[旅行鬼故事系列] [陳生返黎啦] 澳門旅遊之陰魂不散的傳教士: （二）
（二）
出發前的一天，天賜跟我打了一通電話。
「喂！死仔，聽朝八點鐘係上環順德中心，唔好遲到呀！」
「得啦得啦！都唔知你地買咁鬼早船飛做咩，去到又無得提早Check In！」
「仲好講，如果唔係你遲左約阿奶！搞到我地一係就八半出發，一係就下晝出發！我地駛咁早出去！總之你唔好遲到呀，D船飛係阿詩度，你遲左我地就唔會等你，到時你自己買船飛黎啦！」
「哇，識左咁耐你講D咁嘅野？不如咁啦，你兩公婆聽日輪流打黎，確保我醒左得唔得先？」
「睬你都傻！自己校鬧鐘啦！呀，仲有，老豆打左俾我！」
「佢打俾你？講左D咩呀？」
「都係叫我地小心D，同埋叫我提你，帶定D符咒係身者！」
「吓？唔係卦，去澳門三日兩夜者，咁都要帶符？陣間D海關屎忽痕，要搜我地D行李，拎晒D符出黎咪好白痴！」
「佢話你呢次澳門實會撞鬼架，唔帶你蝕底Ja！」
「咁……咁……」
說真的，我實在不想帶那些奇怪的道具到澳門去。
第一：我真的害怕，海關會把那些東西都搜出來，即使最終放我通行，我想也丟臉丟到盡了巴！
第二：阿奶其實還不知道我的身份，如果隨身帶著這些奇怪的工具，不嚇怕她才怪！
第三：自從十不思議事件後，我已經充份的跟天命叔學了更多的道術，而且靈力也增強了不少！即使不依賴那些道具，一般的靈體應該也不能對付我吧！
所以，我還真的不太想帶著那些道具！
但，那個大叔的說話，永遠都是「好嘅唔靈醜嘅靈」，應該怎樣做才好呢？
「點呀，死仔包！係咪驚阿奶發現原來你成日撞鬼，又走去學道，會嚇親佢呀？」
天賜真不愧是我的知己，甚麼也不能暪過他！
「係呀！你知啦，我同阿奶拍左拖三個月，都無機會同佢講！而且我同佢好似好朋友多過似男女朋友，我驚真係會嚇親佢呀！仲有，你知你老豆架啦，衰嘅野次次都開口中嘅！」
「估到你啦，我一早幫你諗左啦！始終呢個時間係中元節，我一早已經問老豆拎左D符，阿詩已經將D符整做手繩咁啦，聽日佢會派俾大家戴住，以保安全！」
「你兩公婆真係勁，咁者係搞掂啦？我唔駛拎到成身法器咁樣過去啦！」
「咁又唔係喎，條手繩淨係可以保護到佢地避免D普通靈體騷擾！你呢D陰魂體質，再黎多一兩個王大一嘅靈體，條手繩一定頂唔住架喎！到時你無帶D符咒，有事我地幫唔到你架，我同阿詩一定會走先！」
「哇，咁仆街架你！不過你同我定啦，今天的我已經唔係昨天的我啦！我已經學識左一招秘密武器，到時保護晒你地都仲得！而且，我又偷偷地拎左你老豆張『九字護身符』，有佢嘅靈力加持，我就唔信咁都有事！」
「咁你鍾意啦，到時有事唔好求救呀！仲有，聽日八點鐘，唔好遲到呀！」
「得啦，等你兩公婆電話叫醒我啦！」
就這樣，我收拾好換洗衣物後，便倒頭大睡了！
然後，隔天早上，我當然不負眾望，真的遲到了！
來到信德中心時，已是八時三十分有多！
「搞錯呀，幾點呀依家？」阿奶怒火中燒的看著我，仿佛要把我吞掉似的！
「我……我都唔想架，我今朝起身果陣先發現個袋爛左，跟住件衫又唔知做乜污糟左喎！仲有呀……」我拼命解釋，但腦子卻再也找不到理由了。
「哈哈！唔駛解釋啦，你搞到阿奶要請我地食早餐啦！YEAH！」雷少在一旁歡呼著。
「吓？咩呀？唔係八點半船咩？咩早餐呀？阿奶你唔係嬲我趕唔到班船咩？」我一頭霧水。
「傻仔，天賜一早同我地講左，就算佢叫醒你，你九成都會遲到！所以我地先將個集合時間提早左個半鐘！跟住阿奶話你唔會遲到，仲話同我地輸賭！除左阿奶，所有人都賭你遲到，所以佢要請晒我地食早餐啦！」
雷少解釋給我聽時，阿奶已在一旁惡狠狠的看著我。
「最衰都係你！我唔理呀，早餐錢你俾呀！」阿奶跺著腳說。
「唔好嬲啦，我俾我俾，食咩我都俾啦好無！大家行啦，我請客！」
為了緩和阿奶的怒氣，我選擇轉移視線，快點把早餐買回來，讓大家忘記了我遲到的事實！
來到餐廳後，果然在食物的誘惑下，阿奶很快便息怒了，總算是平息了一場風波！
還好平常在幫天命叔的時候，還是有點小收入，要不然六人份的早餐，我真的會感到肉痛啊！
不過，比起早餐錢，還好天賜他們夠了解我，要不然我要再出六人份的船票錢，我真的會哭啊！
就在臨登船前，阿詩拿了數條手繩出來。
「大家過黎呀，其實上個月我同屋企人去左旅行，見到有D手繩幾靚，就買左返黎俾大家做禮物啦！呢度有6條手繩，阿奶、冰冰，你地過黎揀先啦！紫色應該幾襯你同子鋒！冰冰同雷少要用色啦好無？好，咁就搞掂啦，我地呢幾日就帶住呢條手繩，如果我地發現左邊個無戴，又或者唔見左嘅，就要請食飯好無！」
大家附和並戴上手繩後，我用感激的眼神，向阿詩示意感謝！
然後，我們就這樣登上了船上！
由於我們有六人，我們被安排了坐在前後兩行上！
前面是阿奶、冰冰和阿詩；後面則是天賜、雷少和我！
我原本還妄想著，能在乘船期間跟阿奶增進感情的，看來是沒有這樣的機會了！
俗話說得對「三個女人一個墟」，坐在前排的三位女士，由上船開始便一直聊天至下船，完全沒有我們搭話的空間！
我們三個男人看到這狀況，也識趣的坐在後排聊天便算！
「天賜呀，你有無發現，呢架船上面，都真係幾多……『好朋友』呀？」
為了不被阿奶發現我能看見靈體，我和他們早已商議，真要看到靈體時，務必用「好朋友」或「那東西」來稱呼，就算真的被阿奶無意聽到我們說話，也能隨便編些理由糊弄過去！
「我有發現呀，頭先係碼頭果陣，我已經見到有好多『好朋友』行黎行去！而且，有D仲上埋船添！」天賜一臉淡定的說著。
「吓？唔係卦？果D『好朋友』又係跟住子鋒你而黎架？」雷少問。
「咩叫又跟住我呀？唔係下下有『好朋友』都關我事架喎！」我指出雷少旳錯誤。
「算罷啦你，你就好似金田一，去到邊都會引發殺人事件一樣！你去到邊都會有『好朋友』跟出跟入架啦！」雷少這樣對我說，我確實也沒有辨法反駁。
「不過，唔知你有無留意，呢架船除左『好朋友』，仲有D奇怪野係度！」天賜看著我，然後眼睛稍為向右斜視，我下意識的瞧那個方向看去。
「奇怪野？係喎……的確……有D奇怪！係咪你老豆D同行，定係……」
「唔知道，不過呢架船雖然有好多奇怪野，但暫時都感覺唔到咩惡意，應該唔駛擔心嘅！不過好耐無試過感覺到咁多奇怪野啦，我抖下先！」天賜說完後，便悠然的閉上眼睛。
「吓？唔係有D咩事呀？」雷少看我們在討論著些奇怪的東西，不安的看著我。
「無事！不過係有好多有道行嘅……事物存在者！」我也不知道應怎樣稱呼這些東西，只是，應該正如天賜所說，他們都是沒有惡意的！
「哦，咁得啦！唔好嚇我呀！哈欠，我都有D攰，抖下先！」
雷少也接著閉上眼睛，只有我仍在觀察著四周的狀況！
我注意到在我們後方，靠右邊的位置，有一個特別引人注目的存在！
那大慨是一個外國人或是混血兒吧，從他那雙分別混有紅色和綠色的眼睛來看，感覺到一股特的力量！
不知道他是否察覺到我在偷看他，他把臉轉過來望向我，然後對我熱情的笑了一下！
我一下子不知道怎麼回應，只好馬上坐了下來！
但這一下卻弄醒了天賜！
「咩事呀？」天賜張開雙眼看著我。
「我見到有個外國人定混血兒嘅物體，對住我笑！雖然佢應該唔係咩『好朋友』，但我感覺到佢嘅力量……非常特別！」
「呢個世界咁多奇人異士，唔係有惡意嘅就得啦！你都抖下啦，仲有半個鐘左右落船架啦！」天賜再次閉上眼睛。
其實天賜說得也對，這世上有這麼多奇人異士，只要沒有甚麼惡意便算了！
而且，長期感應著大量「好朋友」和奇怪的力量，我也感到有點吃不消，看來我還是稍為休息一下好了！
希望可以安全到埗，到達後也不要發生甚麼怪事就好了！