失戀200天後,我遇上的女孩們: 第三十一話

「你地揀野食喇!」
我地係商場搵到間食西餐既餐廳攞到位後就坐低點野食同傾計。原來上次Tracy搵Mandy果時已經交換左電話,而當Tracy返大馬之後,佢地都有互相聯絡大家,而上個禮拜佢地就約定去臺灣旅行。
可能頭先啱啱暈完醒返既關係,見到我地三個一齊同檯食飯好似發緊夢咁,尤其見返Tracy,佢個頭同我地啱啱識果時差唔多長,連色都似,我仲以為我時光倒流返半年前...
「不如叫依個囉!我想試下...」
「不如嗌埋依個丫,炸野好似好正咁!」
「Tracy唔食牛嫁...仲有Mandy而家把聲咁就唔好食炸野!睇下先,Tracy唔食菠蘿既,佢成日話菠蘿加落薄餅度好不倫不類...Mandy就嫌三文魚腥....嗯?」
佢地兩個碌大對眼望住我,我講錯野嗎?
「咁你揀喇!」佢兩個異口同聲咁遞個餐牌俾我。
我由頭到尾,再由尾到頭翻閱餐牌,睇左兩三個字都未決定到叫咩...
「你揀完未呀?」Mandy用右手托住頭問我。


「你啲選擇困難症又發作喇!」Tracy就用左手托頭對我講。
「佢成日都係咁,唔睇過五分鐘都唔知自己食咩既!」
「你同佢最快點野食要幾耐?」
「兩個字到喇,果次帶佢去食馬來西亞野,點知佢唔啱食,最後都係由我點...」
「唔啱食又唔講既?」
「佢唔想掃我興,所以佢果餐食得唔多...佢無就你咩?」
「我無所謂,好多時都係佢決定食咩!」
「哦!」
佢地一人一句討論我,搞到我只好用餐牌遮住個頭,擋住佢地既攻擊。最後都係大家點自己想食既野算,而成個過程就用左半個鐘頭...
「你知唔知呀?佢同我落D,係咁搞我件衫,話我件衫少布啊!」Tracy笑住對我講。


「你仲好講,我咁大個都係第一次去果啲地方,仲要我著啲差唔多凸晒出嚟果啲...」Mandy雙手放左係胸前,我即時幻想到佢講果件衫...
「嘻哈哈哈...」Tracy突然拍晒檯咁大笑,「我記得我同佢試衫...嘻嘻...佢呢...」
「喂!你唔好講呀,你講我嬲嫁!」Mandy怒睥住Tracy,雙眼就好似有死光想射死佢...
「哈...我驚我唔講...我會忍笑忍死左啊...哈哈...」
「你講啦,我好想聽啊!我撐你!」我真係好好奇有咩事可以搞到Tracy笑成咁...
「咁我同佢揀衫...揀左件中間打開露胸既,後面上截就透視既。佢入到試身室無耐,係咁叫我幫佢,我諗咩事呢?唔通唔啱著?點知...原來佢調轉左件衫著,我入到去...嘿...佢成個胸透晒出嚟...哈哈...」
「咁你又話要除埋個...bra...點知著左上去好難除,唔係都唔使你幫手喇!」
「係你身材好啫...」呢句我非常認同。
「好咩?落到D啲男人咪又係嬲住去你度...」
「係你怕醜,成日縮埋一角,又唔笑,好似嬲左成村人咁,邊個敢惹你呀?」


「咁攰嘛...而且我又唔係咁鍾意依啲...」
而家呢個場景,今我聯想起「大時代」裡面,劉青雲見返去完旅行返既周慧敏同郭藹明,今日竟然會係我身上發生。睇住佢地係咁講埋旅行啲趣事,搞鬼野,唔止佢地,連我都開心埋。當初我一腳踏兩船,想盡辦法唔俾佢兩個知道大家既存在,估唔到今日我地三個可以坐埋一齊有講有笑,但係...三角既感情,總會有人受到傷害...
「你自己小心啲喇!」食完飯,Tracy自己搭車返屋企,而我同Mandy就一齊搭車。
係車度,佢係咁俾我睇旅行啲相,不停講解張相邊度影,果度有咩好玩...好似唔想俾我講野咁...
落左車後,我地並肩而行,我同佢隻手無數次觸碰,但當我想拖既時候,Tracy個樣總係出現係腦裡面,悔疚感令我唔敢拖住佢。全程我地都無講野,直到送佢到佢屋企樓下,我忍唔住講:「今晚...我好開心,多謝你...地...」
「吓?唔使...係我夾硬嚟就真,仲搞到你暈左...」
「邊關你事!係我呢排無咩操拳,體能差晒啫...」實情係呢兩個月我都沉醉係夜浦同一夜情中...
「其實我都無乜點上拳館...」
「你...可唔可以打我一把?」我唔知點解有咁既要求,總覺得自己差佢一把咁...
「吓?你做咩呀?係唔係頭先撞親個頭,撞傻左丫?」佢用手捽我個頭,我地既距離近到行前一步就可以錫到大家。而當我想錫埋去時...
「啪」,同樣突然既一把,露出同樣驚訝既表情,唔同既係今次打係左邊同埋無咁大力。我再想行前時...
「企係度!唔好郁!」
佢個嘴微微張開,想講出口時卻又收回,帶住快要落淚既眼睛轉身離開...
天,下著毛毛細雨...
總要在雨天~逃避某段從前~


但雨點偏偏促使這樣遇見~
總要在雨天~人便掛念從前~
是你的一切告別在雨天~