[真人真事][校園][純愛]緣定·十年前: 第二十三章

咁之後我同呀余仲有跑狗,同埋另外兩個茄喱啡放左學就成日去練波,
唔夠人嘅關係所以叫埋前文講過嘅朋友A,朋友B同朋友C
呀雪都話叫我專心練,
放學唔駛陪佢溫書,
佢原本話想嚟睇我地喺街場練波,
我話唔好喇
嗰度又污糟又多蚊又冇得坐
喺學校先睇啦
老實講,
我梗係唔想佢嚟啦




除左街場真係污糟,多蚊同埋冇得坐之外,
最重要嘅係上次隻跑狗同呀雪傾計嗰樣好古惑,
肯定有景轟
再加上跑狗呢條友啲運動細胞又真係幾唔錯
佢話好耐冇踢過,
但我睇佢好快就上左手
叫呀雪嚟睇我地練波,
咪即係俾左球單刀條跑狗等佢有得威水
唔得唔得,
吹咩?我就係咁小器





各位巴絲都知班際比賽,
全班大部分人一定會好緊張,
又會同隔離班鬥出口術
明明大家之前仲一齊玩,一齊食飯 ,
一到班際比賽就可以掉返轉變敵人
咁都得
都算喇,
有啲同班同學嗰排仲煩到隻狗咁
日日問大唔大信心呀




練波練勤力啲呀咁
我心諗練波練勤力啲就贏咩挑
同佢地講又唔明
答又答得多覺得煩
雖然我知佢地係關心自己班,
但你唔覺得煩我都覺得厭啦
算,
好記得第一場踢之前嗰晚,
呀雪喺msn震一震我
我:「乜料?」
呀雪:「聽日加油呀 」
我:「多謝先 」
呀雪:「原來你都會做運動嘅 」
我好想講:「為左你一句我先做咋.」
但我份人咁淆底梗係唔敢講啦




所以話:「少姐唔代表冇嘅.」
呀雪:「今次你唔驚拎晒啲牌搞到其他人冇得拎咩 」
屎忽鬼,咁都記得
我:「再讓人拎牌自己就冇牌架喇,點都拎返個先 」
呀雪:「傻仔俾心機啦,你得嘅 」
收到呀雪嘅鼓勵戰力仲唔大增(唔係條賓周)

踢波嘅場面我就唔多講喇,
驚悶親大家
只可以話我地條籖靚到爆
十六強(第一場)打中二,
八強打中一,
咁就入左四強
唔知係咪有人收買左抽籖嗰條友
四強打中四B班,即係我以前鍾意嘅呀瑩嗰班,




又會咁啱都有
中四B班睇落唔係好勁
係得我個fd(前文提過嘅朋友C)比較突出,
諗住都輕輕鬆入決賽架啦,
點知一開波俾人入左兩波
成隊難免好亂,
好彩下半場俾我地屎忽撞棍入返兩球
呀余同跑狗入嘅,
戰情去到二比二,非常緊湊,
說時遲那時快,
已經就嚟完場,
如果比數維持二比二就要互射十二碼
就喺哩個時候,
對面四個球員(唔計龍門)有三個上左嚟攻,
留返一個喺自己後場,




我地連同對面都喺我地自己半場度混戰緊,
之後唔知點解個波落左喺我隻腳度
我梗係拿拿臨帶住個波攻門,因為時間無多,
對面都唔係傻嘅,
知道我地會打反擊,
所以留左個喺後場度等我,
之後我見到跑狗成支節喺中間標左上嚟(我喺左路),
哩一刻我做左人生最愚蠢嘅決定,
就係將左個橫傳左俾跑狗攻門
hihi喇今次真係俾左球單刀呀跑狗
對面個防守球員自然追唔到,
梗係啦,
佢對住全校短跑最快嗰個,
追條毛咩
跑狗亦不負眾望將個波送入網,




完場雞聲亦喺哩個時候響起,
我地贏左入到決賽,
成班人當左跑狗係功臣
湧埋去佢嗰度慶祝,
哩個時候我真係有啲不是味兒
如果唔係我大方橫傳俾佢
佢向左走向右走有得入咩
學校班人又係膚淺
淨係識睇入波
助攻呢啲咁高尚嘅野又唔留意
用屎眼睇波嘅
不過諗諗下都係輸自己
扭埋個防守球員咪得囉
駛乜橫傳呢
到時就係我做英雄啦
成班人湧埋嚟又可以承機食囡囡波餅
嘥晒,
呀余喺更衣室都抽左我一下水:「咁唔獨食呀 」
我:「食屎啦 」

之後放左學,
呀雪叫我陪佢去商場行,
行緊嘅途中,
呀雪:「今日我地贏左喎,唔開心咩 」
我:「冇呀,我地哩啲做大事,梗係贏左決賽先慶祝 」
呀雪:「係咩,但今日我見到有人喺球場贏左波都冇表情面燶燶喎 」
我:「嘩雪姐你見到啲咩係我地見唔到架,好驚喎大佬.」
呀雪:「我知你諗乜,丁仔呀,你今日好勁呀
如果冇你將個波傳俾呀X(跑狗),結果可能已經唔同喇」
呀雪真係好鬼心水清,咁都知
我:「你又有啲慧根喎.」
呀雪:「你叻啲,行啦,呢排你咁落力,請你食雪榚呀 」
我:「當我係狗呀獎勵我 」
呀雪:「咁仲食唔食呀 」
我:「食 」
入到決賽我地俾之前講嗰隊好勁嘅中五炒三球
最後拎銀牌