[深夜重口味] 女神日記: 女神被迷惑
話說我同女神 Athena 嗌交，呢個時候廢人 Grace 安排佢跟 Simon 做野...
「Athena，你呢度咁做就得啦。」
自從 Athena 轉去幫 Simon 之後，Simon 成日借啲意哄埋去教佢野，其實係想索油，聞 Athena 身上陣少女香味。
「係喎，唔該晒你，Simon 你真係好人。」
Athena 明知都由得佢，你知唔知你蝕底晒架?
其實 annual party 之後，公司好多狗公知道 Athena 原來係咁索，佢地唔知 Athena 已經同我拍緊拖，所以成日撩佢，不過佢一向唔理，但依家我地冷戰緊，佢突然對班狗公熱情咗，想話畀我知好多人追緊佢，要我呷醋。
雖然係咁，我唔會輕易認輸嘅，一來明明係佢唔啱，唔肯應承同舊情人斷絕來往但又迫我 block Lucy，二來我同佢嘅關係已經好親密，我唔信佢會接受第三者。
而且情侶嗌交只係平常事，有時仲可以增加了解。
「Athena，呢個送畀你。」
「多謝 Simon，咩嚟架?」
「你打開睇下咪知囉，係獎勵你嚮個 project 做得咁好。」
「係水晶呀，好靚呀，多謝你，Simon。」
個 project 做得好? 喂! 個 project 咩都我做晒喇喎，你幫個啲咩? Simon 擺明搵籍口送禮物畀你啦，你咁都收?
Athena 仲特登將個水晶擺嚮當眼位，方死我睇唔到，篤眼篤鼻...
唔單只咁，由於個 project 已經冇咩做，佢地好得閒，成日嚮度 whatsapp，每次睇完仲偷笑，唔使講 Simon 梗係不斷講爛 gag 氹你啦，乜你咁膚淺架?
你好唔公平，我同 Lucy 互相問候你就鬧，你同 Simon 私通就得，究竟你想點?
「Athena，我聽講你鐘意食呢間酒店啲蛋糕，頭先順路買埋。」
順路? 你去上環同個客開會，但間酒店嚮沙田，兜路兜成咁你都話順路? 你擺明特登去買啦。
「多謝你，Simon，咁大個我食唔晒喎，不如一人一半?」
一人一半? 你嚮我面前同第二個男人一人一半食蛋糕? 你想激死我? 使唔使餵埋畀佢食呀? 我冇眼睇你!
唔單只咁，班狗公仲嚮我面前講 Athena...
「Simon 你就好啦，近水樓台...」
「你地講咩呀?」
「心知肚明啦，你就正啦，恨死我地...」
「咪係，Athena 樣靚身材正，你實冇走雞啦?」
喂! Athena 係我女朋友嚟喎，你地有冇搞錯? 當我死架?
我好後悔點解之前唔公開我地嘅關係...
「咪亂嗡呀，人地好女仔嚟架。」
「我信你唔起痰? 上次嚮 annual party 見到佢咁索，係男人都扯啦。」
「你再亂嗡信唔信我打鑊你?」
「知喇知喇，咁快就幫住佢，食咗嗱?」
「打死你...」
Simon 仲嚮度扮純情，你地知唔知佢嚮上海個色狼樣? 強姦 Lucy 果時直情禽獸不如!
雖然隻隻狗公都想黐埋 Athena 度，不過因為 Athena 跟 Simon 做野，佢明顯有優勢，而且佢唔知 Athena 只係激我，以為 Athena 受溝，成日黐住佢。
好似成班人一齊出去食飯咁，不嬲 Athena 都係坐我隔籬，依家佢坐嚮 Simon 側邊，Simon 獻晒殷勤又斟水又夾野畀佢，成個男朋友咁，Athena 又扮晒好受落...
你究竟記唔記得邊個先係你男朋友架? 我睇到眼火爆...
「Andy 你做咩塊面黑晒? 肚痛呀? M 到呀?」
Simon 愈嚟愈過份，教 Athena 野時愈哄愈埋，差啲就錫到佢塊面，Athena 唔反抗仲好溫柔咁多謝佢，我就嚟發癲，好想一拳打爆 Simon 個鼻。
究竟 Athena 你想玩到幾時? 你知唔知 Simon 係人渣嚟? 佢嚮上海趁 Lucy 飲醉強姦佢，呢啲賤人真係同佢講句野都偏低自己。
「Simon，尋晚套話劇我始終唔明，個女主角...」
話劇? Athena 你同佢睇話劇? 你鍾意睇話劇架咩? 你都未同我睇過，你唔係鍾意 CCTVB 啲師奶劇咋咩?
仲有，幾時睇? 尋晚? 你同佢出夜街?
你地幾時開始去街? 明明你地分開走... 唔通前後腳? 嚮樓下等埋一齊走?
你居然偷偷地同第二個男人出夜街? 你當我係咩?
「其實果個劇團啲話劇一向比較抽象，所以唔係好多人明，我地可以換個角度由男主角家庭背景睇，你就會明白點解女主角...」
「原來係咁，Simon 你好犀利呀，咁都睇得出...」
犀利? 話劇啫? 又唔係百老匯歌劇，有幾巴閉呀? Simon 只係鹹蟲扮有 taste，Athena 你唔好畀佢呃到。
佢地成日愈傾愈投入，唔係傾公事，只係講邊度好玩，邊度啲野好食，我好嬲，亦愈嚟愈擔心，Athena 好似已經唔係純激我，開始被 Simon 迷惑。
唔得喇，再咁落去會玩出火，我要話畀 Athena 知 Simon 嘅真面目，不過依家先講佢可能唔信，以為我惡意中傷 Simon。
而且就算我想講都講唔到...
「Athen...」
「Athena，法國菜係咪怕怕喇?」
又畀 Simon 插把嘴埋嚟...
「係囉，啲野咁慢，一餐飯食成幾個鐘，返到屋企都 11 點幾。」
你又同佢出夜街? 仲同佢食浪漫法國菜?
「係呀，法國文化係咁，佢地鍾意享受，連食晚飯都講究氣氛，所以正宗法國菜要食好耐，如果食得快就唔夠正宗喇。」
「Simon 你真係見識廣博，乜都識...」
Athena 愈嚟愈迷佢，我已經唔係擔心，係驚，我驚 Athena 會就咁畀 Simon 搶走。
我好後悔，後悔點解唔早啲同 Athena 講 Simon 啲衰野，依家睇住佢一步步趺入 Simon 嘅陷阱，唔知點算。
到星期五放工時間...
「Athena，走得未?」
「差唔多。」
「我地快啲食啲野，然後睇戲，跟住飲野...」
飲野?
飲乜野?
飲酒?