[旅行鬼故事系列] [陳生返黎啦] 澳門旅遊之陰魂不散的傳教士: 彩蛋四：子鋒與天命叔 － 澳門之後（下）
「老豆，搞咩呀？點解子鋒會咁？你係咪一早知道D咩？」天賜按著被綁著的我，使我不能亂動！
「係！我頭先講咗大話！之前我話有個熟人嚟搵我，果個人其實就係拉斐爾！佢話咗俾我知子鋒體內有一隻怪物存在！佢同我講，果隻怪物會借子鋒身體復活，但暫時無任何方法可以阻止做呢件事發生！佢講俾我知，只係想同我講定聲，等我有個心理準備！又或者，佢係想借我嘅手，去驅除子鋒體內嘅怪物！」天命叔也在一旁按著我。
「師伯！咁你今次嘅目的係咩呀？點解子鋒會變到咁架？」炎冰緊張的說。
「我嘅目的就係要試下將子鋒體內嘅怪物逼出嚟！我問咗拉斐爾，佢話當年張衡的確幫張角起過兩個命盤！當第二個命盤出現嘅時候，張角體內湧出咗一團黑氣，後來張衡好辛苦咁將果團黑氣清除！而當時並無完全清除，導致張角日後被黑氣侵佔咗身體，但由於黑氣被削弱了，張角對某樣事物發起挑戰不敵後就死咗啦！」
「老豆！你者係話子鋒體內嘅怪物，就係同當年張角果隻一樣！」天賜說。
「唔只一樣！我相信佢嘅力量已經更強，加上子鋒長時間嘅修練，靈力方面嘅強大，假如同黑氣融合，我都唔敢想像佢嘅力量有幾大！」
突然，被他們按著的我，突然停止了掙扎，安靜的垂下頭了！
「發……發生咩事？」天賜仍然緊按著子鋒，不解地問。
「炎冰，天賜，即刻過返嚟！」天命叔對兩人大喊！
雖然兩人察覺到異樣後，已經準備退開，但天賜身處的位置較難移動，下一秒，天賜已撞上大門的位置了！
原本還被綁著的我，黑氣從我體內不斷溢出，不旦掙脫了繩子，還把天賜吹飛到大門上！
被黑氣籠罩的我，更慢慢的飄到半空之中！
炎冰則襯著空檔，跑到大門，把天賜拉回天命叔身邊！
「你終於出現啦，魔鬼！」天命叔看著眼前的我，絲毫不敢大意！
「哼！張天命！點解你地派別嘅人，係都要三番四次咁阻住我！張衡、張回、張善……每次我出現喺亞洲，總會遇上你地教派嘅人！你地點解要同我過唔去！」一把詭異的聲音從黑氣中傳出。
「原來.…..除咗張衡，我地教派仲曾經同你有咁多牙齒印！我同子鋒嘅相遇，睇嚟就係為咗對付你！嚟啦，今日我就要以張道陵第六十五代弟子身份，將你消滅！」天命叔右手拿起桃木劍，左手拿著天師令旗，感覺好不威風！
「哼！就憑你？當年你嘅祖師爺張繼宗俾我打傷之後就無再遇過你地呢一派嘅人！你以為憑你嘅力量可以對付到我咩？可笑！」黑氣猛然襲向三人，天命叔把令旗插在地上，一陣明亮的光芒把黑氣攔截了！
「難怪我地教派同你交手數次，都無留低任何資料！睇嚟係張繼宗俾你打傷之後，就將有關你嘅資料都毁滅，避免再同你有接觸！不過，命運要你遇到我，我就係嚟消滅你嘅！」天命叔手隨心動，桃木劍連同符咒，變成一道火焰向黑氣射去，本以為黑氣會被火焰就此貫穿，卻想不到火焰劍堅持了一會後，便被黑氣攔截，整把桃木劍更化為灰燼！
這一回合的交手，看似平分秋息，但從天命叔額上滴下的汗水，似乎在暗示，不利的是天命叔這一方！
「唔錯嘅靈力！如果係幾日前嘅我，你都仲可以應付！但喺澳門同路西法交手之後，我嘅力量回復得好快！經過埋今次，睇嚟我唔駛等夠十年，呢個細路嘅身體就會屬於我！為咗多謝你加快回復我嘅力量，我就快手殺晒你地啦！放心，唔會有痛苦架，係恐怖D者！哇哈哈哈哈！」黑氣再次襲三人，令旗產生的光牆，這次再也阻擋不了黑氣！
「可惡！你地自己小心！」眼見黑氣突破光牆，天命叔不再留手，把早已設置好的結界啟動！
這個結界在對付擁有強大力量的靈體時，可用於削弱它們的靈力，在對付紅衣女鬼時，天命叔也曾大範圍的佈下此結界！
在靈減弱的情況下，天賜和炎冰勉強能應付黑氣的襲擊，這也使天命叔放下心來！
然後，黑氣感到力量發揮不如之前，便索性把放出的黑氣收回，誓要一下子破壞這裏的結界！
「想破我結界？諗都唔駛諗！」天命叔當然不會放過此等良機，在道壇拿了一把新的桃木劍，以及大量符咒，準備對黑氣來過致命一擊！
正當天命叔打算作出致命一擊時，原來黑氣剛才只是裝作破壞結界，目的就是要讓天命叔露出破綻！
黑氣馬上纏繞到天命叔腳上，打算逐步蠶食他的力量！
幸好天命叔馬上把帶有符咒的桃木劍，狠狠插在自己的腿上，雖然這樣使天命叔受傷，但也確實的傷害到黑氣了！
「死道士，估唔到你會自殘！不過遊戲要結束啦，只要我返入呢個細路體內，你就奈我唔何！我會老老實實等到第十年，到果陣，我會將個細路，將你，將全部嘢都消滅！」黑氣一下子回到我的身上，眼看快要消失不見了！
「咁快諗住走？陪多我一陣啦，天賜，郁手！」天命叔用虛弱的身體使出縛神咒，減慢了黑氣回歸我體內的速度！
然後，天賜則拿起一塊殘舊的布，把我緊緊的圍著！
在那塊布碰到黑氣的時候，一些詭異的悲鳴，在道壇內不斷迴嚮著！
隔了一會，道壇內徹底安靜了！
「係......係咪搞掂啦？」天賜緊緊抱著被包裹著的我。
「唔......唔係！失敗咗！佢入返子鋒體內啦！」天命叔搖了搖頭，嘆了口氣的說。
「師伯，你無事呀嘛？你流緊血呀！」炎冰來到天命叔身旁照顧他。
「我無事！嚟，扶我到子鋒身邊！」天命叔在炎冰的攙扶下，來到子鋒身邊！
只見天命叔低頭看著我，臉上流露出複雜的表情！
「點呀，拉斐爾！今次你嚟搵我係咩事？」
「我只係你話你知，你徒弟身上發生咗一D變化！就係佢體內有一隻怪物......」
拉斐爾把他所能提供的資訊，連同一塊舊布交給天命叔！
「記住，你一定要今佢受到一定嘅傷害，之後先可以用呢塊裹屍布將果隻怪物驅趕出嚟並囚禁住！如果你失敗咗，到時你就要落一個決定.......」
天命叔回憶起這段說話，忽然像下定了決心似的，突然拿起了桃木劍，向我的頭部刺去！
「老豆，你做咩呀？唔......」天賜還來不及反應，桃木劍已經刺下，只是劍身落下在我的臉傍！
剛剛從失去意識中清醒過來的我，被這一劍嚇得破口大罵、粗口橫飛！
「搞咩呀大叔？一起身就見你插把劍埋嚟，係咪想整死我呀？話時話，個道壇做咩咁亂？係咪發生咗咩事？」我毫無頭緒地問。
然後，經過了一輪的擾攘和解釋後，我總算了解到在自己身上發生了甚麼事情！
「原來係咁，唔怪得我硬係有D嘢記唔到啦，原來就係有隻咁嘅嘢係我身入面！所以......天命叔，你收佢唔到，所以你就想殺我？」我轉過頭來看著天命叔！
「呢個係拉斐爾講嘅，如果無辨法收拾黑影，到時殺咗你就可以阻止佢復活！咁樣對世界會係一件好事......不過，我又點會落到手！」天命叔嘆了口氣說。
屋內變得沉默，我的心情也一下子變得陰沉起來，難道我真的非得以死來保天下嗎？
我可不是甚麼歷史偉人啊，要是我死了，應該也只會被新聞以一格的形式報導吧！
我不會接受這樣死掉的！
「老豆，唔通真係無辨法解決呢件事？」天賜最先回過神來。
天命叔想了一會後，便瞪大雙眼說！
「有！我仲諗到一個方法！不過可唔可行就好難講！」
「屌！原來仲有方法嘅，唔好嚇我呀嘛！可唔可行呢D嘢之後再算啦，依家最緊要試咗先！如果唔得咪再諗囉，唔好殺我就得架啦！」我總算鬆了口氣。
「嗱，你自己講架！咁我郁手啦！」天命叔走到道壇，拿了數支銀針跟符咒，走到我身邊來！
「咪住先，郁手還郁手，你起碼都話我知你搞咩呀！有無副作用呀之類，你唔好諗住一嘢就拎D針拮埋嚟呀，我嗌......」我還來不及把話說完，天命叔已把數支銀針，多方位的插在我的身上！
「我我我我我屌！！！！！！」被突如奇來的銀針刺中，那種感覺可不是說笑的！
天命叔不理會我的叫喊，只是在一旁拿起符咒在唸著甚麼！
「好啦！搞掂啦！」天命叔把銀針從我身上拔出，從開始到結尾都不超過十秒鐘，他到底對我做了些甚麼？
「好囉喎，你究竟搞過D咩嚟？成日都失驚無神整D古怪嘢！咦......奇怪......點解會咁......」終於，我察覺到身體出現了一種異變！
「你感受到啦？無錯，我將你嘅力量封印咗！之後你唔會再用到你嘅靈力，可以做返一個普通高考生啦！呢個唔係你一開始成日同我講嘅願望咩？」天命叔把銀針收好，看著我說。
「咩......咩話？普通人？」原來剛剛有種被甚麼抽乾了力量的感覺是真的，我的力量被他封印了！
「無錯！如果我無估錯，一直以嚟，你遇到嘅所有怪事，都係為咗令你身體成長，成為適合怪物重生的容器！所以，我將你嘅力量封印，等你無辨法繼續成長，咁......你先有機會避過俾佢侵蝕嘅影響！不過，代價就係，你無晒一直以嚟嘅力量！」天命叔嚴肅地對我說。’
「但......但係我陰運未行完架喎？咁我會唔會俾鬼搞架？」
「俾鬼搞都好過死啦係咪？總之，你就即管過住呢無力量嘅生活先啦！真係遇到咩怪事，就叫我幫你搞啦！」天命叔說。
不是吧？
我竟然會就此失去了所有靈力？
讀者也會因此不滿吧！
我要投訴，我要抗議，我一定要把我的靈力拿回來！
完
接下來，請期待下一個故事，無能（力）的子鋒回歸校園，等待他的，究竟是些甚麼怪事呢？