放工啦。」
「真既？」
「係啊，行啦。」
「小心啊。」
我扶住Venus慢慢行出去，落到去大堂，眾人既目光都注視住我地，我仲聽到有人係到亂作故事。
「你估副總係咪同佢個秘書一齊啊？」
「似係啦，上次佢仲動議佢秘書加入董事會添啊，仲唔係有野。」
「天鳴，聽日幫我處理個兩個人。」
「知道。」當然呢兩句說話無比Venus聽到，否則佢肯定又係到罵我，話我小氣，但係我應承左佢，唔會比佢受任何傷害。
「係呢，秋婷返左屋企未啊。」
「返左啦，係呢，不如你今晚去我屋企食飯啦，你黎緊呢十日都無得見秋婷，今晚咪見多佢一面囉。」
「都好啊，咁我汁完野打比你，記住揸架大啲架車黎喎。」
「知道啦，港女，使唔使帶十幾個喼去啊？」我恥笑佢，佢亦立即還擊一拳打落我手臂到。
「講笑咋，今晚見。」
返到屋企，都要同屋企人交代下去旅行呢件事，不過我屋企人都係得阿妹，個老豆我都唔當佢存在。
「阿妹，我聽日同Venus姐姐去旅行啊。」
「真架？去幾耐啊？」
「去十日，我地去西班牙玩，你一個人要小心啲啊。」
「下，咁我咪好耐無得見阿哥你同Venus姐姐囉。」
「阿哥知你鍾意收postcard，我會記得寄postcard比你架，放心啦。」
「咁就差唔多，嘻嘻。」
「不過，點解你會同Venus姐姐去既？你地兩個拍緊拖？」唉，最唔想被問既問題始終要出現...
「叮叮叮...叮叮叮...」呼...救星到，睇黎我要去接Venus。
「阿妹，我而家去接Venus，你繼續煮野啦，我地好快到。」
「哦，好啦。」避得一次，避唔到第二次，睇黎要解決一下呢個問題。
揸到去寶馬山，即係Venus住既地方，見到佢傻更更咁企係到，不過見到我架車又不禁雀躍起黎。
「上車啦，我幫你搬。」
「唔該。」
Venus的確係一個好女仔，去十日旅行都只係帶兩個喼，對一個女仔黎講，都算係正常。
成程車，我打開個窗，比訓緊教既Venus吹下風，費事焗住佢，不過，一啲都唔凍既冬天的確令人感到不安，咁快既車速，開埋窗，都只係得少少既涼風吹過。
「到啦，Venus。」
「嗯？咁快既？」
「梗係啦，你成程車都訓著左。」我唔會忘記頭先既情景，Venus一隻翹住我隻手，更加挨係我膊頭上，好彩無比警察見到，同埋我架車有自動駕駛，先唔會造成危險。
「阿妹！」屋企大門打開，Venus見到秋婷就即刻衝埋去，真係唔明點解佢地兩個既感情會咁好。
「發叔，蓮姐，幫手搬啲行李上去。」
「你聽日係咪同阿哥佢去旅行啊？」
「係啊，我會好掛住你架。」
「真既？我都係啊。」未去就掛住，呢兩個人真係得意。
「好啦，今晚大家慢慢傾啦，食飯先啦。」
「你今晚係到訓咩？」
「我...」Venus望住我，我亦比左個肯定既微笑佢。
「係啊，係到訓啊，而且同你孖鋪添。」
「好啊！好啊！可以同Venus姐姐訓，我實攬住你。」
哈，秋婷雖然中六，但係心智就好似小六咁，智商高，但係童真卻無敵...