失戀200天後,我遇上的女孩們: 第二話

「阿Jack,陣間去Coco度整佢部機。」阿頭Anson吩咐我陣間既工作。
「又壞?上個禮拜先整完,唔通佢成日上網淘野淘到壞機?」
「你去到咪知囉!」
我公司係幫某大品牌維修電腦既,而我既職位就係幫公司個系統做維護,有時會幫客或同事整機,我諗都算係I.T.人既。而我個部門係陽盛陰衰,就算其他部門有女同事,但大部份都嫁左人或者名花有主,剩低既...大家明架喇...所以係公司搵(女)食真係會餓死。
「Jack哥~」一把高八度兼就走音既聲音係前方個位傳來,係Coco。
「點呀?淘野淘到壞機呀?」
「唔係呀!我開唔到outlook呀。」
「睇過...」
眼前呢個Coco就係公司裡面名花有主之一,男朋友仲係公司既同事,不過我唔知邊個。
「Jack哥~搞掂未呀?我仲有好多野做呀!」佢企係比佢矮半個頭既屏風同我講野,佢雙唔算大既眼好似同我講:「我今晚唔想OT啊!」咁...


老實講,雖然三十幾歲人,但仲未慣被人嗌做乜哥物哥,更何況呢個九十後既妹妹仔,被佢咁嗌真係分分鐘老多十年。
「就得啦,等佢load埋就差唔多啦!今晚約左人呀?」
「係啊!同朋友食放題啊!」
「朋友定男朋友呀?同朋友食唔使噴香水呀?仲要噴Anna Sui!」
「你點知架?你好西利呀!」高八度音波又再進擊,同時又迴避左我個問題。
「你仲食?」我指住佢個肚,開玩笑講:「上次又話自己肥左,你睇你三個月都似喇!」
「有無咁誇張呀?咁人地成日坐嘛!點似你打泰拳做運動咁fit啫!」
「得閒就做下運動啦!嗱!搞掂喇!」
「好嘢!咦?你無剃鬚呀?」
「係啊,尋晚無返屋企丫!」


「尋晚邊度玩呀?」
「關你咩事!做你既野喇,做唔晒要OT就無得食放題喇!」
「哼...」佢冷哼左一聲就埋首佢既工作,而我亦離開行返去我個部門度。
我同Coco就好似兄妹咁,基本上咩都講,有時又會互串(正確係得我串佢,佢還唔到口),亦因為佢天真無機心既性格,大家講野都無咩保留,而佢係公司唯一一個知道我失戀既同事。有人話「撒嬌既女人最幸福」,我諗Coco會係其中一個,老實講,假如佢皮膚白返少少,對眼大少少,身材好少少,我應該都被佢電到。
整完Coco部機後,暫時未有野做住,於是去茶水間蛇下,禁啱撞到Eric...
「喂,Jack!」
「Eric,尋晚玩到幾點呀?」
「兩點零三點,今朝差啲遲到...」
「嗯...你點識Peter嫁?」
「其實我有做開part-time blogger,寫下啲飲食,有時收到啲邀請試菜,去下去下,加上大家又鍾意落吧,對酒又有研究,咪混熟左囉,都識左三年左右...」


「哦...」
「尋晚我好似見你拖著條女走喎,睇唔出你都識搵食喎。」
假如我話你聽我完全唔知尋晚發生咩事既,我自己都唔信啦,至少今朝起身,已發現自己身處酒店房,我都估到大概,係差一個人證啫...
「幾時再去老蘭浦呀?」
「睇下點先...」
「就星期六喇,我地多數五六日狩獵既!」
「狩獵?」
「我地係咁叫,當然你可以去執屍既...」
「執屍?」
「不過唔好話唔提你,執屍都要識執生,我有個friend個零禮拜前因為執屍而被人爆樽,所以你都要小心啲。」
狩獵?對我呢啲窮L毒撚來講真係奢想,雖然自問個樣唔差,身高都有五尺十左右,但都無諗過自己係果啲溝死女情場鬼見愁,至少分手後二百日,我仲係單身,而且被同一條女飛兩次。
「Jack,時代變喇,做好人溝唔到女嫁!」講完,佢好似食神既劉以達咁飄左出茶水間...
「做好人溝唔到女」呢句話卻深深刻係我心度,而我今後既人生亦都因為呢句話而改變...