[有沙入眼]是咁的，我覺得我住嗰度有啲唔妥: 10搵我吖

樓上仍然係鑿牆嘅「咯咯」聲。

我留住盞燈唔熄，用手機大大聲播歌，咁樣好似可以幫自己壯下膽。橫掂都係，開埋電視睇啦。

「跟住落嚟係播映，午夜凶鈴。」吓？tbb無啦啦播鬼片？特登玩我呀？

我即刻轉台去亞視，我頂，唔記得亞視執咗粒。真係無辦法，唯有熄電視。

手機播緊陳奕迅嘅好久不見。



拿著你，給的照片，熟悉的那一條街。

只是沒，了你的畫面，我們回不到，那天。

聽住首歌，腦入面播放出好似舊時代黑白片嘅模糊畫面。

視線一直對唔到焦，但遠方嘅人影好似向我招手。

「過嚟吖。」溫柔嘅女聲呼喚我。細路女嘅笑聲時大時細。



意識已經幾乎遠去，但係「砰」嘅巨響強行將我拉翻現實。

「砰砰砰！！！」衣櫃入面，有異物不停用手掌拍打櫃門。

「嚟搵我吖⋯⋯嘻嘻⋯⋯」

由於衣櫃係敞門，佢點拍都開唔到門。

我呑啖口水，壓抑自己嘅不安，不知所措咁望住個震緊嘅衣櫃門。



可能係知道我無反應，佢停止咗拍門嘅行為。

三秒。

「我叫你搵我呀呀呀呀呀呀呀⋯⋯」佢個「呀」字化成笑聲，喺衣櫃門邊斷斷續續咁流出嚟。

我飛入廚房隨手拎起把刀保護自己，但由於匿喺廚房一定無得走，我當機立斷出去退到大門口旁邊，準備隨時見到乜就開門逃走。

終於，道敞門受過連番拍打嘅衝擊之後，向右打開咗少少。