「曉琳係咪有少少唔妥呀?」雪彤問。

「我都覺......但又講唔出邊到唔妥。」我説。

唔理咁多啦,唔同果個唔係曉琳咩。

「叮」

我攞出手機,曉琳whatsapp我。



曉琳:聽日一齊返學丫,八點鐘照舊喺你屋企門口等XD

我:ok

曉琳:(*>_<*)ノ❤(ӦvӦ。)

我甜笑,呢個冇可能唔係曉琳。

早啲瞓教,費事聽日遲到啦!



「你係俾我地選中嘅人......」一把莊嚴嘅聲音響起。

「你......你係邊個?」我問。

佢冇理我,繼續自説自話。

「好好保護雪月,唔好俾雪月流入佢地手中。」佢説。

「邊個係雪月,邊個係佢地?」我追問。



佢大笑。

「去到適當嘅時候,你就會知道。」佢説。

夢,就此完結。

雖然只係夢,但係我覺得好真實。

「叮噹」門鈴響起。

咦?曉琳咁早嚟咗?

我望一望個鐘,而家八點零三分。

shit! 遲咗起身,今次仆街。



打開屋門,見到曉琳一臉不耐煩咁企喺門口。

「乜你咁遲㗎!你仲要着住睡衣?快啲換衫啦!」曉琳説。

「係,即刻換!」我説。

我用咗五分鐘換衫褲同埋食早餐,然後即刻衝出問口。

「我地行.......」我望住空無一人嘅門口説。

曉琳......唔見咗?

打個電話問下佢喺邊先。



「你所撥打嘅電話暫時未能接通。」曉琳部手機唔通。

可能佢返咗學校先呢。

但係,點解佢唔等埋我......

可能佢驚遲到呢。

我跑返學校,好彩冇遲到啫。

入到班房,我見到曉琳俾成班男仔圍住,而曉琳同佢地有講有笑,時不時有親密嘅接觸。

曉琳見到我返咗嚟,即刻對班男仔不理不睬。

班男仔亦都陸續散去,有幾個人經過我身邊果陣對我奸笑。



我握緊拳頭,盡量平伏心情。

「返嚟啦?」曉琳説。

「嗯。」我説。

「下次我唔該你早啲起身啦!」曉琳説。

「知道啦。」我説。

曉琳平時唔係唔同班男仔傾計㗎咩?

就算佢嬲我都唔洗咁樣報復掛......



今日我同曉琳異常地冇乜點傾計。

一打放學鐘,曉琳直接走人,完全冇等埋我一齊返屋企嘅意思。

「章魚,你覺唔覺得曉琳好似怪怪地呀?佢就好似」我説。

「變咗第二個人丫嘛!」張瑜打斷了我的説話。

「你都覺得呀?」我問。

「正常曉琳唔會同除咗你之外嘅男仔講野嘅,但係今日佢同班男仔有講有笑,我好似見到佢同一個男仔手掂手。」張瑜説。

我握實拳頭,講唔到野。

張瑜冇發現到我嘅異樣,繼續講:「小息果陣,我居然聽到佢講粗口添。」

「冇可能!曉琳不嬲都好憎人講粗口㗎!」我説。

「所以咪話佢唔同咗囉.......」張瑜無奈地説。

冇理由㗎......

「佢最近係咪受過啲乜野打擊呀?」張瑜問。

「冇呀......」我説。

「咁佢又幾時變得唔妥呀?」張瑜問。

「好似係......我同佢表白之後果日。」我説。

張瑜低頭沉思。

「嗯......會唔會......曉琳俾人掉包?」張瑜説。

「唔會掛......如果係咁,佢地嘅身高、聲線、樣貌都一模一樣。」我説。

「呢個世界巧合嘅事有太多。你都知道,曉琳呀爸好憎窮人。而你呢個窮人,同緊佢個女拍拖。」張瑜説。

咁......唔通.......

唔會㗎!

我不停搖頭。

「喂!你冇野丫嘛?」張瑜制止我。

「多謝你嘅意見,但係我始終都唔敢相信曉琳俾人掉包。」我説。

我攞起書包,準備返屋企。

「好好睇住曉琳呀!」張瑜説。

我笑咗一下,然後就返咗屋企。

「返嚟啦?」雪彤説。

「嗯。」我説。

我沒精打彩咁返入房,打幾場LOL希望可以抒壓。

點知越打越躁,扒上張床瞓教算。

「叮」

邊個whatsapp我呀......

曉琳:我地分手啦

我呆呆地睇住呢條訊息,手機從我手中滑落。

曉琳......要同我分手?

我:點解?

曉琳:由你今日遲到開始,我就知道我地玩完。

曉琳:仲有,你呢個死窮撚,有乜野資格同我拍拖呀?

曉琳:我聽日會俾返月之戒你。

我放低部手機,成個人呆哂。

佢真係同咗我分手?

佢真係同咗我分手。

「呀!」我大叫。

「咩事呀?」雪彤打開房門問。

我冇理到佢,直接衝出屋企。

「喂!浩雪!你去邊呀?」雪彤在屋裏大喊。

我一直跑,跑到去麥當勞。

「咕......」

唔記得自己仲未食晚餐添。

又唔想返屋企,唉......

「唯有喺到買個餐啦。」我望住銀包入面果三十蚊自言自語。

「喂細路!」身後一道聲音響起。

我轉身一看,講野嘅係一個着住我地學校校服嘅男仔。

「你係咪林浩雪呀?」佢問。

我沉默不語。

「問你野呀仆街!」佢大吼。

「係又點?唔係又點?」我説。

「受人錢財替人消災,有人叫我打獲你。」佢説。

屌,冇端端又激嬲邊個呀......

我四處張望,睇下有冇逃跑嘅路綫。

就果道啦!

我即刻跑去果個方向。

但係個男仔發現咗我嘅計劃,即刻跟咗過嚟。

「喂,過嚟呢邊!」前面有個同樣着住我地學校校服嘅男仔説。

我不加思索,跑咗去佢果邊。

「嗄.......嗄.......」我喘氣。

追我果個男仔見揾唔到我,好快就走咗。

「你冇事丫嘛?」救我果個男仔問。

「冇事,你叫咩名呀?」我問。

「我叫方野吉,3D班。」方野吉笑説。

「林浩雪,3A班。」我説。

「係呢,你做乜被人追呀?」方野吉問。

「我自己都唔知,條友冇端端走過嚟話要打我。」我説。

「嗯,咁我走先啦,遲啲學校見啦。」方野吉説。

「等陣!」我叫停了他。

「嗯?」方野吉説。

「雖然好唐突,但係可唔可以俾我嚟你屋企瞓一晚?」我説。

「反正我屋企冇人,你咪嚟囉。」方野吉説。

行去佢屋企嘅途中,我一直唸緊邊個想要打我。

就算平時我得罪人,我都未試過俾人追打。

唔通係啲鐘意曉琳嘅人?

我苦笑,我同曉琳都分咗手啦。

「到咗啦!」方野吉打斷咗我嘅思考。

佢帶咗我去一棟大廈面前。

「你唔係想同我講成棟大廈都係你住掛?」我説。

「你都on9嘅,邊有可能!」方野吉説。

「咁你又話到咗......」我無奈地説。

佢帶咗我上去其中一個單位。

佢間屋唔細,有四百尺。

「唔洗眼定定咁望住我間屋,我都知間屋好大。」方野吉説。

我苦笑。

「睇你個樣都知你未食野啦,我煮個麵俾你食啦!」方野吉説。

「多謝。」我説。

然後佢喺廚房攞咗兩個杯麵出嚟。

「嘩,真係辛苦你。」我説。

「我都知辛苦,唔洗多謝我。」方野吉説。

「話説我今晚瞓邊?」我問。

「瞓我老豆老母張床囉,反正佢地唔喺屋企。你要沖涼嘅話食完飯好沖啦,夜晚十點斷熱水。」方野吉説。

「咁我着咩衫?」我問。

「着我啲衫囉,我地身型差唔多啫。」方野吉説。

「等陣,你冇書包聽日點返學?」方野吉説。

「唔緊要,我啲書喺哂locker。」我説。

就係咁,我莫名其妙咁喺呢個啱啱先識嘅同學嘅屋企瞓咗一晚。
------------------------------
有種越嚟越長嘅錯覺XD
後日就要返學啦QAQ
大家估下故事後續會點?