依種倔強,喺我以後嘅人生之中變成咗精神支柱。

就算外人笑你徒勞無功,就算連自己人都覺得白費心機,咁又點?

我只係純粹想咁做。

為咗最重要嘅人,而要研發出嗰項VR技術。

大腦模糊咁描述咗我往後嘅記憶。雖然具體嚟講係為邊個,嗰項係咩技術都未清楚,但有個輪廓已經係好高價值嘅線索。



我用另一隻手捉住阿公嘅手背:「以後丟垃圾嘅任務就交畀我啦。」

我地行出走廊,佢摸一摸我個頭,轉身望向昏暗嘅長廊,好似睇緊一條夢幻嘅時光隧道咁。

「小朋友呀,真係行吓行吓,就會大個。」

我拉住袋垃圾,行落樓梯,放喺樓層之間嘅平台。

「叻仔。」