[真人真事][校園][純愛]緣定·十年前: 第三十六章

第二日特登執靚個look先去café
之後返到去我同朋友A講:「一陣我有frd嚟幫襯,
張單入我數 」
朋友A:「女嚟架?
執得咁正 」
我:「關你Q事咩 」
大約晏晝左右,
伯母同呀雪就行入嚟喇,
伯母行先,呀雪行後,
一見返呀雪,




嗰種心如鹿撞嘅感覺又出返嚟,
始終只有呀雪先俾到呢種感覺我
我要一路用手揻實自己大脾,
驚自己認唔住喊
因為真係好開心,
但又唔可以表達出嚟
自己又好緊張,
好似返返去十年前坐佢隔離第一次同佢講野咁
唔知講乜好,
之前伯母同呀雪就行過嚟向我示好




伯母:「呀雪,呢個就係我同你講嘅最乖嘅學生嘞,
佢叫丁仔.」
之後伯母向我打一打眼色,
呀雪:「丁仔你好呀,
我叫Stephanie呀,你都可以叫我呀雪 」
原來呀雪改左新英文名
唔怪得facebook搵佢唔到
順便講下呀雪依家點,
十年後嘅佢,
高左少少,




白得嚟有血色,
身形依然好窈窕,
頭髪變左金啡,拉直左,
同以前一樣咁靚
呢十年嘅夢想終於實現
真係好感觸
但我唔可以喊
因為對於呀雪而言,
我只係佢媽媽嘅學生
我無啦啦喊會好奇怪,
所以我一定要忍住,
我:「你好呀,
我可以叫你呀雪?」
呀雪:「梗係可以啦,
其實我鍾意啲人叫我呀雪多過Stephanie




多數係喺外國啲人先叫我Stephanie 」
我:「你地想食咩?
今日唔收你地錢 」
呀雪:「好似唔係幾好意思喎 」
我:「唔緊要,
你媽媽以前對我好好教左我好多野
遠遠多過啲食物錢.」
其實邊係咁丫
只係以前呀雪講過,
如果我第日有本事開間café,
佢想免費喺間café食野飮野
雖然我知佢當日係講笑,
但我對佢一向都好認真,
做得到嘅話盡量做,
請佢食野又唔係真係一件咁難嘅事,




之後我地三個坐喺度傾計,
又令我覺得好似返返去十年前咁,
雖然已經大個左好多,
但嗰種感覺令我好有熟悉感
呀雪就應該唔會有哩種感覺,
因為已經冇左記憶

傾傾下可能大家放低左城府,
開始傾得深入左,
之後呀雪同我講:「丁仔其實我覺得你好熟口面,
我地之前係咪見過 」
我:「咁我跟你媽媽學琴,
見過唔出奇嘅.」
呀雪:「因為我之前有重病
之後醒返就冇左以前啲記憶,




我第一眼見到你就覺得好熟口面 」
我:「咁可能真係見過都唔奇,
不過我都冇乜印象喇,哈哈 」
其實我好想同佢講,
係呀,我地以前真係見過
仲拍過拖添
有過好多回憶,
但諗諗下,
人地都就嚟結婚喇,
都係唔好搞咁多野
之後食完嗰陣,
呀雪:「呢度啲野好好食呀,杯野仲好好飮,
下次要再嚟呀 」
我:「下次再嚟都得,
但要等六日先好嚟,




一至五我唔喺度.」
呀雪:「但六日會唔會好多人呀
不如你俾whatsapp我,
我下次嚟搵你留位 」
我:「好呀.」
之後我地仲交換埋ig同fb,
呀雪:「記住下個月嚟飮呀,拜拜 」
我:「到時一定準時,拜拜 」
之後呀雪同伯母就走左,
朋友A:「呢個女仔好面善,
以前同我地係咪同一間中學?」
我:「係呀,好耐冇見嘅朋友嚟 」

夜晚自己一個睇呀雪個ig同fb,
佢同佢男朋友都幾親密,
有好多情侶照,
順便講下佢男朋友,
斯文樣,
四四正正,
睇ig post覺得佢幾錫呀雪下
呀雪應該冇揀錯,
又諗返起今次重遇,
如果唔係當初呀雪叫我開cafe,
我可能就未必幫朋友A手,
我唔幫朋友A手,
就未必喺街上撞到伯母,
我撞唔到伯母,
就未必見得返呀雪,
有時冥冥中真係有主宰
過多一個月,
呀雪whatsapp我:「丁仔聽晚準時7:30到xx酒店.」
我:「收到.」
呀雪:「咁聽晚見啦.」

婚禮嗰晚,
我準時到xx酒店,
冇耐之後就入席,
一對新人出場嗰刻全場黑晒,
只有一對新人頭上有光射住,
慢慢行上台,
有人講過女人一生最靚嗰刻就係結婚嗰陣
的確冇講錯
呀雪著起婚紗真係好靚
有一樣野我呢刻先知,
我之前話見返呀雪就好足夠,
但其實唔係
原來我都係一個自私嘅人,
當我見到呀雪咁幸福嘅時候
我應該好開心先啱
但我做唔到呢樣,
因為呀雪嘅幸福唔係由我俾佢,
而係由另一個男人去賜予
個心又開始乸住乸住,
各位巴絲肯定估我會上台唱阿牛同婚禮的祝福啦
但我又邊度有咁大膽
所以只係一個人靜靜地食野
之後我都有同一對新人影相,
不過張相同我十年前幻想嗰張有少少出入,
十年前幻想嗰張相,
我個角色係著西裝嗰個,
但十年後現實嗰張相,
我個角色係嘉賓,
係祝賀人嗰個而唔係被祝賀嗰個

之後搭巴士嗰陣特登自虐下,
全程只聽阿牛同婚禮的祝福,
原來歌詞係咁到肉
你問我有冇怪個天,
坦白講真係冇
我係因為呀雪有病而識到佢,
亦都係因為呀雪有病而被迫分手,
只能嘆句命運就是如此
直至依家,
呀雪一個月一次會嚟一次cafe
有時自己嚟,
有時同佢老公嚟,
有時同伯母嚟,
而我,
只能夠用朋友嘅身份,
一直去睇住佢