[有沙入眼]是咁的，我覺得我住嗰度有啲唔妥: 8豬肉佬

是咁的，自從我聽聞例得村夜晚嘅紅衫女鬼同小朋友打乒乓波嘅鬼故事之後，就開始覺得自己住嘅地方有啲唔妥。

今日，我十點幾翻到屋企門前，啱啱見到走廊盡頭有個肥佬行翻入屋，閂埋鐵閘。

由於好難得見到鄰居，我就好奇望多兩眼。奇怪，點解個地下會有啲深色嘅濕鞋印？

一陣惡臭慢慢爬入鼻腔，不詳預感警告我唔好作死走過去望，於是我就入屋閂門。

我實在睇得太多食飽飯等屎屙嘅主角走去撩鬼攞命，我先無佢地咁蠢。



其實住得依啲有翻咁上下年月洗禮過嘅公屋，有一堆恐怖怪談同都市傳說真係一啲都唔出奇。

情況就好似每間學校前身唔係亂葬崗就係醫院停屍間，入親廁所都實有隻花子鬼𥄫你啲排泄物。

講真，作都比啲創意啦，人地花子好地地喺日本做乜要拉佢嚟香港廁所睇學生屙屎屙尿？所以我向來對依啲鬼故事都係一笑置之。

相對只會嚇你一跳嘅鬼，我始終覺得，人更加可怕。亦因為咁，對於人為嘅都巿傳說，我聽完就真係笑唔出。

譬如話，嗰個叫「豬肉佬」嘅故事。
話說點解而家依度會無咩小朋友嘅生氣呢，就係事緣以前有個拐子佬專捉細路，捉完仲會將佢地肢解，用鐵鈎掛喺自己單位入面。



人肉嘅腐臭好快蔓延開去，有人報警，警察就去咗豬肉佬嘅單位破門而入。

入到去，啲人只係見到成間屋嘅裝潢就好似豬肉檔咁，詭異嘅紅光同肉類熟成嘅味道，伴隨烏蠅拍翼嘅聲音，刺激每個人嘅胃袋。

不過，豬肉佬已經消失咗。

有人話佢到今時今日都仲喺村入面徘徊，匿埋喺暗角望住啲小朋友。

「咯咯咯。」樓上開始發出有人鑿牆敲地嘅聲音。公屋牆身同地板通常都無咩隔音功能，所以啲聲真係幾響，好彩我未訓。



唔知上面條友搞乜，姑念佢初犯，我唔同佢斤斤計較。

我望住個花灑，唔知點解有啲心跳加速，硬係覺得佢會噴啲奇怪液體出嚟。

深呼吸，開水制。

正常嘅熱水湧出，我當堂鬆咗口氣。