失戀200天後,我遇上的女孩們: 第十話

「咦,尋晚唔見你返拳館既?就打館內賽喎,你得嫁喇?」食飯時間,我準備叮飯時撞到Mandy。
「我尋晚約左人,所以今晚補返。」
「哦!」佢O住嘴咁望住我個飯,今日我食薯仔坟排骨,「你自己煮嫁?」
「唔係,我阿媽煮...」我望返佢個飯,「節瓜排骨飯,自己煮?」
「係,以前婆婆教我...」
「以前?」我有啲後悔問左呢句。
「佢好耐之前過左身...」佢低頭無講野...
「Sorry!」
佢擰擰頭微一微笑,「唔緊要。係呢,你打完館內賽得唔得閒?我想你陪我買啲野。」
「好啊。」


「嗯!」跟住佢攞返叮好既飯行出茶水間,同時阿明入來。
「傾咩咁好傾呀?」阿明八卦地問,但奇怪佢無一絲羨慕我既眼光...
「閒計啫,做咩?八你女神啲野呀?」
「女神?而家佢唔係我女神喇!」佢一路講一路揚佢果條頸鏈,我認得出係條情侶頸鏈,仲要兩個鏈墜并埋成一個心果款,應該係潮流特區貨色。
「咦!識左新女,有圖有真相啊!」
「嗱!」佢攞左電話出來,俾左張相我睇,佢條女幾可愛。
「你好野喎,可以搵到個矮過你既?係角度問題定佢烏低身就你?」
「死啦你!我知道你同佢成日出出入入啊...返工放工...咁我無行,正所謂朋友妻吓...你知嫁啦,咪搵第二個囉,讓佢俾你囉!」
其實佢可唔可以填返啲空位,以為我一定明咁。不過,不可不佩服佢可以咁拎得起放得低,佢既樂觀比我仲似人馬座(順帶一提尋晚我生日)...
「咁咪好囉,聖誕節唔使愁嘞!」


「係由愁變左煩囉,煩緊唔知去邊好!去尖東睇燈飾好定去邊呢?」
尖東?講起我都有兩年無去...
「最煩唔知食咩好(刪幾十字)...食完又去邊?我屋企?佢屋企?爆房?有無房呢?(又刪幾十字)...」
阿明第二樣善長既就係佢可以自己製造問題而自己又搵到答案,完全唔使別人介入,不過副作用係佢會自言自語,仲要係好耐果隻,唔知既仲以為佢痴左線。
聖誕節...
完左館內賽我同Mandy一齊搭地鐵出旺角。現代人,一入地鐵就要低頭,無論親人朋友情侶無一幸免,我地都各自睇自己既facebook,過左幾個站,我望住地鐵個路線圖,黃大仙...樂富...九龍塘...石硤尾...太子...旺角...
「望咩呀?」Mandy好奇地問。
「無睇下仲有幾多個站啫。」其實我諗返一啲回憶...
「第一次搭咩?咪...」個「仲」字都未講,已經有一班鄰近強國人沖入車廂,我地退無可退咁迫住係未開果度門度。我同Mandy差唔多心口貼心口,你眼望我眼。佢著左件闊領既T-shirt,雖然未去到低胸但已露出性感既鎖骨,嘴唇塗上淺粉色潤唇膏。身邊雖然充滿似懂非懂既語言,但依一刻我只聽到我同佢既心跳。
「到...到左喇...」


「哦...哦...」如果我果刻錫佢,咁會點呢?
我地出左站,去到朗豪坊。
對上一次去朗豪坊已經係未分手之前,條長電梯,係我悲喜交集既地方,我與她曾經係度錫過最耐既一吻,又試過借啲依抽佢水,又試過係度嗌過交,一段段回憶瀝瀝在目。我成日諗如果當日我地唔分手,.如果有時光機,如果可以將過去既錯誤決定重新選擇,如果...學網上既文章講:「依個世界無如果」,而我會加多句:「只有因為同所以」,因為一個幼稚既決定,所以我地分手了。
如果再有機會拖你手既話,我絕不放手。
「吓?」我不自覺搭落正在揸緊扶手既Mandy隻手度,被佢驚訝一嗌,我緊張到連忙縮手,驚佢會嗌非禮...跟住佢擰轉身望住我,由於高度關係而且佢企高我一級,我既水平視線正係佢鎖骨以下既部位。隨住電梯既旅程完結,我地既視線亦開始接上...
「不如上頂樓囉,我想睇下CD...」
「好啊!」
今次我地並肩咁企,我企左佢企右,我望左佢望右,而我既右手背手同佢既左手手背觸碰過好幾次,但始終都無合上。
係週末,朗豪坊頂樓都有Live Brand show,而當我地到達既時候,正在表演緊Beyond既「遙望」。「遙望」係Beyond禁多隻情歌中謹次於「情人」,多過「喜歡你」。
每天多麼多麼的需要~永遠與你抱擁著~
忘掉世間一切~痛苦悲哀~
縱使分開分開多麼遠~也會聽到你呼喚~
期待我這一生再會你~
聽著「遙望」,細味歌詞,一股悲涼感覺湧上心頭,手卻不知不覺牽上。望住Mandy,佢無甩開我隻手,反而越握越緊,暖意由手中傳來,為悲涼既心帶來安慰。
但...我既心卻想著某人...