我由Lennon手上接過部電話...我自己部電話...

Lennon好平靜咁繼續食佢既早餐...

但我就一D都唔平靜喇...

『大佬呀!我幾時話唔撈呀?!』我拎住部電話囧晒樣咁疑問Lennon!

我都無話過唔撈!





「你老細講野咁難聽,你份工都唔慌係好工黎架啦。唔做都罷啦。」Lennon講到若無其事咁。

『個個老細講野都係咁難聽架啦!有邊份工會係好工先得架?唔做既話仲邊有得食呀?!』我仲有好多卡數未找!我銀行戶口結餘係零呀!

係零呀!咩係零呀?乜都無咪係零囉!

雖然話ManYan唔收我租姐,但我都要食架!

無左份工無左收入我食乜呀?





食屎呀?!

死啦死啦...我唔可以無左份工架...

死啦死啦...唔知仲有無得Mount呢?

頭先Lennon講到咁寸咁…仲寸過馬撚…Mount條鐵咩?!

「你一個月搵幾多?」Lennon飲一飲啖咖啡問一問。





『我一個月...萬五左右…』萬五一個月唔係多…仲可以話係搵得少...但而家真係就連一個月萬五都無埋喇!

「我俾盡你一個月二萬…一年出十三個月糧計埋Bonus年薪三十萬。三十萬…我用三十萬買你一日。」Lennon計完一堆唔知乜野數出黎之後好認真咁望實我。

三十萬…買我一日?

『我唔賣身架...』我雙手打交叉咁攬住自己擰擰頭。

雖然我唔可以肯定Lennon既意思係乜,但我估都係同賣身差唔多…

「哈哈哈~唔係唔係...」Lennon笑一笑後擰一擰頭,「你諗多左喇。其實係我今晚有個場合要有個女伴,但我又搵唔到人。」

我諗多左?

咁女人不嬲都多野諗架啦...





唔諗多D好蝕底架嘛…

『你咁有錢想點搵都得啦...』你D大有錢佬講一句咋,全港九新界乜女都爭住仆到黎啦...

「所以我就搵左你。」Lennon又好認真咁望實我。

所以就搵左我?

點解我總係覺得Lennon呢句好似好有道理,但又唔知道理喺邊咁架呢?

唔...

的確...Lennon話用三十萬買我一日...我又真係好需要呢三十萬…





嗱!唔好話我貪錢呀!

明明就係Lennon搞到我無左份工在先!咁佢用呢三十萬買我呢一日...當係賠償返俾我之餘,我又可以叫做幫佢做返D野...都好似好合情合理姐...

「你係一個聰明女,條數你識計既。」Lennon又拎起杯咖啡飲一啖。

我係一個聰明女...條數我識計...

數就應該係咁計...除左話係Lennon搞到我無左份工在先...當係賠償之餘又可以叫做幫佢做返D野....三十萬…我既年薪有凸...

無左份工...唔知幾時先搵到另一份工...唔知做唔做得長...穩唔穩定...有幾多人工...

對銀行戶口結餘係零既我黎講...的確係需要呢三十萬…

『好!我應承你!』喺未搵到份穩定既工期間,我的確係需要呢三十萬!





「我都話你係個聰明女黎架啦。」Lennon帶住古天樂式既微笑點點頭。

『不過淨係一日架咋!』講清楚好D!

「嗯嗯~你鍾意啦。」Lennon又帶住古天樂式既微笑點點頭。

『而家開始計時!』再講得清楚D!

「好~」Lennon唔著緊咁點下點下頭。

『而家要俾左一半先!』再講得清楚D,均真D好!

「而家一次過俾晒三十萬你都無問題。」





『咁順攤?』

「有乜所謂丫?三十萬咋嘛。」

『你唔怕我收左錢就走左去咩?』

「你走得甩咩?」

『我喺大門行出去就係啦!』

「你行得出呢個大門,都走唔出呢個香港。」

『唔...』

「唔使唔喇,俾你個銀行戶口我,我而家過數俾你啦。」

『咁...咁你想我而家做D乜?』

「唔使咁心急,食埋個早餐先啦。」

同Lennon繼續食早餐。佢仲真係過左三十萬俾我!

三十萬…我要搵一年先搵到既三十萬…(其實做足一年都搵唔到三十萬…)

對Lennon黎講,可能真係好似我地使三十蚊...甚至係三蚊..

但對我地呢D下等人黎講,搵到都儲唔到...

你個銀行戶口幾時有過三十萬?

我諗如果唔係話想儲錢俾首期,你個銀行戶口結餘都唔會多過十萬…

錢...真係好難搵...亦都好難儲...

日常有太多開支...

而且年年通脹...百物騰貴...

樣樣都加到痴線...淨係人工不變...

三十萬…對我黎講要喺銀行戶口裏面有三十萬已經係天方夜譚...

但係呢個天方夜譚突然出現...

真係唔係好真實...

Lennon呢個人...

遇到Lennon呢件事...

Lennon想買我一日...

一切都好唔真實...

不過又確確實實咁發生左...

人生真係充滿驚喜~

唔係…應該係充滿FF先岩~

不過點FF都好,都係一日既事姐~

三十萬,係買一日。

究竟除左出席夜晚既場合之外,我仲要做D乜呢?

我意思係...要準備D乜...

同Lennon食完個豪華早餐之後...

「食飽就...跟我黎。」Lennon起一起身。

『哦...』D杯杯碟碟唔使執架?

唉~是旦啦~

我就跟住喺Lennon身後行...

行到去條黑色既樓梯...

我扶住黑色木扶手...跟住Lennon身後...踏向透明玻璃梯級...

一級一級咁上…上到黎頭先嗰層…有客房…有GYM房...有書房...有浴室嗰層...

Lennon繼續向上行...沿住條透明玻璃樓梯向上行...

我就繼續跟住Lennon身後行...沿住條透明玻璃樓梯向上行...

行多幾級...跟住Lennon身後行多幾級...行上一層...行到上黎...

睡房?!

上到黎一間黑色牆身...黑色地毯...黑色窗簾...黑色櫃...黑色檯...黑色梳化...黑色大床...黑色...玻璃窗天花?

總之就係以黑色為主既房間...

呢間房間...應該係主人房...亦即係Lennon既睡房...

做乜無啦啦帶我黎睡房?

上得黎睡房...仲要成張大床喺面前...即係話...

『我話過唔賣身架!』我立刻雙手打交叉咁攬實自己!

咪一早講左我唔賣身架囉!

D男人就係咁架喇...飽暖就思淫慾…見到靚女就想推佢落床!

「哈~你又諗多左喇...」Lennon行埋去間...一間…

我又諗多左?

我又點諗多左法丫?

我又跟住Lennon身後,行到黎一間...黑色為主既...衣帽間...

我已經見到掛左唔少...女裝衫...

一件又一件…唔同顏色...唔同款式既女裝衫...好整齊咁掛晒喺道...

Lennon將一個又一個黑色既櫃桶拉一拉開:「呢道所有既衣物你都可以隨便試。試到你鍾意,試到你最滿意。」

呢道既所有衫都可以俾我試?

「放心慢慢試到岩,呢道唔會有CCTV。我喺下面等你。」Lennon轉身行返落去。

我望住眼前一堆衣物...

我真係可以放心?

點解我心裏面總係有個疑問?

當我跟住Lennon身後,行到過黎衣帽間之時,我心裏就有一個問號...

“點解會有咁多女裝衫架呢?!”

無錯喇...Lennon唔係話過...呢間屋係無女主人架咩?(我記得尋晚Lennon車左我返黎之後,第一樣就係話呢間屋無女主人...)

唔通Lennon講大話?

定係Lennon有易服癖?!

我行近個衣櫃...睇清楚D衫...

D衫好新淨咁...好似岩岩買返黎洗過一次...仲未著過咁...

係新買返黎無幾耐?定係打理得太好?

我真係唔知...我淨係知好似越諗越多問題咁...

喺Lennon呢個男人身上...總係好似好多問題咁...

或者係因為...初相識既關係...

係咯…或者都係因為岩岩先識...大家都未互相了解過...

互相了解?有咁既必要咩?

我都係賣一日俾佢咋嘛~講乜野了唔了解丫?

過左今日,我就拎住嗰三十萬還卡數丫~搵新工丫~

係咯~一日好快過架姐~過完呢日之後就..之後就...

係喎!

都係Send個WhatsApp俾豪仔,同佢講我今日有D事要做先~

唔好要人擔心我先得架嘛~

我就拎起部電話,打一打開個WhatsApp,喺豪仔既對話裏面打...

『我...今...日...有...D...事...要...做...』Send!搞掂~

好~而家就等我睇下有咩衫揀先~

揀衫...揀衫...揀D咩衫呢?

試到你鍾意...試到你最滿意...放心慢慢試...咁著黎去邊先得架?又無講...

我估Lennon叫得我試衫...都應該係著黎出席今晚既場合...

咁今晚個場合又係乜野場合呢?

係高貴丫?隆重丫?Casual丫?定係睡衣Party丫?

又無講清楚...叫人點揀丫?

丫~呢個Lennon真係丫...總係好似一切都掌握係手中...但總係忽略左D細節野咁...

咁講法...我又算唔算開始了解Lennon呢個人?

了唔了解...咁就要睇下我揀得岩唔岩佢心水喇~

雖然話就話Lennon話試到我鍾意...試到我最滿意...之但係我係覺得佢係要我試套令佢鍾意...令佢滿意架囉!

但點先揀到套令佢鍾意...令佢滿意架呢?

嗯...我就當今晚個場合係高貴隆重既...(點睇都唔會係睡衣Party掛...)

咁應該要搵返條晚裝裙先得...

掛喺道既裙...有連身長裙...有連身短裙...

有V領有圓領有一字膊有無袖有吊帶有交叉帶有大露背有Deep V…

仲有好多好多款式...仲要每個款式都有唔同顏色...真係方便襯衫咩?

一個衣櫃就梗係掛唔晒...

仲有另一個...後面仲有另外兩個...

嘩...原來個衣帽間咁大...

真係眼花撩亂...

如果有選擇困難症既話就真係仆得街喇...

之不過要眾裏尋他其實唔難~

首先除左黑色之外,其他顏色我地都係可以無視架~

你睇下Lennon D野~除左架法拉利之外,其他所有野差唔多都係黑色既!

所以揀黑色就包無衰架喇~

然後呢...出席高貴隆重既場合最好都係著長裙~

之但係好似我呢D年輕青春細細粒粒嬌小身材既,最好都唔好著Deep V喇~(最大問題都係因為我無波…)

露背既話比較OK D~

唔...咁即係話揀條黑色露背長裙就搞掂啦~

嘿嘿...我真係聰明~

好~就等我開始搵條岩Feel既黑色露背長裙出黎先~

我拎下一條...拎下又一條...睇下個牌子...

唔係Gucci就係Louis Vuitton...唔係Louis Vuitton就係Burberry...唔係Burberry就係CHANEL...唔係CHANEL就係COACH...唔係COACH就係Salvatore Ferragamo…

仲有好多我都唔識既牌子...全部都係名牌!

睇黎我真係太年輕...以為鎖定黑色露背長裙就好快揀好...點知仲有咁多唔同牌子...

屌!諗咁多做乜春呢?求其揀條著上身睇下先啦!

我就將身上條米白腰間有Lace織花層次既雪紡連身短裙除出黎...淨係戴住個Bra同著條底褲咁對住塊全身鏡...

戴住個Bra…係喎...戴住個Bra喎...

而家我身上戴緊呢種Bra,點著露背呀?!

我拎起條Salvatore Ferragamo既黑色露背長裙...

著得露背就梗係要戴NuBra架啦!

唔知呢道有無NuBra呢?

我就喺D櫃桶裏面搵下搵...

喺一個又一個櫃桶裏面搵下搵下,逐個逐個搵...有髮夾有頭飾有絲帶有心口針有頸巾連底褲都有可以話應有盡有乜都有~

就係無Bra!

點丫?

咁大個衣帽間就係無Bra係咩玩法丫?

Lennon D女人係唔需要著Bra架?

唉~所以我總係覺得Lennon呢個人怪怪地咁~

好似同普通人好唔同咁...

係唔係個個有錢人都係咁?

係唔係唔怪就做唔到有錢人?

咁唔怪之得我咁窮啦~

唉~算~就咁著條黑色露背長裙睇下點先~

我好小心咁將條Salvatore Ferragamo既黑色露背長裙穿著上身...(D質地又滑又輕又薄咁...好似好易整爛咁...整爛左都唔知使唔使我賠添...)

著好之後,喺塊全身鏡前照一照...

左照照...右照照...轉個身前前後後照照照...

唔...有D鬆...

條裙有D鬆...大左少少...

著呢D晚裝係一定要好貼身架嘛!要岩岩好岩身架嘛!咁先靚架嘛!

而家好似大左一個碼咁...唔得唔得...唔見得人...

我再喺D衣櫃裏面搵下搵...搵下有無細碼D既...

但我搵勻晒咁多個櫃,件件碼都係一樣既!

就算係唔同牌子,放上身拼一拼都同身上件Salvatore Ferragamo一樣係大一個碼咁!

點丫?有咁多衫有鬼用咩?都無件岩身既!

件件都係同一個Size,點試都唔會岩架啦!

唉~我真係忍唔住呢個Lennon!

我就著住條Salvatore Ferragamo既黑色露背長裙...雙手拉住條裙咁行返落去!

我沿住條玻璃樓梯行返落黎,就見到Lennon坐左喺梳化道睇緊英文報紙!

Lennon見我落左黎就放一放低手上份英文報紙,望一望住我,笑笑口咁問:「試好喇?」

『唔會試得好囉~』我放一放條裙尾,『都唔岩身~』

「哈~果然係有D出入...」Lennon點下點下頭。

有D出入?又有D咩野出入?

唔係應該話應該買唔同既碼先岩咩?

『仲有丫~』我轉一轉身,Show個大露背俾Lennon睇,『你上面個衣帽間都無Bra既~我著自己個Bra會露晒Bra帶出黎囉~』

我再指一指住自己背後條Bra帶~指多幾指俾Lennon睇清楚D~

「咁你可以揀過條唔露背架嘛~」Lennon帶住古天樂式既微笑恥笑我。

『我就係鍾意著露背呀!』我谷起塊面豬登,雙手交住條小蠻腰!

Lennon先係呆左一呆,然後又帶住古天樂式既微笑:「好喇好喇~真係無你辦法...同你出去買衫。」

『同我出去買衫?』我一頭問號咁望住Lennon。

「係丫。咁呢道D衫都唔岩你著...又無Bra...」Lennon諗左一諗,「其實女仔著晚裝使唔使戴Bra架?」

『梗係要啦~唔戴Bra咪凸點囉~再唔係貼乳貼都得~』好似我呢D小饅頭唔戴Bra淨貼乳貼都唔會Dom晒落黎既~

「哦...」Lennon又望住我諗下諗下咁。

『你喺道諗緊咩丫?係唔係FF緊我淨係著住Bra或者淨係貼住乳貼既樣丫?』我雙手打交叉咁攬住自己,冷眼望住Lennon。

「唔係唔係~只係...我又學識多樣野姐。」Lennon又帶住古天樂式既微笑笑左一笑。

學識多樣野?

你咁大個人...真係唔識呢D野架咩?

其他男人我就唔知...但以Lennon呢個年紀(我估佢大約都係四十歲左右啦)...仲要係有錢人...點會唔識呢D野...

唔係話要自己試過著先知...試過食都已經知啦~

好似Lennon呢種年紀既有錢人,一定試過食著住晚裝既女仔架啦~

係著住晚裝黎食喎!

著住套晚裝上床,拆禮物既時候一定睇到晒裏面著D乜架啦~

唔好話淨係露背,V領圓領一字膊有袖無袖吊帶交叉帶Deep V都試勻晒啦~

食勻晒咁多種款式,分分鐘仲清楚過我啦~

「咁...等你上去換返套衫先...我先再上去換返套衫同你出去。」Lennon又拎起返份英文報紙。

『哦~好丫~』我就拉返住條裙咁行返上樓。

呢個Lennon又真係...幾均真架喎~

我上返黎Lennon間睡房...

等我換好先...先再上黎換...

其實...大可以一齊換丫...

望一望另外一邊...另外一間衣帽間...正正就喺頭先嗰間衣帽間既對面...

呢間衣帽間...應該就係Lennon自己既衣帽間...

係咯…其實Lennon都可以上黎一齊換...反正大家都唔係喺同一間衣帽間換衫...

之不過...應該係Lennon覺得成層都無門咁...可能會令到我唔自在...不安...擔心佢會走過黎偷睇我換衫...所以先唔一齊上黎換...

係咯~三十萬唔包睇我換衫架嘛~所以話呢個Lennon都真係幾均真既~

之不過呢...我就有D八卦喇~

我想八卦下...Lennon間衣帽間會係點架呢?

女仔既好奇心係好大架嘛~

尤其係黎到呢D超級豪宅~總係想參觀一下既~

你知架啦~而家唔參觀,以後都唔知仲有無機會參觀...

唔係唔係…應該係就連行近個大門都唔知有無機會!

所以呢...鬼祟D都要偷偷入去參觀一下~