[有沙入眼]是咁的，我覺得我住嗰度有啲唔妥: 89由一開始就唔存在

如果豬有智慧，被教導由出世開始就注定會被屠宰成為食物，佢地又心甘命抵被殺死，但死後先知自己嘅肉原來只會成為被垃圾車壓扁嘅廢物，我諗佢地會覺得今世嘅痛苦都受得太唔抵。

為咗成為食物而死，但死後先發現自己無辦法成為食物，一切嘅痛苦都只係白費心機。

如果同教徒講，今生嘅苦難都係為咗死後嘅天堂而設，到佢咬緊牙關捱到死嗰日先知，原來無天堂，到底有幾多人可以承受得住咁嘅真相呢？

阿公會覺得豬可憐，或者係因為佢曾經都有好相信，但最後親眼目睹崩潰破爛嘅事物。

「我只係唔想令佢地生前嘅痛苦變得白費。」



年幼嘅我，無辦法理解阿公對豬肉嘅同情心。

我諗，大概亦唔會有人能夠理解一個可憐豬肉嘅屠夫。

「反正未壞，食得幾多得幾多囉。」

但肉太多，食唔哂嘅總會腐壞。

屋企放得多依啲處於變質邊緣嘅肉，臭味就會自自然然籠罩成間屋，同時隨風飄到其他單位。



亦因爲咁，我地屋企已經收過好多次鄰居嘅投訴。

有一次，警察上門調查，因為有人懷疑阿公殺咗人，將條屍收埋喺屋企。

我諗起一開始喺腦中迴盪嘅豬肉佬傳說。

被扭曲嘅記憶。

原來唔係殺細路嘅豬肉佬消失咗，而係由一開始，殺人嘅豬肉佬就唔存在。