失戀200天後,我遇上的女孩們: 第二十三話

「你終於肯覆我嗱!」呢幾日我都有whatsapp俾Belle,但佢都無覆,終於今日...
「我呢排忙,唔得閒覆...」雖然隔住個電話,但我知佢講大話...
「你係唔係同返佢一齊?」我單刀直入,答案...我一早預左...
「我原諒左佢,佢話以後都唔會...」
「佢講你就信?上次邊個話記住個傷痕記住個教訓嫁?」莫名而來既怒火令我語氣重左...
「我唔知呀...唔通佢改我唔俾機會佢咩?」
「改?你唔係唔知依個人嫁,我真係好肯定佢會有第二,第三,甚至第十次...」
「你記唔記得上次邊個留低你係佢樓下啊!」我補多一句。
過左幾分鐘佢無覆我,仲下左線。其實Belle既事我無權過問,而且我地已經唔係情侶,但知道佢同果條友再係返一齊時,總係有啲莫名忿怒,我唔知係我餘情未了定憐憫,我始終放心唔落...
「有無掛住我呀?」來自另一個人既訊息,係Tracy。


「無啊,你再唔快啲返我就唔記得你嫁...」其實我唔係咁想佢咁早返,始終新年約左Mandy去我屋企拜年,費事穿崩...
「你乖啦...仲有幾日我就返喇...」
「仲要等幾日?」我係側邊整左個扁嘴既公仔。
「你唔好扭計啦,我係度都好掛住你...我應承你我會盡快返,好唔好?」
「好啦...」我放左個無奈既表情公仔,跟住無覆佢。
之後又傳來震動,係一張影左兜蘿蔔糕既相,下面仲有五個舔嘴公仔,係Mandy,我先醒起佢今日請左假,原來整蘿蔔糕...
「好似幾好食喎...」我整左個流口水公仔...
「唔係好似,唔係幾,係一定好好味!」
「真係?我好嘴饞喎...」
「你放心,到時一定令你食過翻尋味啊!」


「你唔會加料架喎?你上次話俾咩我食...」
「係呀,今次我會落迷藥落去,跟住就...」側邊有個奸笑公仔,「等你一生一世聽我話,哈哈...」
「係既,娘娘...」
跟住一堆奸笑結尾...
「返工時間係度玩whatsapp?唔想撈呀你?」一把陰沈既聲音係後面傳來,嚇到我差啲標尿,一望,係阿明...
「仆街,想嚇死人咩?」
「係你自己太入神啫,情聖!我望左你成個字你都唔知...」
「例牌新年前都無野做嫁喇,你自己唔係?點呀?你地好返嗱?」我見佢篤緊電話,仲不時傳來whatsapp通知音效。
「唔該你囉...上次你話主動搵佢嘛,咁咪主動囉...果時都無把握,淨係識帶佢去返我地經常去既地方,去我地相識既地方,點知真係得,佢話記返以前既感覺,仲話我唔搵返佢就兩個都唔揀喎!」
見到阿明一天都光晒咁樣,做朋友既我都為佢開心。


「咁你呢?你揀定邊個未呀?香港重婚犯法嫁,而且佢地都未必想分享你個心,你估拍AV咩?」
揀邊個?我想貪心啲,兩個都要,可唔可以?
大除夕加星期五,好消息係可以早放,壞消息就係幾千人同你爭車搭,所以我係附近行一陣先搭車返屋企,費事同人迫。行過H&M,入去睇下牛仔褲(聽老人家講,新年著新褲,成年就大富大貴)。
咦?前面個五呎三咁熟口面既...
「Jack哥!」原來係Coco,佢染左褐色頭髮,仲將頭髮剪到膊頭,前額齊陰,成個娃娃公仔咁,老實講,唔係好襯佢。
「嘩!你受左咩刺激呀?」改變髮型係改變自己既第一步。
「咁新一年要有新形象嘛!咦?你唔使陪Mandy咩?」
「佢請假係屋企整糕,我又唔想搭車同人迫咪行陣先囉!你呢?」
「咩我啫?咪咁囉...」佢扁起個嘴,表情好無奈咁...
「食白果呀?」我係唔係直接得滯呢?
「可能人地當我妹妹仔掛...」
見佢好似悶悶不樂咁,於是我地搵左間咖啡室傾計等佢訴下苦。原來Coco係果次打羽毛球幾日後,就同Jason表白,但被Jason拒絕左...
「其實佢中學果時已經有女朋友,同佢同班既,果時佢地男材女貌好登對,可惜兩三年前,女既遇上交通意外過左身,最重要既係果時佢地計劃緊結婚...佢拒絕我果時都話忘記唔到...」
「咁...都無辦法既...」其實我無諗過件事咁既...
「嗯...跟住我係網度識左第二個,佢個人幾好,只年紀大左啲...」


「大幾多?」
「十年左右。其實開頭都無諗過話咩,當識多個朋友咁,但開始多左傾計食飯,漸漸有左好感,但唔知係唔係年紀差距關係,佢對我既態度好似疏遠左,或者佢淨係當我妹掛...」
「所以你就轉左個髮型,想個樣成熟啲呀?」
「嗯...不過剪完我都有啲後悔,而家要等佢長返先再搞...」
「老實講,好難睇,你好似老左十年咁!」
「吓~」佢即刻雙手掩頭,當對手係頭盔咁遮住個頭...
「唉...男人係鍾意就鍾意,邊會理咩年齡既野,而且你大把青春,做咩為一個男人咁大改變丫!」
喝埋柸咖啡,我地就各自搭車走。原來佢打算新年後就轉工,仲要轉做診所護士。
「第時你邊度做你通知聲喎,我一定唔會去果度睇醫生!」
「我轉做牙醫護士喎...」佢轉身就走。
Everything will flow