[有沙入眼]是咁的，我覺得我住嗰度有啲唔妥: 45某人嘅視線

「我天生，就係唔存在。」就算喺同一個課室上堂，都可以無留意到吳悲凡嘅存在，只要佢唔大聲講野同做啲奇怪舉動，就唔會有人注意到佢。

而令佢確切感受到自己同幽靈無分別嘅日子，就係嗰一年，幼稚園嘅萬聖節party。即使已經裝扮過，但係仍然無被任何人所注意。每次想開口講野嘅時候，眼前嘅人就已經行開咗。伸出嘅手，永遠接觸唔到另一個人嘅搏頭。

但係唔緊要，吳非凡知道，自己永遠佔據某個人嘅視線。

「凡仔？點呀今日拎到幾多糖？」一個體型偏肥嘅女人錫咗吳非凡一啖。我望吓而家嘅吳非凡，就知體型真係會遺傳。

「媽咪⋯⋯點解，無人留意到我呢？」電視上嘅凡仔展示空無一物嘅南瓜兜。同一時間，女人拎咗手袋入面嘅糖，塞滿南瓜兜。動作唔太快，反而輕輕柔柔。



兩母子對望，隔咗一陣，吳非凡先笑住講：「trick or treat？」佢阿媽拍一拍佢個頭：「拎糖之前講架傻仔。」

佢地嘅笑容，喺下一個畫面消失得無影無蹤。吳非凡面上只有眼淚，佢媽媽面上就得翻一片薄薄嘅白布。

然後，生於單親家庭嘅吳非凡，就失去咗唯一嘅視線。

就算咩都唔做，只係靜靜留喺路邊嘅細石，無論自己喺大街定小巷，都一眼就認得出依塊平凡石頭嘅視線，已經唔再存在。

吳非凡企喺病床側邊，眼淚伴隨滑過皮膚嘅微響。



已經，無人再留意到依塊街邊嘅小石。

邊個都好，求吓你地，注意吓我。