失戀200天後,我遇上的女孩們: 第二十九話
「你又話得一次既!」
「咁你係唔係唔想要丫?」
咁又過左兩個幾月...
一切都好似無咩點變,除左Tracy唔係香港,Mandy如同陌路,Coco轉左工之外,一切都無變...呀,唔記得仲有我,調左去counter果邊幫啲walk-in既客整機...
雖然係近左Mandy個部門,但係...
「請左假去旅行?」我問Mandy同部門既女同事。
「係呀,好似去臺灣定日本,請左成個禮拜,好似話跟團...」
「有無講同邊個去?」
「無喎,我都唔係咁八既人,我淨係關心啲手信啫,叫左去日本唔好買草餅,去臺灣唔好買鳳梨酥,仲有...」佢講兩三個字有關手信既要求,主要都係食既...而我得出既結論係Mandy去左日本或臺灣旅行,唔知一個定兩個以上去,去一個禮拜。
其實係呢兩個幾月,我有諗過去搵返Mandy一齊,可惜每次撞到,佢都無出聲走左去,就連拳館都無出現過,完全無機會同佢講野,或者咁都係好既,佢有條件搵個更好既,而唔係我呢個廢柴...
「喂,聽講service team呢遲啲空降個新既阿頭喎,仲係女嚟喎!」講野既係阿偉,係呢個部門既收風筒,功能同阿明差唔多...
「咁即係head住我地!俾女人head好慘喎!」呢個叫阿文,毒男一名。
「講咩呀?做野啦!有人嚟喇!」主管阿Ben。
說時遲,那時快,我地已經見到老細帶住一班人有男有女入左嚟...
「這裡是我們維修手提電腦的皮department。」老細用唔太正宗既國語夾雜英文同來自臺灣總公司既人員講解。
然而,最令人深刻印象既係其中一名女高層,其上圍之偉大已不能用筆墨所形容,就連件套裝外套既鈕都就迫爆扣唔埋,再加上其樣子...咦?咁熟口面既...
「Jess,同你介紹先,呢個阿Ben,依度既主管...」
Jess?Jessica吧?有無D cup呢?36應該走唔甩喇!仲要係竹筍形,身形有啲肉但都唔算肥,樣係成熟啲應該都係三十出頭左右吧...
我係度諗咩呢?
隨著佢地既離開,我既幻想亦都告一段落,但其他人既...
「嘩!睇到我合唔埋眼...」
「可能日日同老細含同夾先坐到呢個位...」
「佢做我阿頭,晚晚同佢OT都抵丫...」
「我工作有新衝勁喇!」
所以話想提高工作效率,咁就要請返個樣靚身材正既女高層已經足夠!
「妳叫咩名?」我問係床邊著緊衫既女人。
「重要咩?你過兩日就唔記得我啦!」佢慢慢將衫鈕逐粒扣上,臨走前更輕輕錫左我一下。
「Daisy...Ada...Liz...」我係茶餐廳一邊飲緊茶走食緊A餐一邊盤點緊呢兩個幾月同我上過床既女人名,發覺數埋數埋都成二十零個左右(未計無上床果啲),唔知係唔係年紀大左,啲人同名開始唔係記得咁多...
而家都仲係十一點左右,又無戲想睇,行過CD鋪...咦!套戲出左DVD嗱!唔知有無第二個結局呢?結局係點呢?買唔買好?都係...
「唔通叫Elaine?唔係,Elaine係兩個禮拜前,短頭髮既...Amy?無可能,我記得我個胸仲大過佢,又瘦,我一手抱起左佢喇。唔通叫阿欣?唔係,阿欣都無染髮...」
正當我係公園長櫈度諗緊今朝條女叫咩名時,突然...
「啪」一聲,我個後腦被一個球狀物體掟中,原來係一個紅白色既膠波。
「叔叔唔好意思,唔該...」一個大約六七歲既細路女走過嚟問我攞返個波,咁我都費事怪佢,不過...
「叫我哥哥!」佢攞完個波就走左。
見到個細路女著住件Frozen衫...啊!今朝條女叫Elsa啊!但係...重要嗎?
見到佢好開心咁玩波,曾幾何時,我曾幻想自己會同深愛既人結婚,生一仔一女,放假時會同佢地係公園玩,坐係草地,一齊望住個蔚藍既天空,享受假日既陽光,就好似今日既天氣咁。如今,淨係得我一個人,望住個三唔識七既細路女玩波...
心裡面好似有個空洞咁,無論放咩落去都填唔滿,呢啲係唔係叫空虛?
曾聽人講,你以前越唔想成為既,大個後越會成為果種人...
曾經我好睇唔起用情不專既人,但我卻一腳踏兩船...
曾經我鄙視過玩玩下既花花公子,而家我卻成為一夜情既常客...
我係度做咩呢?
「啪」,一個膠波又掟中我個頭,打亂左我既思紊。
「唔好意思,唔該...」個細路女又走過嚟,仲懶可愛咁舉高雙手要返個波...
「唔好意思,唔該...」一次就話無心,兩次應該有意掛...
「唔好意思,唔該...」你死心喇,我唔會俾返你嫁...
「哥哥...唔該...對唔住...」......
「用力踢過嚟啦...哎呀...用手掟喇...」
「嘻哈哈哈~嘻哈哈哈~」
「嚟~我地鬥拋得高!」
「嘻哈哈哈~我高啲...哈哈~」
「唔好走咁遠呀!」
「嘻哈哈~」
天真無邪既笑聲不停在耳邊迴響,連我都被感染,開懷大笑。曾幾何時,我以為我自己已經唔識得笑,被空虛感掩沒。原來,想笑就笑,開心就係咁簡單,點解我之前會晒咁多時間呢?
「妹妹,你爹地媽咪係邊呀?」開心還開心,始終都驚佢屋企人當我拐子佬報警。
「佢...」佢用手指篤住塊面,東張西望,「唔知呀!」
「吓?你唔驚咩?」佢擰擰頭,「唉...我陪你去搵佢喇...」
正當我地準備去搵時...
「貝兒...貝兒,你去左邊呀?嚇死我喇!」一張熟悉既臉,但更熟悉既係佢迫爆既上圍,即使佢著緊運動裝...