[旅行鬼故事系列] [陳生返黎啦] 澳門旅遊之陰魂不散的傳教士: （五）
腳步聲愈來愈接近我們，我屏息靜氣的等待著，手上早已運起劍指準備揮出！
只見有一個高大的人踏進教堂內，我感覺不到任何邪惡的氣息，但卻感到這個人擁有某種不同於我的力量！
「咦？後生仔，係你？」那人看著我，露出驚訝的神情。
我也感到非常驚訝，那雙分別帶有紅色和綠色的眼睛，使我輕易認出這個人來，這個人正是我在船上見過的混血男人！
「係你？你係咩人，點解會入到黎！」我警戒的抱起阿奶遠離他，雖然他不像有惡意，但他的力量實在有點嚇人！
「哈哈，唔駛咁驚，我叫拉斐爾！叫我阿爾得架啦！你.…..可以當我係神職人員！估唔到，你可以收拾到墮落嘅聖職者呀！」他看著地上的血水說。
「你未答我，點解你會入到黎？」我依舊不敢放鬆。
「唔駛咁緊張，我唔係壞人，唔會對你做D咩！只係感受到呢度有D奇怪，所以先入黎望一望！相信你都發現左，呢度係結界黎，個入口就係教堂嘅大門！但當然，無關者係唔會入到黎！」阿爾站在門口的位置對我說。
「無關者？你仲唔係佢地嘅同伴！」我聽完後退得更遠，手上立刻結印，對阿爾使用「定身咒」，阻止他接近我們。
「咦？呢種力量……咁有趣嘅？不過，對我無用！」只見阿爾身上發出紅和綠兩種光芒後，我的定身咒便被抵消了！
「可惡！第一日就搞D咁嘅野！阿奶，你放心，我會保護你！」我放下昏迷中的阿奶，準備再對付阿爾！
「你冷靜D先，我真係唔係敵人，頭先我可能講錯野，人類嘅語言真係好麻煩！我話無關者嘅意思，指嘅係，我係呢D墮落聖職者嘅敵人！再簡單D講，我原本係黎對付佢地，只係你咁啱入左黎呢度，仲要消滅埋佢地者！」阿爾高舉雙手，表現出他對我們是沒有敵意的！
「你……真係唔係敵人？」我守在阿奶前方。
「你放心，我真係唔係敵人，我仲可以帶你地離開呢度！」
「真係可以離開呢度，我搵左好耐都唔見有出口！」我驚訝的問。
「無錯，因為呢個結界無出口，只有強行破壞佢！」阿爾身體再次發出刺眼的光芒，他大慨準備破壞這結界吧！
「等陣，我仲想問你一個問題！你話無關者入唔到黎，點解我同阿奶會黎左呢度！同埋點解阿奶會變左佢地嘅目標？」
「你入到黎，係因為你有特別嘅力量，而你又不斷係個女仔身邊，所以無辨法下，先會令你入埋黎呢個空間！至於佢……」從強光中，我隱約看見阿爾盯著阿奶，眼神流露出一絲可惜的感覺！
「阿奶佢點呀？」我追問。
「我只能夠提醒佢，要時刻保持信仰嘅心！既然佢選擇相信，就唔好懷疑，如果唔係，會俾佢地有機可乘！畢竟澳門呢度……比較危險！」說完後，光芒照遍整個教堂，所到之處都回復本來的面貌！
「返……返到黎啦！」我四處張望，卻發現阿爾已經不見了！
「子鋒……我……我點解訓左係度嘅？」阿奶亦清醒過來，看來完全不知道剛才發生的事。
「哦！你頭先行行下話覺得有D頭暈，跟住真係暈左，我就扶你入黎休息囉！你無事啦嘛？飲啖水先啦！」阿奶喝了點水後，看似精神了點。
「我無事啦，依家仲好精神！唔該你照顧我呀！」有點虛弱的阿奶比平時要來得溫婉，我的心跳不期然的加速了。
「子鋒，阿奶？你地仲係度嘅？」媽的，難得的氣氛又被雷少破壞了。
「無呀，岩岩阿奶有D唔舒服，我咪同佢係度休息一陣囉！」
「吓？阿奶你無事呀嘛？我有D藥係身喎，你駛唔駛睇下邊D岩用？」冰冰拿出一個像是藥袋的東西。
「唔駛啦，抖左陣無事啦！我地繼續行啦！」阿奶站了起來，看起來的確像沒有事了！
「真係唔駛抖下？」阿詩問。
「唔駛啦，我依家好精神，出去影相啦！」阿奶拉著冰冰和阿詩步出了教堂，餘下我們三個大男人在裏面。
「喂，我地都出去啦！」雷少也跟著出去，餘下天賜凝視著我。
「係咪出左咩事？」天賜用不太確定的語氣問我。
「係……不過今晚先講，我諗應該無事嘅！」說完後，我們也離開了教堂。
我們一行六人，拍好照後，便準備離開了。
在臨離開前，阿奶在教堂前再次閉眼，雙手合十地祈禱！
只見她祈禱後打開雙眼，眼中像帶著一點淚光，果然，在她身上，應該曾發生過甚麼事吧！
我沒有去詢問，只是在她身旁陪著她，並肩離開這個地方。
遠離教堂後，阿奶又變回平常的樣子。
「Yo，下一站去邊度呀？」她纏著阿詩，要她趕快拿出行程。
「其實，原本諗住落埋去路環同黑沙海灘嘅，不過依家都成兩點幾！阿奶你又唔係好舒服，不如依家返酒店Check in先啦？」阿詩這樣提議。
「吓？真係唔駛喎！我好精神，仲可以打贏子鋒添呀！」阿奶的拳頭馬上擊中我的肚子，她真的打倒我了！
「唔好啦，如果去埋果邊，返到酒店Check in就好晏，到時D房可能無咁靚，你都想今晚住得舒服D架嘛？」阿詩說。
「吓……我想去路環食葡撻喎……」阿奶嘟起小嘴說。
「酒店附近都有一間好出名嘅葡撻架，我陣間同你去食啦！」我從被擊倒的狀態站了起來，安慰她說。
「係啦，揹住晒D袋都好重，我地返酒店放低野先啦！」冰冰也附和說。
最後，我們在吃過豬扒包後，便乘車去到葡京酒店！
一路上我都在觀察阿奶，怕她受到那些邪靈的影響，幸好沒有發現有甚麼不妥！
來到葡京酒店，雖然感覺有點殘舊，而且看起來人流也非常複雜！
但畢竟這是天賜選擇的，大慨有甚麼原因吧！
在酒店大堂等了一會兒後，我們拿了房門匙，便來到住宿的樓層！
我們來到房間前，居然有一間是尾房！
我和天賜都呆了一呆，互相對望了一眼。
「喂，你兩個發咩呆呀？仲唔入去？」阿奶說。
「無……無野呀！我地三個男嘅就住最尾呢間啦，你地住隔離呢間好無？」我立時提議。
「哦，是旦啦！咁俾張房卡我啦！」阿奶說完後，伸出右手想拿房卡。
「好，嗱，俾你啦！」我在拿房卡的時候，偷偷的替她們敲了敲門，在心中說了聲「打擾了」，才把房卡交到阿奶手中。
接過房卡後，她們便進入房間中！
我也正準備打開門，卻聽到她們房內傳出尖叫聲！
不會是有甚麼事吧？