一路行,一路有傾有講咁陪住Doris同Brian行到黎公司樓下~

『咁我地電聯再傾傾下個星期六去迪士尼既事啦~』同Brian講多聲~

「嗯~電聯~」Brian帶住親切既微笑點點頭~

「我又去丫我又去丫!」Doris仲係死纏爛打咁…

『唔俾你黎搞破壞!唔俾你黎搞破壞呀!』我係唔會俾機會你黎教壞仲恩同仲言架!





「車!好叻咩!嗰日我又拖住Sam Sam黎迪士尼放閃!閃盲你地!」Doris勁唔服氣咁既死人樣!

『你放還放,唔好喺D小朋友面前同Sam哥搞埋D兒童不宜既野呀!』我嚴厲咁警告Doris!

「我同Sam Sam先無你諗得咁淫亂丫~」Doris仲係得得戚戚咁!

『係先好講!咁好啦~唔阻你地返工喇~電聯啦~』我同Brian揮揮手~(無錯!我係無諗過要同Doris揮手架!)

「嗯~電聯~」Brian Keep住和藹既微笑向我揮揮手~





「叻喇~威喇~知你唔使做喇~拜拜你條尾~」Doris擺出一副臭嘴臉咁同我Say Bye!

呢個Doris真係丫!仲係成個死𡃁妹咁!

不過可能就係咁,Sam哥先會咁愛佢~

Sam哥鍾意𡃁妹仔丫嘛~Doris就岩晒佢啦~(仲要係一個大波既𡃁妹仔~)

都好既~見到Doris真係遇到個可以認認真真咁拍拖既男人…我都真係幾安慰既~





目送住Brian同Doris入𨋢後…我仲抬頭望一望呢座有D殘舊既大廈…

『三個月喇…』好快咁就過左三個月…而呢三個月又好似…好遠…

我好似…已經好耐無返過黎…已經好耐無返過工…

我唔會係…想念返工既日子丫化?

我唔係咁犯賤丫化?!

香港人奴性心強我明~但我從來都唔覺自己有被虐狂囉!

我諗…都係因為呢三個月都無野好煩無野好諗又無所事事咁,所以先會亂諗野架姐…

就好似話…經常諗起皓傑…





唉~都係諗下跟住做乜好~

我轉個身,一邊行就一邊諗…

諗下做乜好…

『Shopping好唔好呢?』日日都Shopping唔通真係日日都想Shopping咩…

一個人Shopping真係好鬼死悶…就算買到心頭好都唔會滿足…都唔會開心…

係咯!一個人Shopping就話悶姐~唔一個人咪唔會悶囉~

講到行街Shopping最好就梗係搵ManYan啦~





我就拎部電話出黎,撳個WhatsApp,錄段音俾ManYan~

『喂~喺邊丫你~』

唔使幾耐,ManYan就上線,仲好快聽完我段錄音,好快又錄音中~

“噹”話咁快ManYan就Send左段錄音過黎~

我就撳一撳段錄音聽一聽:「岩岩喺中環見完工~」

哦~岩岩見完工,咁即係得閒啦~

我又撳一撳個錄音:『岩喇岩喇~一齊Shopping下咯~』

“噹”ManYan好快聽完又好快咁Send左段錄音過黎~





我又撳一撳段錄音聽一聽:「OK丫~你想喺邊道等?」

我又撳一撳個錄音:『喺你嗰邊等~我好快就過到黎!』

“噹”ManYan又好快聽完Send左段錄音過黎:「OK~我喺IFC間Apple Store等你啦~』

我就Send個“OK”俾ManYan~

好野好野~有ManYan陪我Shopping~

所以話做女仔點都要有一個好姊妹~閨密~

我就急急腳咁行快幾步~行返去停車場~





“吼!吼!!吼!!!”

揸返架法拉利去搵ManYan~

“吼!吼~~~吼!!吼~~~”

好快又過左海~

“吼~~~吼!!吼…”

好快又過到黎IFC~

『唔該~』交左架法拉利俾服務員之後,我就行入IFC~行去Apple Store搵ManYan~

一入到People Mountain People Sea既Apple Store,我就見到著上全身黑色Suit既ManYan喺部MacBook Pro前撳下撳下~

我行到去ManYan身邊,搭一搭佢膊頭:『喂~』

ManYan嚇左一嚇:「嘩!咁快既?」

『人地心急想快D見你丫嘛~做咩丫?屋企部電腦壞左咩?』我又篤下篤下ManYan面前部MacBook Pro~

「唔係…只係…想買部俾豪仔姐…岩岩見成工丫嘛…」ManYan撳下撳下…篤下篤下…又諗下諗下…

『見成左喇?恭喜晒喎~不過岩岩先見成份工,糧都未出Probation又未過就使錢…會唔會唔係咁好丫?』我又睇下個Specification~

「就係咁先企左喺道諗…」ManYan又望住我篤下篤下個Specification…望下個價錢…

『諗乜鬼丫~我出錢咪唔使諗囉~』我又搭住ManYan膊頭拍幾拍~

「邊好意思丫?」ManYan皺皺地眉咁望住我…

『有乜唔好意思丫?我當正佢係我細佬架喇~家姐買野送俾細佬都好合情合理姐~』實情又係唔係咁?

梗係唔止係咁啦…

重點係…我覺得自己…對豪仔唔住…

呢三個月黎,我都無再搵過豪仔…更加無上過ManYan屋企…

唔係單單因為我已經住進豪宅…更重要既係我無勇氣面對豪仔…

我唔知豪仔點諗…我無路徑去打探…更唔會由ManYan口中打探…

我怕會…打草驚蛇…

我相信豪仔無同佢家姐講過我地之間既事,我自己就更加唔會講…

我唔敢諗俾ManYan知道我食左佢細佬隻豬會有咩反應…

會唔會大罵我一餐?會唔會嚴重起上黎連姊妹都無得做?

我唔知…但起碼就一定唔會係好反應…

而我…都真係幾內疚…

我相信…唔多唔少都影響到豪仔…影響到…豪仔既未來…

所以…可以既話…我都想為豪仔…做返D野…

「我就係等你講呢句咋嘛~唔係既話我又點會企喺道篤篤篤丫~」

『呀~你真係丫~豪仔有你呢個家姐真係幸福~』

「豪仔有你先係幸福~」

『你講咩丫?』

「我有講咩咩?」

『唔該~我想要呢隻15吋最高配置既~』叫隻藍精靈幫幫手~

「好丫~兩位請跟我黎~」

我同ManYan就跟住隻藍精靈上去~

「請坐~請喺呢邊等一等~」

坐定定咁等隻藍精靈服侍我地~

「可以檢查一下有無問題先~」

ManYan成個驗屍官咁,前前後後上上下下左左右右裏裏外外咁Check勻晒成部MacBook Pro~

「無問題?咁我幫你做左D基本設定先~Apple ID可以返到去先入~」

再坐定定咁等隻藍精靈幫我地搞掂晒成部MacBook Pro~

「OK架喇~咁你返到去可以立即用得架喇~拜拜~」隻藍精靈帶住親切殷勤既微笑同我地揮住手Say Bye~

我地都離開人山人海既Apple Store~

『喂~幾時變得咁師奶架?Check部機都成個驗屍官咁~』我一路翹住ManYan隻手臂行,一路恥笑下佢~

「同個男人分開左之後,樣樣野都靠自己架喇~咩都Check真D好~」ManYan點下點下頭~

無錯喇~ManYan已經同嗰個男人分開左~仲好似都已經分開左成兩個月~

『係呢~都未問你做乜會同嗰個男人分開既?被人地個老婆發現左?個男人唔捨得個家庭?』我又古古惑惑咁問一問~

「唔係唔係…」ManYan擰下擰下頭,「係我…有D攰姐~」

『有D攰?』我又追問一下。

反正我地兩姊妹都無乜野唔講得~

就算真係有野唔講得,自然就唔會講出口~

就好似我背住佢偷偷食左佢細佬隻豬…

「係丫~做人第三者都真係幾攰架~」ManYan一邊帶住我行入Salvatore Ferragamo,一邊講~

當我地一踏入Salvatore Ferragamo之時…

「李小姐你好~」幾個靚女店員就行到埋我地面前。

『嗯~』我帶住微笑咁點點頭後,就繼續翹住ManYan行入去。

無錯~呢間Salvatore Ferragamo既店員都識得我~

因為…呢三個月黎我成日都黎買野~

自己一個又好~同Lennon一齊又好~同Doris又好~同ManYan又好~同一大班姊妹都好~總之就係無無聊聊無所事事就會走黎買下野~

其實…都唔止呢間Salvatore Ferragamo…

其實…呢道所有名店我都有幫襯開…大部份店員都識得我…

『知攰咪好囉~以後都唔好再做人第三者喇~』我一邊睇下新返既衫,一邊同ManYan講~

做人第三者攰…夾喺中間既都唔係好受…

又要瞞住呢個,又要同嗰個偷偷摸摸…

咁辛苦…為乜?

未試過既話,可能會心思思…想試試…

試過之後…你唔會想有下一次…

假如試過都唔知死…仲想來回地獄又折返人間無限輪迴既話…你都係永不超生罷啦~

「哈~豪仔都係咁講~佢仲話…以後等佢養我喎~呢個傻仔~」ManYan甜絲絲咁笑笑口~

『佢咁識諗又咁乖仔咪好囉~』其實豪仔真係好好仔~仲對家姐特別關心~

只係…之前唔係好識點樣表達姐~

嗰時…我都係因為咁…而對佢有性趣…

我唔係全心只為佢隻豬先同佢搞架囉!

嗰時…我對豪仔真係幾有好感…先會同佢搞…

可惜丫~有好感係唔夠~仲有好多因素~

仲有好多因素先可以…成為情侶…

「哈哈~講笑咩~養起我…」ManYan一邊揀下揀下衫,一邊甜絲絲咁笑住口講,「佢仲讀緊書架~自己都未養得掂自己啦~點養起我丫?」

咩叫“口裏說不,身體卻很誠實”?咪就係ManYan呢D囉~

『有咁既心都好好架喇~』雖然話要喺呢個亂世中養得起自己都唔容易…

我而家都係靠緊人養…

但有呢顆孝心(係唔係應該用孝心?)都已經好難得架喇~

「唉~都係既~不過好彩既係…“佢”…無話要攞返間屋…」ManYan睇完D短裙後,擰擰頭咁行去睇下D手袋~

『嗯…』其實我都估唔到…

喺第一次聽ManYan講佢同嗰個男人分開左之時,我仲諗使唔使幫佢地搵定間屋安頓下。

我仲要係打算立即買返間萬景峰俾佢地兩姊弟住添~

荃灣丫嘛~方便豪仔返學丫嘛~

話晒喺我無助時,ManYan都救濟過我~到佢兩姊弟有難,做姊妹既就梗係兩胸插刀架啦!

點知ManYan話唔使~仲有瓦遮頭咁話!

「更加估唔到既係…佢會話將間屋轉我名…送左間屋俾我…」ManYan睇下D手袋,擰下擰下頭咁…

『嗯…咁佢都算幾好啦…』雖然咁講好似唔係幾好…但…係事實…

你提出話唔繼續玩呢個遊戲…佢唔死纏爛打咁攔住你…仲話要送層樓俾你做分手禮物…真係分手快樂囉~

「係咯…我都估唔到…或者…佢都覺得攰…佢都想分開…只係咁岩我提出先…咪好來好去囉~」ManYan翹一翹住我隻手。

『或者都係既…』不過係唔係事實既全部…就真係不得而知喇…

事實既全部,唔可以喺一個人身上睇得晒…

事實就係由好多好多唔同既人同好多好多唔同既人交織而成…

每個人都只可以睇到自己既全部…再加上其他人既一少部…

想睇晒事實既全部…就要睇晒咁多人唔同既故事…

有咁多唔同既人咁多唔同既故事,要睇晒既話…咪要花好多時間…咪好攰囉?

係架~不過假如你係一個尋根究柢既人…係幾有趣既~

『而家都好丫~可以同豪仔相處多D~唔使夜晚先黎叫佢落街避避~』被ManYan翹住手臂咁行出Salvatore Ferragamo。

「係丫係丫~唔使再夜晚先黎叫佢落街避避丫~變左係我落街避避丫嘛~」ManYan谷起塊面豬登,擰下擰下頭。

『哦?』我唔係幾明咁,一頭問號咁望住ManYan。

「個衰仔丫~成日帶女仔上黎丫~前排暑假咋嘛,差唔多隔日就帶個女仔返屋企~」ManYan扮晒嬲嬲豬咁~

『哦?豪仔有拖拍喇?」我都話架啦~

我都話乜野?

我都話幫豪仔破完處之後,要溝到女唔難囉~

同女仔扑過野之後,體會過女仔可以有幾淫之後,要溝到女真係唔難~

扑過野既男仔身上仲會發出陣陣光芒~

總會令女仔濕濕地~心思思,想試試~

一見你係18cm就直頭愛不釋口,搶住黎含~

所以想快D有女朋友,告別A0既毒撚們,就要快D扑左野先!破左處先喇!

好喇好喇,我認我係接受唔到豪仔咁快有拖拍而語無倫次~

我係有少少醋意架喇~

「拍拖丫…」ManYan諗下諗下…「佢又話唔係喎…」

『下?』唔係拍拖?咁即係咩丫?

「我問過佢成日帶女仔上黎啪啪啪啪啪啪係唔係有拖拍,佢又話唔係…」ManYan擰下擰下頭咁,又翹住我咁行下睇下。

『咁即係SP啦!』帶得返屋企啪啪啪啪啪又話唔係有拖拍唔係SP仲會係咩丫?

唔係咁丫化?

竟然變左有拖唔拍Dry扑野?!

會唔會唔單止一個SP,係SPs丫?!

玩到咁濫?!變左食家?!

定係俾錢架?!

沈左船?!

係唔係關我事架?!

豪仔變成咁係唔係因為我丫?!

講真係SP又好係食家又好係俾錢沈船都好…都唔係好事…

如果係因為我…搞到豪仔變成而家咁…

罪過呀!罪孽深重呀!!!

「咁就唔知喇~不過呢,我都見過個女仔幾次架喇~」ManYan諗下諗下,又點下點下頭…

『見過個女仔幾次?』咁即係唔係食家…

最多都係SP又或者係沈船…

呢兩樣仲唔夠死咩?!

「係丫~有幾次個衰仔打黎叫我落街避避,我專登遲D落~睇下個女仔係咩樣~」ManYan古古惑惑咁望住我。

『點樣架點樣架?』以ManYan既性格唔好話專登遲D落街,喺屋企裝Cam偷拍豪仔佢地搞野都唔出奇啦~

「個女仔好似你咁既樣架囉!」ManYan指一指住我鼻尖!

『下?!』似我咁既樣既女仔?!

唔通係…Kawaii?!

Kawaii唔係有男朋友架咩…

咁講法…反而…無錯…

Kawaii有男朋友…所以豪仔同Kawaii一齊就唔算係拍拖…

就算唔係SP…都係偷偷摸摸…

偷偷摸摸…竟然係咁…竟然會發展成咁…

「個𡃁妹仔真係勁似你!著埋校服既時候就十足十同做學生妹時既你咁!一摸一樣!」ManYan搭住我膊頭,箍一箍住我條頸!

『咁…咁…咁又點呢?』我唔係好敢正視ManYan…

「咁又點?我懷疑豪仔個衰仔都鍾意你囉!」ManYan古古惑惑咁打量住我!

『痴線啦!』我勁大聲咁!

無錯!我係心虛!仲要係極心虛!

一陣俾ManYan聯想到我搞過佢細佬咁點算?

俾佢知我食左佢細佬隻豬仲得了既?!

「你咁緊張咁…做咩丫?唔通…你地…哦!你趁我嗰次去日本,同我細佬搞埋一齊!」話口未完就俾ManYan估中左!

『痴線!點會呀!』都話逃唔出ManYan對法眼架啦!

「唔…」ManYan蒙起對眼…打量住我…

『你唔乜鬼野姐唔…我同你同年架!大過你細佬九年架!佢點會對我有興趣呀?!煲老藕咩?!旗都扯唔起啦!』講就咁講姐…但講完出口,我自己都說服唔到自己…

始終我都真係同豪仔扑過野…

仲要兩次…仲要扯晒旗…射得勁多…

最重要既都係…我知佢鍾意我…

豪仔一直都鍾意我…由細細個…第一眼見到我呢個大姐姐…

「唔…」ManYan諗下諗下…「都係既…你大過豪仔咁多…唔好話佢對你有無性趣丫…你都唔會對佢有性趣啦~」

『係咯係咯…』嘩屌!咁都俾我過到骨?!

「係咯係咯~你咁大食,小朋友又點能夠滿足到你呢?」ManYan又箍實我條頸,古古惑惑咁打量住我…

『嗄嗄嗄…論大食我又點夠你大食丫…嗄嗄嗄…點丫你?今次份咩工黎架?』都係轉移下話題…

唔可以俾ManYan再聯想落去…唔係既話…成個姐姐食細佬既情節就俾佢FF晒出黎!

「今次呢份丫?文員仔囉…」ManYan一邊答,一邊翹住我行下行下,行入名店~

『文員仔?既然做文員,都話去Lennon間公司做好過啦~』不過講返轉頭…又可以瞞到幾耐呢?

「千萬唔好!大公司喎!仲要皇親國戚咁入去做喎!幾咁多閒話呀!咪搞咪搞!」ManYan一邊睇衫,一邊擰晒頭咁!

『有幾多閒話丫?對你黎講,要應付呢D閒話真係綽綽有餘啦~』唔知可唔可以瞞一世呢?

「唔好搞我啦~俾我安安定定咁打份牛工啦~到我真係唔掂,搵極都搵唔到工…搵唔到食…無飯開…我再搵你打救啦好唔好…」

『好~好~』

其實又使唔使瞞足一世呢?

又會唔會時間耐左…件事就會慢慢淡忘?

我諗…我可以…

但係豪仔呢?

我希望佢可以…

我希望我唔會影響得佢太深…

我希望…我只係喺佢生命中一個過客…

輕輕飄過…不留下半點痕跡…