[有沙入眼]是咁的，我覺得我住嗰度有啲唔妥: 72痛覺重現

「最重要嘅淨化方法你會唔知？」

「我真係唔知呀！淨化吳非凡嗰次同淨化你依次係完全唔同！無一個萬用方法淨化所有體驗架！」

依個時候，一陣惡臭傳入鼻腔，頓時令Lucy揞住嘴鼻：「咩咁臭？」

熟悉嘅氣味刺激大腦神經，而今次更加濃烈嘅臭味扯開咗腦海深處回憶前嘅薄紗。

「嗄⋯⋯呀呀呀呀呀！！！」



Lucy聽到我嘅慘叫，即刻企起身用生果刀對住我，慢慢退後。

劇痛令我跌喺地吓，疼痛唔止由大腦傳嚟，仲由我四肢嘅關節擴散，嗰種係畀大刀斬斷手腳嘅感覺。

一刀，噹！斬唔斷，再一刀，噹！

我痛到渴望自己嘅手腳真係斷開，但四肢始終完好無缺，只有畀利器切割嘅觸感一直喺肢解內迴盪。

「你⋯⋯你做咩？」Lucy拎住生果刀嘅手喺度震，佢一定係好驚我。



「好⋯⋯好痛！」

畀人千刀萬剮嘅碎骨爛肉就好似真係喺我面前飛濺緊一樣。我嘅視野入面見到本來寫住樓層號碼嘅油漆已經褪色。

跑上一層又一層樓梯，第一身嘅視覺伴隨「嗄⋯⋯嗄⋯⋯」嘅抖氣聲而不規則震動。

我避緊啲咩？

「點解又去翻同一層！」右方傳嚟拖鞋踐踏濕水石地嘅「啪，啪」聲，表示默默拖住垃圾袋接近嘅異物。



豬肉佬出現喺眼前。

磨利刀磨利刀⋯⋯