[有沙入眼]是咁的，我覺得我住嗰度有啲唔妥: 230我叫曲金鉉

「痴線香港地鬼做到咩。」

我設計恐怖體驗嘅時候，其他人都會覺得喺香港整咁嘅遊戲係異想天開。但最後恐怖體驗推出之後就一炮而紅，勇闖國際。

如果成日覺得喺香港嘅環境只會一事無成，咁就真係會變得一事無成。

「無可能架。」

意識植入技術，三十年前嘅人都會覺得無可能，但而家已經變成理所當然。



「資金從哪裡來？」

我願意奉獻我所有嘅財產。

「欣賞樓主不切實際嘅創意。」

如果無不切實際嘅創意，所有嘅夢都無可能成真。

「有意思咩？」



或者對你地嚟講，植入植物人嘅意識依種技術係無意思，但將佢研發出嚟，就係我最後一個拯救月曦嘅方法。

的確，我做嘅一切根本無意思。就算技術改良成功，都無辦法改變月曦永遠係植物人嘅事實。

我講過會拯救月曦，但佢出意外嘅時候年唔喺佢身邊，又點做佢嘅金仔？

一個喺現實中永遠無可能再實現嘅夢，至少……至少畀我喺虛擬世界彌補翻依個遺憾。

我唔想自己細妹一直留喺無盡嘅黑暗之中。就算佢嘅肉體已經無能力伸出手去捉緊幸福，我都希望可以令佢嘅意識感受到快樂。



「問過老細未？」

我咪你老細。

「我覺得是可行的，樓主加油。」

視線停喺一個叫「飛仔」嘅用户名上面，幾千個留言，足足睇咗幾千個留言，終於搵到你。

要實行瘋狂嘅諗法，必須要有異於常人嘅同伴。我以為會一個同路人都搵唔到，但喺公司入面竟然有一個。

只要一個就夠，一個見到個標題由心而發覺得可行，叫我加油嘅同伴。

我按捺自己嘅感動，開始同依個叫「飛仔」嘅人聯絡。第二日，我就即刻翻公司搵依個話我唔會搵到佢嘅員工。

亦即係之後一路無條件陪住我進行技術改良工程嘅吳非凡。



「終於搵到你喇，你叫咩名？」

佢猶豫咗一陣，答：「我……我叫吳非凡。」

好彩公司嘅員工向來唔知我咩樣，但如果我一報自己真名，就係人都知道我係佢地老細。

大腦條件反射咁浮現出一個昔日嘅角色名，一個月曦最鍾意嘅角色名。

「你平時睇唔睇小說架？」

吳非凡搖頭。好，咁實唔知邊個係金仔。

「哦，好啦。我叫曲金鉉。琴日講嘅VR技術，我係真心想研究架，你可以幫我手嗎？」