穿入五光十色既霓虹燈光之中...

喺酒氣味濃既男男女女之間穿梭...

蘭桂坊...

一個充滿淫娃蕩婦鹹濕狗公既鬼地方...

岩丫…岩晒我...





我行下行下...遊下遊下...行過其中一間Bar既門口外...都已經聽到裏面鬼咁嘈...

係嘈吵既音樂聲...

呢種嘈吵既音樂聲既熟悉,又陌生...

有幾耐無聽過?

都真係好耐都無聽過...





以前差唔多晚晚都會聽到...好親切...

但就好似已經係好耐之前既事...已經好耐都無聽過...

我就被呢種既熟悉,又陌生既聲音吸引...一步一步咁行入去...一步一步咁行落去...

電子音樂聲越黎越大...越黎越嘈...

當我行到入黎酒吧既時候,在場都有唔少狗公望晒過黎...





無錯...係狗公...

佢地望住獵物既眼神,無一隻似返個人...

點丫?係我靚得制定係我而家個Look同個Feel比較清純,唔似得坐緊你地大髀俾你地攬緊既臭雞丫?

我呢D Look同Feel係唔係易呃D?好砌D?

無蒲一段時間,竟然變左隻純情小白兔...

「靚女~有無興趣黎我地嗰邊一齊飲野丫?」話都無咁快就有條死MK走到埋黎我前面...

我望一望眼前呢條死MK...十八九歲染到個柒頭唔灰唔銀咁...

再望佢指一指佢身後嗰張檯...四五條MK仔同五六條MK妹喺道猜緊飲緊...





我就無視左條MK仔,繼續行入D...

要我同D垃圾MK仔飲?我自隊好過啦!

但我行唔夠兩步,又有條西裝友走到黎我面前「HI~有無興趣一齊飲野丫?」

我又望一望眼前呢條西裝友...三十歲左右戴住副眼鏡好似斯斯文文咁...

再望佢指一指佢身後嗰張檯...三四條西裝友同一大班MK妹喺道猜緊飲緊...

我又無視左條西裝友,繼續行入D...

張檯都咁撚多女就咪撚過黎撩我啦!





所以話呢D西裝友真係好大貪!係女都攬左埋黎先!

而D女又真係一見到西裝友就戇鳩鳩咁俾佢攬埋去!

可能係覺得佢地有錢掛~

飲多D飲大D飲得貴D都唔會碌爆卡掛~

不過就算呢D西裝友幾有錢都好,咪又係D想叫免費雞屌免費西既死仆街!

真係Cheap到唔恨!

我行下行下...就行到黎舞池...

原來呢間Bar都幾大...大到有舞池...





我就企喺舞池邊...望一望...望住成班仔喺道Un下Un下...又成班女俾班仔圍住咁Un下Un下...

前面又俾條西裝友貼住咁Un...後面又俾條MK仔貼到實一實咁Un...

成班男男女女就跟住電子音樂既節奏身貼身咁Un下Un下...Un下Un下...

做乜Un野丫?

又有乜咁好Un丫?

唔好話,其實以前同ManYan落黎玩都好鍾意喺正舞池正中心Un下Un下。

因為總會有勁多仔圍住我地!





身邊全部都係仔!圍住我地貼實我地Un下Un下!

嗰時真係覺得好爽~全個世界都圍住我地黎Un~成為世界既焦點~

但而家...點解我望到都覺得戇鳩?

先唔好話D MK仔又幾咁MK...D西裝友有幾咁猥瑣...你睇下嗰條肥佬!

條肥佬著住件夏威夷恤,個大肚腩迫爆D衫鈕咁凸晒出黎Un下Dom下!

一路Un就一路Dom!一路Dom又要猛咁Un!

D MK妹見到條肥佬咁好肉都嚇到彈開!

都未算精彩…

你睇下右邊先...

右邊有個成個莊冬昕咁既阿叔戴住副眼鏡Un下Un下...

你以為怪叔叔跳古怪舞就係笑點?

錯撚晒!

嗱!個笑點黎喇!當D光射落佢副眼鏡道既時候就瞬間變黑超!

點丫?你戴副全視線落黎跳古怪舞係唔係想笑死人呀?

你睇下你面前條MK妹,真笑到腸穿肚爛而家邊Un邊撿返D腸呀~內臟呀~腎呀~塞返入肚裏面~

好撚好笑呀屌你老味~

我係唔係真係太耐無出黎蒲過?

點解而家D質素可以咁差?咁差都仲要有咁多𡃁妹出黎襯先死呀嘛!

唉...

我帶住一點點無奈之情...頭也不回咁轉身離開...

由間Bar行返出黎,又喺條馬路邊行下行下...

又睇住D死鬼佬攬住D𡃁妹摷下錫下...

又睇住D西裝友攬住D𡃁妹入酒Bar...

其實Brian都唔係咁差...

係咯…要差過Brian既男人呢道大把...

呢道D男人個個都係見到女都想屌左先...

而Brian...都係我衰先...係我撩佢在先...

係我賤格...明知人地有老婆仔女都要去搞人...

唔可以怪人咁多...

『係我仆街!係我格賤!』要怪就怪自己西痕啦!

唉...

我就繼續行...繼續搵下有無邊間Pub比較靜...

我繼續喺五光十色既霓虹燈光之中行下行下...

行下行下就行到黎一間...個門口好有英國風格既Pub...

以我多年夜蒲既經驗話俾我知,呢間Pub應該會比較靜D...比較岩我而家既心情...

好啦好啦~落去睇下啦~希望我既感覺仲未退化啦~

我行入呢間充滿住英國風格既Pub...

我一落到黎...四周既燈光都比較柔和...比較溫暖...仲要播住抒情既古典音樂...

氣氛總算唔錯~

而我再望一望張Bar檯之時...我見到Bar檯坐左一個...男人...

一個...貌似...古天樂既男人?!

我行前兩步,望清楚D呢個貌似古天樂既男人。

呢個坐喺Bar檯前貌似古天樂既男人著住件黑色既西裝褸...黑色既西褲...黑色既皮鞋...白色既恤衫...仲有...唔...無打到領帶...

不論係外型身形同氣質都成個古天樂咁既樣!

而最大既分別我諗就只有...髮色...

而家喺我眼前梳左All Back髮型既古天樂全頭白髮...

係全頭都係白...而且睇落唔似係染...應該係天生...

自然生成既白髮?咁呢個古天樂應該係幾多歲呢?

就咁睇佢Keep得咁好既身形同個樣...保守估計都唔會過五十歲...

五十歲都未夠就滿頭白髮?

係唔係有D乜野怪病?

而有無怪病都唔係重點...重點係張Bar檯上放左杯Dry Martini...仲要係喺正古天樂隔離...隔離個空位...

係等緊人?等緊一個無知少女走埋去飲杯無人掂過既Dry Martini?

我諗就應該係...

因為我仲望到喺古天樂面前有一條...車匙...紅色既車匙...

呢條紅色既車匙...應該就係法拉利車匙...

蘭桂坊...有D似古天樂既男人...放左條法拉利既車匙喺檯面...明明就係今日Lunch Doris講嗰條呃蝦條既仆街啦~

又會咁都俾我撞到咁好彩既~

望住個古天樂呆呆咁望住檯面上條法拉利車匙...我諗都應該等左好耐~

梗係耐啦~

被你呃蝦條既真人真事都放晒上網瘋傳左成日,仲邊有女咁傻西上當丫?

唉~好啦好啦~

我就行過去...行埋去...行到埋古天樂身邊坐一坐低...

『等緊人丫?』我摸住杯Dry Martini...摸住隻杯邊...

「嗯...等緊一個好似你咁既女仔...」古天樂摸下摸下條紅色車匙...摸下紅色車匙上隻銀色馬仔...

喺呢個距離...望一望清楚D呢個白髮古天樂...

我可以好肯定唔過五十歲...

因為佢既皮膚比起真正既古天樂仲要好...

只係神色方面略帶D滄桑...

曾經滄海難為水既...滄桑?

『你呢招唔Work架喇~』我拎一拎起杯Dry Martini...

「嗯?」古天樂好奇咁望一望我...

『用淘寶淘返黎既法拉利車匙呃蝦條囉~』我飲一飲杯Dry Martini...一啖就飲晒成杯Dry Martini...

唔...好耐都無飲過...喺Pub裏面飲Dry Martini...

呢種味道...呢種感覺...真教人回味...

「哈~」古天樂輕輕笑左一笑,「咁你又肯飲?」

『我唔想你一個人戇居居咁坐喺道等足成晚丫嘛~』傻佬~

呢個世界真係有好多傻佬~呆下呆下咁坐喺道,等一D唔知會唔會等得到既野...

但就算明知未必等得到,都會決心一定要等落去~

真係傻~真係好傻呢~傻佬...

「你真係好特別...」古天樂眼甘甘咁望實我...

『嗯?』一時之間,我唔係好反應得到...

因為我...頭先...快要想起...

「唔...如果你有興趣想知...係唔係真既話...」古天樂拎一拎起條車匙,喺我面前...舉一舉起...

我望住隻...銀光閃閃既...馬仔...

「就跟我黎。」古天樂拎住條車匙起一起身,背住我向住門口方向行過去...

有興趣想知...係唔係真?

俾佢講一講...我又真係有D興趣想知係唔係真喎~

最重要既係我唔甘心俾佢好似睇死我唔敢跟佢去丫嘛~

好!就等我睇下你咩葫蘆賣咩春藥!

我就跟住古天樂身後行~行返上去~行返出門口~

“BI!BI!”兩下響亮既“BiBi”聲,由對面馬路傳過黎!

我望一望對面馬路...正正就有一架...紅色既...法拉利泊左喺道!

唔係…真架嘛…架車唔係真係...佢架嘛?

頭先我行落Pub之前...都無留意到有架法拉利泊左喺道添...

古天樂行到去架法拉利旁邊...回頭望一望...

我就一步一步咁...行近架法拉利...唔係好相信自己對眼睛咁...打量一下架法拉利...

呢架紅色既法拉利...係開篷式既設計...

車身好扁...好低...貼住塊地咁制...

車身左下方位置帶有一隻銀色馬仔...同埋70...1947-2017字樣...

車頭仲有兩條...銀色既線...伸延至車身兩側...消失左…又喺車尾出現返...伸延到去…後擋風玻璃罩...

呢架究竟係...乜型號既法拉利?

我唔知...唔常見...

都係嗰句,對我地呢D女仔黎講淨係知紅色係法拉利...黃色係林寶堅尼...仲點識分係乜野型號...

但眼前呢架紅色法拉利...好似曾經喺YouTube見過...見過Sebastian Vettel揸過...賣過廣告...

古天樂將右邊車門揭開:「上車?」

我先發現原來呢架紅色法拉利係一架左軚車...

望住黑色既真皮跑車座椅...紅色既線...唔單止車身...就連車內既儀表台...駕駛艙既設計同佈局...都係咁特別...

古天樂遞一遞手...

『唔...唔該…』我就扶一扶住古天樂隻手...上一上車...

我都真係要勁小心...慢慢咁坐落去...

因為架車真係太低!

我要撳住條短裙仔...慢慢坐落去先無走光...

而當我坐左落張黑色真皮跑車座椅...坐好個人...個感覺真係好似坐左落地下咁...

呢種就係坐超級跑車既感覺?

“啪...”古天樂幫我閂一閂好門...自己都上埋車之後...

我望一望個軚盤...望一望勁多掣既軚盤...望一望軚盤下方有塊銀色牌仔寫住...

Cheryl?!

呢個貌似古天樂既男人...唔係叫Cheryl咁女仔丫化?!

「扣返安全帶先。」古天樂好小心咁幫我扣一扣上安全帶...同我保持住一定既距離...無趁機撞下我...掂下我...

『唔...唔該…』我就仲未定到驚...

驚?驚咩?

其實我都唔知自己驚緊D乜...

我淨係知被穿有紅色線既黑色真皮包圍住丫...黑色既Carbon Fiber包圍住丫...搞到我好似唔係好敢亂郁亂掂...

內心總係好似有種感覺...一個唔小心整污糟整花整爛既話...賣身都唔掂...

或者真係從來都未試過坐超級跑車...未試過坐好野...

總係會有D...唔習慣...一時之間...太難習慣...

古天樂幫我扣好安全帶,自己又扣好安全帶之後...

“吼!吼!!吼!!!”背後傳黎震耳欲聾既咆哮聲!

好響呀!響到震入心呀!

咩引擎黎架?唔講我仲以為自己真係坐左喺架Formula 1裏面!

平時喺街上見到D法拉利都好似無咁勁架...

呢架究竟係乜野型號既法拉利丫?!

“吼!吼!!!”我個心都未定落黎,古天樂就俾油開車!

貼住塊地...好似坐喺地下咁...

“吼!!!!!!”聽住背後既引擎聲...駛出蘭桂坊...

呢種感覺...真係好爽!

尤其係駛到去無乜車既公路上...

“吼!!!!!!”0-100真係唔使三秒!

我背脊都貼實晒張凳咁!

「係呢,都仲未知點稱呼。」古天樂一邊踩住油,一邊問。

『詩琳...李詩琳...你...你呢?』我係唔係唔應該喺而家呢個時候問?

我係唔係應該俾佢專心D揸車先呢?

「詩琳...幸會~我叫文繼文。可以叫我做Lennon。」呢個貌似古天樂既人原來叫Lennon...

Lennon?John Lennon?

之不過John Lennon都唔夠特別...姓文...仲要改個名做繼文呢下就真係夠晒特別!

真係可以將個名倒轉黎讀都無問題!

「咁遲先黎同你自我介紹,希望你唔會覺得我無禮貌~」Lennon帶住古天樂式微笑踩油。

“吼!!!!!!”

『唔!唔會...唔會...』我成個人又貼實左張跑車座椅!『之但係...你而家想車我去邊呢?』

我望一望...已經過左中環...過埋灣仔...仲見到馬場...

「一陣你就知。」Lennon好似好專心揸車咁...

『一陣...就知?』點解講到好似拐帶咁既...

「你驚丫?」Lennon問一問...

『我...我似驚咩?』其實都真係有D驚...

Lennon就帶住古天樂式既微笑繼續專心揸車...

冷靜D...冷靜D...我又唔係未試過上D連個名都唔知既男人車...

身經百戰既我有乜男人未見過?!

我就望下Lennon揸緊去邊...

呢個方向...

司徒拔道…黃泥涌峽道...

係…去緊淺水灣?!

唔通...Lennon想車我返去佢屋企?

睇黎Lennon應該係住淺水灣啦...

住得淺水灣...唔通係The Lily?!

係都唔出奇丫~

揸得部咁靚既法拉利,The Lily既租金同散紙無分別~

“吼!!!”法拉利沿住淺水灣道一直行。

無錯!我無估錯!的確係淺水灣!

但係...

點解會駛過左The Lily架呢?!

Lennon唔係住The Lily架咩?!

“吼!!!”法拉利繼續行,行到去一D獨立式別墅...

獨立式別墅?!

望住呢D...一座座對住個無敵大海景既獨立式別墅...究竟要有幾有錢先可以住得到...

當我仲未計到條數出黎之前...

法拉利開始減速,停到一座獨立式別墅既黑色大閘前...

Lennon拎個鎖匙包出黎...撳左一撳...

“咔”黑色大閘隨即打開...

Lennon將架法拉利駛入去...泊好喺車房入面...

Lennon落一落車...行到過黎幫我開一開車門...向我遞一遞手...

『唔該…』Lennon扶一扶住我落車...

“啪”Lennon閂返埋車門之後,行出車房...我就望一望眼前呢間...黑色別墅...

嘩…真係好有氣派...

黑色為主既三層式別墅,有好多落地玻璃窗...

所有玻璃窗都要對正個大海...

無敵大海景…

究竟呢個識左唔夠半個鐘既Lennon...有幾有錢?

有幾有錢先可以擁有到呢間...超級豪宅?

我仲唔係好相信係真...

我仲係唔相信架法拉利係屬於Lennon...呢間超級豪宅係屬於Lennon...

「呢間別墅無女主人...你可以放心。」Lennon帶我入屋。

『你竟然會覺得我會擔心呢樣野咁奇怪既?』入到屋裏,除一除對鞋仔...裏面一樣震撼...

以黑色為主色調,配上玻璃同黑色鋼琴面家具襯托...

好有品味既一間豪宅...

「其實我都係想表明自己係單身。」Lennon行入...吧檯...

『單身?咁你又有無諗過...我係唔係單身?』就咁就帶左我返黎...想點?

「呃...唔好誤會...其實...頭先去到酒吧先醒起自己係揸車黎唔飲得酒,所以就想同你...喺道飲。」Lennon一隻手拎住支Whisky,另一隻手拎住兩隻載有一大舊冰喺裏面既Whisky酒杯...行近塊落地大玻璃窗...

我跟住喺Lennon身後...

Lennon一打開塊落地大玻璃窗,出面唔係一大片草地花園...

面前竟然係一個長方形游泳池!

喺呢個角度...呢個高度...就好似連接住外面既大西洋咁(係唔係大西洋?我地呢D無方向感既又點分得到~)...

Lennon將支Whisky同兩隻Whisky酒杯放到地上之後...

「坐~」Lennon向我伸出手...

『唔...唔該…』我輕輕捉一捉住Lennon隻手...

Lennon扶住我...我就慢慢坐喺泳池邊...慢慢伸隻腳仔落水裏面...

泳池既水有D凍...不過又幾舒服就真...

當我坐好左...對腳仔都放晒入水...輕輕踢一踢…泛起了陣陣漣漪...

Lennon都坐喺我身邊...同我一齊放對腳落水...

Lennon斟一斟兩杯酒,將其中一隻交到去我手中...

我接過杯Whisky...

「Cheers~」

『Cheers…』

“噹~”同Lennon撞過杯之後,我地就開始飲...

開始坐喺個泳池邊...開始踢下踢下對腳仔...開始望下個大西洋...開始望下個月光...開始飲下酒...

開始同身邊呢個識左唔夠半個鐘...貌似古天樂...名叫文繼文...Lennon既男人...飲酒...

TO BE CONTINUED