萬呎高空上來一場死亡遊戲: 12

「你老闆吖，過去見個仔都攪咁多嘢出嚟。」中年漢子抱怨著。 

「大叔，你唔係同個仔一齊住架？」少女身子向前傾，與前座的禿頭漢談天。 

「說來慚愧啊。」中年漢子撫摸著頭頂稀疏的頭髮，嘗試平服雜亂的思緒。 

「講啦講啦。」少女耍著脾氣，語氣帶著動人的旋律。 

「好啦好啦。」這就是少女獨有的魅力，彷彿世上沒人能抗拒她的要求，「係香港嗰個係我嘅私生子。」 





「嘩，大叔你曳曳喎！」調皮的語調，只存在在童話般的世界裏。 

「所以咪話慚愧。」漢子低下頭，是為自己禱告，還是在等待贖罪的機會？ 

「講多啲嚟聽下吖！」女子大概就是天生好奇吧。 

「都幾十年前嘅事啦。我係美國讀書，讀完之後個邊又有人請我，咪係個邊定居咗落嚟。冇幾耐係公司識咗我而家嘅老婆，我見到佢個一刻我就知我係屬於佢。」柔情，總是來自鐵漢，「佢同我唔同department，不過好彩嘅係我成日比老細使我去派信件，所以我可以成日過去個邊。」 

一直藏於心底的話，終於找到宣洩的時刻。 





「仲記得佢個時係坐門面接待處聽電話，所以有信嘅時候我就會交俾佢，順便吹兩句水。佢都係香港人，而佢父母係美國新移民，佢係過嚟打暑期工嘅。同佢吹多兩次水好快就熟落咗，我就成日夜晚寫信，第二日有信要拎去嘅時候就夾埋係中間。」 

「嘩，大叔估唔到你咁浪漫喎！」少女托著腮子，腦海中編織著對未來的憧憬。 

「哈哈，」漢子乾笑一聲，「浪漫就唔會對佢唔住啦。我同老婆好快就好親密，終於係情人節嗰晚，我係公司樓下接咗佢去食燭光晚餐，再同佢表白。表白嘅時候所經歷嘅緊張感，我真係一世難忘！同佢拍拖之後，我就覺得唔可以再派信咁冇出息，唔係未來點比幸福我老婆？所以我儲咗啲錢，去咗開間IT公司。」 

禿頭漢頂著車輪般的啤酒肚，一副豪邁的樣子底下，沒想到竟是對情如此看重。

「咁啱嗰時IT業起步，我好快就搵到第一桶金，亦因為咁我係幾年後向我老婆求婚，佢亦順理成章做咗我太太。雖然我老婆唔能夠生育，不過我唔介意。有小朋友固然係好，但有佢喺我身邊，已經係呢個世界最美好嘅事情，我應該為此而感到滿足。每日朝早起身見到佢甜美嘅睡相，我就覺得此生無憾。可惜我做咗人生最錯嘅決定，就係發展香港業務。」 





中年漢輕嘆一聲，吐出一口唏噓與無奈。 

「十二年前嘅一日，我一個人過咗去香港會見我嘅生意拍檔。嗰晚同拍檔飲咗好多酒，飲到爛醉如泥。我都唔知發生咩事，第二日起身就發現自己係張大床上面，隔離訓咗我拍檔個秘書。個刻我真係好驚，我知道我做咗啲對唔住我摯愛嘅人，但係我亦唔能夠對訓係隔離嘅人唔負責任。好彩秘書佢冇提起過件事，我都當件事冇發生過。可惜…天意…幾個月之後，個位秘書大咗肚，佢私底下同我講，我係佢肚入面嗰個BB嘅爸爸。」 

「嘩…」 

「你話係咪好諷刺。我本來仲諗住負責任，點知我知道咗件事之後，我驚到即刻飛咗返美國，仲斷絕晒同香港嗰邊嘅任何聯絡。我好驚身邊嘅一切會因為呢件事而失去，我唔敢面對。」中年漢苦笑了一聲，「就係咁，我掉低咗佢兩母子係香港一十二年。呢十年，我每日都受住良心嘅責罵，無一日訓得安樂。因為呢件事，個人肥咗，個頭禿咗，個心空咗。」 

「上年我老婆因病過咗身…一生人背負嘅負擔都冇晒，所以我諗，係時候返去見下最後嘅心結。」聲線因為激動而變得顫抖起來。「我知道我好自私，我無資格亦無面子去面對佢兩母女，但係我而家都活咗半百，隨時訓入棺材，我唔想帶住呢個遺憾合埋眼。」 

「我對秘書個樣已經無咩印象，所以我托個朋友搵到佢哋住邊之後，我就即刻買機票諗住去佢屋企搵佢哋。點知而家搞成咁，連個天都想懲罰我，想我抱憾終身。」

「大叔你唔好咁唔開心啦…我哋一定可以一齊出返去架！係呢，我點稱呼你呀？成日叫你大叔唔係幾好意思。」少女拉開話題，緩和尷尬的氣氛。 

「叫我華叔啦。」 





「華叔你好，我叫Melody呀。」 

這時候，少女身後傳來一聲沒人注意到的哭泣聲。 

「阿華…」 

「媽媽，唔好喊，佢唔值得你再為佢喊。」 

距離降落時間：13小時15分鐘。