[真人真事][校園][純愛]緣定·十年前: 第三十一章

返到去我即刻搵呀余打機,
順便搵佢傾下呀雪嗰件事,
無可否認呀余係一個幾好嘅聆聽者
等你講晒先,
然後再逐啲逐啲同你講下,
唔會一次過俾太多意見你
傾落去係好舒服
直至依家一有啲咩諗唔明嘅話都會同佢傾傾,
相信各位巴打絲打身邊都有一個咁嘅朋友
要珍惜呀,


講返正題先,
我:「大佬有野搵你.」
呀余:「講嚟聽下.」
我:「我之前咪同你講呀雪有個病嘅 」
呀余:「係呀,唔係出左咩事丫嘛 」
我:「就係係囉.」
呀余:「大唔大單先,咪自己嚇自己喎 」
我:「就係咁嘅,
呀雪個病情開始惡化
佢個醫生建議要去外國醫


有可能短期內出國,
趕喺九月頭返嚟學校讀中五.」
呀余:「可能唔嚴重呢 」
我:「我都知,
但萬一係好大件事呢
可能去左外國醫好耐都未返嚟 」
我承認當時係諗得比較負面,
呀余:「咁都冇計架,
哩啲野大家都控制唔到.」
我:「唉個人好亂呀,


頭先喺呀雪面前扮到好樂天咁,
但其實就淆到標尿 」
呀余:「我覺得你扮得啱呀,
我諗呀雪依家個心情都唔慌好,
佢都一樣好驚好亂,
始終有事嗰個係佢,
如果你喺佢面前又驚埋一份,
只會令佢更加驚,更加亂.」
我:「都係,
但又可以點做 」
呀余:「咁咪趁佢走之前陪佢多啲
咁樣已經好夠,
同埋唔使講到佢一走冇回頭,
可能冇想象中咁嚴重呢 」
我:「你又啱.」


呀余:「頂住呀老友.」
我:「嗯,搵日請你飲野
依家打住機先.」
呀余:「得啦 」
同呀余傾完都好左少少,
希望真係好似佢話齋,
個問題唔大啦,
自己千祈唔可以喺佢面前亂,驚,
咁樣只會令佢加重負擔

第二日晏晝即刻問呀雪點,
佢話出嚟公園先講,
一去到公園就見到佢,
我:「點呀,你地決定點 」
呀雪:「尋日傾好左,


八月三日就會走,
嗰邊個醫生話會好快幫我做手術 」
我:「咁快有得做,
唔使排好耐咩 」
呀雪:「唔使呀,
可能我依家個醫生同佢熟掛 」
我:「我嘅靚靚女朋友,
你好似好定咁,唔淆喎 」
呀雪:「少少啦,
不過呢個病困憂左我好耐,
依家迫到埋嚟,
要去醫院搞掂佢喇 」
我:「好硬淨喎.」
呀雪:「你又覺得呢?」
我:「我知我女朋友好勁嘅


一定頂得到,
從來冇淆過.」
呀雪:「真係 」
我:「幾時有呃過你.」
對唔住喇今次,
要講一個美麗的謊言,
我:「依家距離八月三號仲有個零星期,
我地要日日見呀,
遲啲冇見一個月唔止點捱 」
呀雪:「好呀,
一個月好快過姐.」
我:「係,日日打丁就好快過 」
呀雪:「打咩呀 」
我:「打機姐,冇野冇野 」



之後嗰個零星期真係日日見,
佢個病就咁睇對佢唔似有好大影響,
不過唔知係咪心理作用,
塊面真係好青
冇乜血色,
我地喺嗰個零星期,
有時去下圖書館,
有時去睇戲,
有時可能喺附近亂行,
當然唔少得去篤魚蛋,
哩個係我同佢嘅共同回憶嚟
第一次同佢放學去街就係去篤魚蛋,
我:「靚女,兩串十蚊魚蛋.」
老闆娘:「呀仔又同女朋友嚟呀 」
呀雪上前撓住我:「係呀老闆娘 」
老闆娘:「都估到你地有野架喇,
咁開心就一人多一粒啦 」
我同呀雪:「多謝.」
之後送佢返屋企,
呀雪:「老闆娘啲魚蛋真係好好食 」
我:「我當初冇介紹錯架.」
呀雪:「唔知幾時先可以再食呢 」
我:「好快姐,
等你ko左個病,
返嚟日日請你食 」
呀雪:「又唔使日日嘅 」
我:「不過今年同唔到你過生日呀,
八月尾嗰陣你都去左外國 」
呀雪:「差我一份生日禮物呀 」
我:「唔會走數嘅.」
呀雪:「係咪我要乜你都俾我先 」
我:「係呀.」
呀雪:「你話架 」