[有沙入眼]是咁的，我覺得我住嗰度有啲唔妥: 232被逼終結

到後嚟，我已經唔再在乎公司。

以前會對吳非凡有所保留，係因為我怕佢出賣我而危害公司利益，咁班有錢佬就唔會咁放心繼續投資，我就少咗錢做研究。所以我點都唔可以畀外人知道我做緊一項燒錢嘅技術研發工程。

但我對上嗰班元老，因為「恐怖體驗」一個遊戲已經賺到盆滿缽滿，逐個退休唔理公司。最後得翻幾個掛名大股東，不過佢地都無點再關注公司嘅營運，於是我買埋佢地嘅股份，將公司接管。

自己做咗老細之後，我就直接喺公司嘅開發部門拎錢做研究。

不過作為最高決策人嘅我，每日都用哂啲時間喺探月曦同改良新植入技術之上，自然無時間設計新遊戲，於是推出新遊戲嘅工作就交咗畀旗下嘅員工。



每年雖然會推出新遊戲，但賺嘅錢愈嚟愈少，再加上新晉遊戲公司好似雨後春荀咁開完一間又一間，長江後浪推前浪，令我地嘅競爭力逐年遞減。

其實會出現咁嘅問題，已經證明我公司嘅團隊腐敗無能。但因為我無理過，佢地連業績都唔駛同我交代，自然覺得愈做愈頹都無所謂。

一間公司，所有老闆都唔理佢嘅發展的話，最後嘅結果可想而知，就係遲早執粒。

慶幸嘅係喺二零二零年嘅恐怖體驗推出之後所賺取嘅龐大利潤，加上每年仍然有賺錢嘅輔助，令公司勉強維持咗二十年未至於解體。

而我同吳非凡研發改良意識植入技術，亦喺咁嘅環境下過咗廿年。



我地仲差少少就可以成功，已經進入最後測試階段，可能研究多一兩年，就有機會完成整項技術。

依廿年，我完全唔知公司發生咩事，只專注研究，可以話係個對公司極唔負責任嘅老闆。亦因爲完全唔理公司，連大難臨頭都渾然未覺。

二零四零年，「恐怖體驗」伺服器因爲已經無咩人登入，最後正式關閉，新舊玩家都唔可以再登入。

除咗唔死心嘅我仲留住自己當年廿五歲植入嘅意識之外，遊戲之中已經無哂其他人。

重新開放意識植入嘅密碼，只有我同吳非凡知道。



廿年前嘅我，仲等緊廿年後嘅我帶月曦去見佢。

可惜同年，公司嘅資金問題爆發，以前賺落嘅利潤幾日之內瞬速蒸發。

公司執粒，我宣布破產。

無車、無錢、無樓，亦失去所有繼續研究嘅資金。

意識植入技術嘅改良研究，被逼終結。