萬呎高空上來一場死亡遊戲: 19

「阿女…女…」虛幻當中浮沉著一把熟悉的聲音。 

「爸…爸？」少女用力搖著頭，確認自己不在夢鄉裡。 

「乖女！爸爸係度呀！」一股溫燙的感覺從臉上傳來，好不真實。 

「爸爸！我好驚以後見唔到你呀！」 

「點會見唔到呢？爸爸一直係你身邊，守護住你㗎！」話語勾起了遺忘了的回憶。 





「你呃人！爸爸以前每晚講故事我聽，每晚攬住我訓㗎…自從嗰個女人嚟咗之後，你就無再理我！唔係因為佢，我都唔洗一個人孤伶伶去美國讀書！」孤獨一人流浪異鄉，磨滅不了刻骨的愛意。 

「對唔住…爸爸以前做錯咗，你唔好嬲爸爸，返返嚟爸爸身邊啦好嘛？」少女彷彿感到自己被擁抱著，回到往日天真糜爛的時光。 

「我今次返嚟就係嚟搵你囉！你等多陣啦，我就快到㗎啦…」少女閉上眼，輕輕地呼出一口氣。 

時間靜止了。 

「Melody！」少女好像聽到有人在呼喊著自己。 





「醒呀！」嗯，真的有人在叫我。 

少女微微睜開鳳目，映入眼簾的是臉色緊張的少男。 

「文康？」少女狐疑著，她的口罩…不是失去了氧氣了嗎？ 

「呼…好彩你冇事，好彩賭贏咗…」文康抹著一額的汗，神色舒暢了不少。 

少女細心一看，竟發現自己依偎在少男的懷抱裏，雙頰一下子泛紅起來。 





「做…做咩我會係度？」少女尷尬得不敢抬起頭直視少男，只好低下頭輕聲說道。

「你個口罩應該無氧氣…我見你好似無反應，咪即刻拉住你衝去廁所。」文康說話的時候咬著牙，好像鼓起了極大的決心在能下這個決定。 

「係咩…」少女回望著四周，雪白的牆身構成這狹窄的空間，擠下兩人後已沒多餘的空間。 

她看著鏡子裡的自己倒在男子的懷裡，急得想用力推開男子，卻發現自己發不出一丁點氣力。 

「你係咪唔舒服呀？」少男關懷地看著少女，雙手不其然摟得更緊，害怕少女會失去平衡倒地。 

「唔係…我冇事…係呢，點解廁所呢度冇事嘅？」少女害羞得不知所措，只好扯開話題，以解尷尬之感。 

「其實我都係估㗎咋。廁所係密封住嘅空間，如果係毒氣未飄得入廁所之前就閂埋道門，應該可以隔離兩個空間。當然大前提係，廁所入面唔會噴毒氣啦。」 

「你又知廁所唔會噴毒氣？」 





「唔知㗎…搏一搏，單車都變摩托呀嘛！哈哈！」文康乾笑著，卻聽不到少女以笑聲回應。 

「你…你做乜咁傻…萬一你搏輸咗…」少女心裡萬分感激，對方竟然以自己性命來下這個賭注。 

「我都唔知。個刻有把聲音叫我撒手一搏，我咪搏囉！」文康輕輕扶起少女，看了看手錶。 

「不如…我哋唔好出返去啦…呢度咁安全，我哋一直等到降落咪無事…」少女緊摟著少男，她知道返回機艙將失去這獨處的機會。 

「唔得…係呢度，我哋完全唔知出面發生緊咩事。佢哋係出面等我哋，我哋根本無路可走。如果佢哋忍耐唔住破門入嚟，我哋亦只會背負著逃避嘅罪名，有咩事我哋就會成為公敵。留係呢度，就會失去更新自己訊息嘅機會。失去訊息，就唔能夠準確分析形勢，到最後只會係死路一條。」文康冷靜地分析著，他也知道踏進這個空間，將為自己帶來極大的煩惱。 

「所以，我哋一定要出去。」 

距離降落時間：12小時15分鐘。