「有兩種方法,第一個叫一了百了。約晒佢地兩個一齊出來,一人一把刀,叫佢地隊死你,一係就你自己隊自己!」我求救阿明,佢俾我既答案就係咁...
「你痴線,咁第二個呢?」我仲以為仲有希望...
「你約Mandy先嘛,咁你出完街咪返屋企綁住佢係張床度,跟住咪同你個Tracy幽會囉!」
「你變態嫁?唔問你嘞...」
「使唔使幫你淘條SM繩俾你啊?」
「留返你自己用喇!」
問題又回復到原點,不過發問既人由兩個女人變做我自己,「你聖誕節打算點過?打算同邊個過?」
「喂,靚唔靚呀?」Mandy戴左頂紅色既冷帽係我面前。
「點解頂帽好似咁細既?」
「唔係好似,呢頂係我十零歲阿媽買俾我嫁!」


「嘩,十幾年都唔爛,好噤用喎!」
「收返個「十」字丫,唔該!」年齡係女人既大忌。
「仲咩戴頂舊帽出來?」
「無呀,頂帽係阿媽送俾我既聖誕禮物,果時戴頂帽周圍去,個個都叫我小紅帽嫁!」
「你唔會話細個做話劇,個個叫你做小紅帽嘛?」
「你點知嫁?好西利呀你!」
「你唔會話俾我聽你聖誕想要頂小紅帽吧?」
「咦~你講晒出來仲有咩驚喜啊?」驚喜?你show晒出來叫驚喜?
「咁我要做咩?獵人?大灰狼?」
「哈哈...做大灰狼丫,十足十呀,哈哈...」


「咁大灰狼要食小紅帽喇!吽嗚~」
「喂!街來嫁...哈哈...唔好玩喇...哈哈...」
我係度話俾你地聽,當你有兩個女朋友既時候,你要逗佢地開心,花既心機係唔止兩倍,所以,千其唔好有兩個女朋友。
「你諗26,27去邊未?」Tracy係餐廳問我,佢烏低身,我無意中睇到佢白色裇衫裡面個黑色胸圍...
「吓?」有喱士既...
「吓咩啫?你無諗咩?...你諗緊咩呀?」佢坐返直個身,再見喇喱士黑bra...陣間再會!
埋左單,我地係商場行。雖然播緊柔和悅耳既「Jungle Bells」,但佢個樣應該仲嬲緊頭先我無答佢,其實我都仲未諗到到聖誕節點樣陪佢兩個...係,包括Mandy...
「喂!仲嬲呀?」
「無呀!」佢撓埋對手唔俾我拖。
「無又唔俾我拖?既然係咁...」我從後攬住,雙手圍住佢條纖腰,細細聲係耳邊講:「唔好嬲啦!咁我想俾個驚喜你嘛!」


「咩驚喜呀?」
「講左仲叫驚喜咩?」我真係唔明啲女人咁鍾意咩都知左先,留返啲空間有少少幻想唔得咩?
「去書局睇下囉!」
我地行到書局,佢行到兒童圖書度攞左本「睡公主」。
「我細個最鍾意睡公主...」Tracy一頁一頁咁翻閱本書,佢既表情就知佢已經代入左「睡公主」裡面。
「每個人都想成為童話主角...」佢感嘆咁講...
「其實原本個故事唔係咁嫁,其實呢...」於是我將係網上睇到既原版「睡公主」內容講俾佢聽...
「你淨係識埋依啲野啫!」佢用鄙視既眼神望住我,同時打左我一下。
「唔嬲嘞咩?」佢唔出聲走開左。
我跟住佢行出去,直到一個櫥窗面前停左係度...
「睇咩呀?咦,頂冷帽幾靚喎,送俾我呀?」
人就係咁,係身邊既時候就唔珍惜,失去左先常掛在心,一次又一次不斷重複...
已有 0 人追稿