《聽說她是一隻Hell雞……》: 第二十三節

到咗海洋公園之後，我哋排咗半個鐘左右，終於可以入場。
 
果日由於我哋係最早入場果批，所以佢派咗張優惠券俾我哋，只要我哋喺六點半之前玩完「天藏異域」或者「香港靈異禁區」，就可以喺晚上十點之後玩「5D地獄不歸路」或者「全院嚇滿」果陣打尖唔洗排隊。除咗張優惠券，佢仲派俾我哋每人一條藍色手帶，方便玩鬼屋果陣識別。
 
「我對上一次去海洋公園已經係好耐之前嘅事Lu……」佢一路行一路講。
 
「其實我成日都去，對上一次去係有親戚嚟香港我帶佢哋去玩。」我繼續講：「我哋搭咗海洋列車上山先啦。」
 
佢對上果次去海洋公園係未有海洋列車，所以應該都係好多年前嘅事。到底係Candy唔鍾意去呢啲主題公園玩，定係有其他原因？
 




由於我哋走咗班車，所以下一班車我哋有位可以一齊坐，咁呢啲時候梗係要玩吓佢啦，我就話：「其實呢架車一陣間會潛入水底，你睇吓車頂上面果個閘一陣間會打開，你就會見到好多海洋生物。」
 
佢望住我好驚奇咁講：「吓？真㗎？上面果個唔係個Mon嚟㗎咩？」
 
「嘿……珍珠都冇咁真，一間你就知。」我講就咁講，但其實係人都知上面係個Monitor嚟，一陣間會播埋啲濕鳩動畫，更何況架車係搭上山，點會潛入海入面睇魚？
 
之後個Monitor開始播動畫，佢知自己中咗伏，跟住望咗我一眼，我扮見唔到，專心咁望實個Monitor。
 
過咗陣我又偷偷咁望向好專注望緊個Monitor嘅佢，佢對呢一切事物都覺得好新鮮，好似一個啱啱入世未深嘅細路女咁。
 




果一秒，我真係好想拖住佢隻手，錫佢塊面……