[有沙入眼]是咁的，我覺得我住嗰度有啲唔妥: 66資訊

「你唔覺我個樣同你有啲似咩？」

噗嗤，係忍唔住洩出口嘅笑聲，當中蘊含「真是荒謬，把自己看得那麼高」嘅氣息。

「明明細個咁得意，點解而家咁八婆架⋯⋯」我細細聲自言自語。唔怪得我，佢細個嘅片段同家吓落差實在太大。

「唔係我八婆，係你個笑話搞到我忍唔住姐。」

我反一反白眼，之後行去打開屋企嘅摺枱摺凳：「坐丫。」



從佢嘅眼神之中我睇得出佢仍然不安，都正常嘅。

我啱啱見吳非凡嘅時候，又何嘗唔係抱有適當嘅戒心丫？

我地兩個坐低之後，由我率先開口：「你可能唔信，但我地而家喺一個叫『恐怖體驗』嘅遊戲世界入面。」

嗚。

阿妹發出一聲呻吟，用手搓揉額頭：「你繼續講。」



之後我就將吳非凡講我知嘅遊戲世界規則重新覆述一次比佢聽，出乎意料地，佢無表現難以置信嘅表情，只係一路搓額頭一路靜靜聽我講。

「你相信我咁荒謬嘅說詞？」

「唔信。但係⋯⋯覺得個設定有少少熟⋯⋯你當我半信半疑先啦。你依啲資訊，係喺邊度得嚟架？」

「遇見你之前，我同另一個叫吳非凡嘅人共鳴咗，關於依個世界嘅規則係佢話我知嘅。」