總在寂夜裡想起妳: 8

望住部電腦，望一望個鐘，係時候返第二堂，唯有死死氣咁躝返學校。 

成日係學校都心不在焉，有時間就拎個電話出嚟望下個facebook，不過乜都無。 

最後等咗成日，等到夜晚，妳都係冇接受到嗰request。 

唔通真係嬲咗我？ 

頹下頹下去沖個涼，沖完出嚟，咦？ 



facebook多咗個notification喎 

之後先發現原來個排就考試，所以佢夜晚先會on，咁啱琴日佢off咗我先add，所以足足等咗24小時。 

既然add咗啦，當然開始進攻啦 

個時真係樂觀過頭，inbox咗佢諗住傾下閒計就話facebook傾好麻煩轉wtsapp傾，成件事就順理成章。 

點知 



佢冇覆過我 

直到而家一年之後，佢都無係facebook覆過我。 

我不斷俾藉口自己，可能佢又咁啱off咗溫書呢，或者好忙無check呢 

但係望著盞綠燈好似過路燈咁閃鑠，我亦仿佛變成佢人生嘅其中一個過客，毫無存在嘅意義。 

個刻百感交集。 



第一次見到佢嘅趣事，佢嘅笑容，招牌嘅嘿嘿，英文堂相處嘅兩個幾月，邂逅後的相遇，gym房，m記，同埋共享星空呢啲永世難忘嘅片斷如走馬燈一樣係我腦海中投影著。 

判個犯死刑，都比個死因佢，等佢死得眼閉啊。 

唉。 

個刻我好清楚知道，妳係對我有好感嘅，究竟發生咩事。