[有沙入眼]是咁的，我覺得我住嗰度有啲唔妥: 110記憶唔同

佢唔記得。

唔怪得Lucy醒翻之後一句都無提過豬肉佬。可能因為我淨化阿公嘅時候，Lucy已經處於昏迷狀態，而淨化咗之後成個恐怖體驗對佢嚟講已經唔存在。

因為淨化嘅時候佢並唔係清醒狀態，所以Lucy仍然唔知道眼前嘅恐怖事物其實嚟自重要嘅回憶。對佢嚟講，阿婆仲係「唔知係咩嚟嘅事物」，於是會驚。

唔知邊度飛入嚟嘅飛蛾圍住忽明忽暗嘅光管漫舞。

「你個夢入面，除咗同你玩嘅男仔之外，仲有無其他人？」



Lucy搖搖頭。

果然，聽到佢個夢有「喺豬肉刀上面刻字」、「買咗兩個豬面具扮豬」嘅細節之後，我先入為主認為佢同我一樣攞翻哂淨化之後嘅記憶，但實際上Lucy拎翻嘅記憶同我唔同，而且份量比我少。