我換好晒衫褲Set埋個頭,Candy都仲未做完一半。
 
我催一催佢:「我哋四點半要到海洋公園㗎嘞,做快少少呀。」
 
「唔好催我啦!你咁樣我會好大壓力!」佢皺咗吓眉,真係好可愛。
 
Candy係咪Hall雞,我唔知;我只係知道,依家我架船愈沉愈深……
 
由於應承咗要俾佢專心做,所以我都冇乜點聊佢講嘢,只係自己喺度用手機上吓高登同埋玩吓佢送俾我隻熊。
 


呢隻熊啲毛毛真係好似佢頭髮隻色,而且仲有浸佢獨有嘅體香,以後嘅每一晚縱使Candy唔喺我身邊,我都可以攬住隻熊嚟瞓……
 
「Candy你食咗早餐未?」我問。
 
「未呀,講起真係有啲肚餓。」Candy冇望過我,剩係掛住做份功課。
 
「不如我落去買啲嘢食,你做住功課等我啦。」
 
「唔……」Candy諗咗陣,然後話:「好啦,快啲返嚟喎。」
 


「係呢Candy,你著幾多號鞋㗎?」我臨出門前問咗句。
 
「三十七,做咩咁問?」
 
「一陣你就知。」我講完就閂咗門。