總在寂夜裡想起妳: 10

呢個學期好快就完咗，想完星期五最後一堂之後就放一個星期假，之後就係final。 

facebook一直見佢又on又off，但就係唔覆你個種感覺，真係好難受。 

個心就好似綁住咗舊大石咁，一直向下沉，無形嘅重力將意志拉落無底嘅深淵。 

雖然我不斷同自己講，人哋唔覆仲死纏爛打只會令佢更討厭我，但最後都係忍唔住 

「final加油。」我唔知道仲可以講咩好，但又好唔甘心就咁俾佢離開我嘅人生，反正件事已經發展成咁，唯有博一博，希望單車變摩托。 



結果亦無大團圓BBQ嘅出現。 

滿腔掛念換來嘅，只係冷冰冰嘅， 

seen。 

嗯。 

我明白架啦，我唔會再煩你架喇。 



心情極度低落，拎起部電話，卻發現無人可以分擔我嘅煩惱。 

自從畢業之後，大家各散東西，聯絡都少咗，極其量只係係中同wtsapp group有過一兩句嘅寒酸。 

失去咗一班推心置腹嘅中同，上到大學，卻又結識唔到真心為我著想嘅朋友。 

呢個時候我諗起初中嘅老死 

「仆街仔好耐冇見啦喎，做乜咁好死搵我呀？」係呢種熟悉嘅親切感啦。 



將成件事從頭到尾講晒出嚟，個心即刻舒服咗好多，起碼搬走咗心口舊大石。 

「好心你咪諗咁多啦，十八歲人仲咁多愁善感。既然人哋都咁明顯避開你，你就放手啦。捉得太緊只會傷害到對方。反正都就final，呢段時間俾自己冷靜下，諗清楚自己係咪真係咁鍾意人哋，定係只係被熱情沖昏咗頭腦。」 

「話唔定溫完書過埋呢個月你就唔記得左人地呢？」 

「信我啦，唔好諗咁多啦。」 

冇錯，件事已經返唔到轉頭，等時間沖淡一切嘅思念，遺忘所有嘅回憶。 

但係點解，你又要再比希望我。